2 SAMUEL 17 - Cho Bible Common Language 2016

Hushai naw Absalom Chei Khai ah M’shüm ci

¹ Kä shou pha hta sei Ahithophela naw Absalom am, “Chang phia phia gha-lei-goi na ghü sak ä, a tuhmü David cu ka k’täm khai.

² Ani bawngbai ne, ak tha aken yah ung kei naw ka tuk khai. Ani cu kyikyawk khai, ak chang gui ami van dawng yawp khai gui. Kei naw ghangpughang bäng ka ngawn khai,

³ ak chang gui ami van nang ah ka law püi ba gui khai, cun cu lamihta acei ah a law ba ah mäih ah kyak khai. Nang naw chang tumat bäng na ngawn hlük ci; pawih ciah chang gui cu phyawng khai gui” cik ci.

⁴ Cun cu Absalom la Israel ng’vai gui ah phäh ah nik ciah m’shümthein nak ah mäih ah kyak ci.

⁵ Absalom naw, “Tuhbäi Hushai khü vä, a i a pyen mi ng’ngai kaw” cik ci.

⁶ Hushai gawk law khäta, Absalom naw ani am, “Shin cu Ahithophela naw na pek gui ah m’shüm theing nak ah kyak ci nei; mi läk khai ang? Kä cun ung, a i bi vai ah na m’thein gui ä” cik ci.

⁷ Hushai naw, “Tuhbäi Ahithophela ah m’shümthein nak, ana pek gui cu kä nik ci nei.

⁸ Na pa David la a chang gui cu ng’tuk m’khüt ciah chang gui, a hta ami guh ung nget ciah khawm ah mäih ah nget ciah chang gui ah kyak ciah na hmat ci. Napa cu ng’tuk bi chüm ciah gakap ah kyak ci, ak chang gui awn a täng ah mü ah kä ip ci.

⁹ Tuhbäi ani lung khui ung baw, a hei hmun ung baw ng’thup khai nei. A tuhbäi ge David naw chang gui tu ne anäng ah akiak ung, a cun ah mawng ng’yak ci naw nak chang gui ami hnim gui pyi ah pyen khai gui nei.

¹⁰ Phong kawng ah mäih ah kä kyi ne nget pi ciah chang gui phi kyik khai gui nei, a i ah kyasei ci ung Israel khaw ung chang avan naw, napa cu m’gäi ciah gakap, a chang gui cu ng’näng ciah ng’tuk bi gui ah hmat ci gui nei.

¹¹ Kei naw ka ning m’shümthein cu, nang naw Israel chang avan cu, vang khaw cawi ungka naw vang khaw cawi ung khüt khai ah m’cut gui ä, ngami cu tuikem ah lai gin chü ah da ci gui nei, cun kawn ah ng’tuk nak ung na mät naw ma tawn ä.

¹² Mikmi naw David cu a hawi phi a om nak ung mi hmuk khai, a i ah kyak ciah kä a hmat pha ung mi tuk khai. Amät la ak chang a u phi kä k’pawih ba khai.

¹³ Ani cu mang gaw tumat ung a luh ah akiak ung mik chang gui ami van naw gui, gui law püi u ne, mang gaw cu khaw nawi ah ka ah khai khai gui. Lung hta tumat phi m’htung lai ung kä om ba khai” cik ci.

¹⁴ Absalom la Israel gui ami van naw, Hushai ah m’shüm thein nak cu Ahithophela ah m’shümthein nak ah ta bä pi ci nei” cik ci gui. Ahithophela ah m’shümthein nak cu kä ami läk en vai ah Bawipa naw k’bäi ci, cun ah kyasei leibei cu Absalom ah khan ah gawk lawk khai.

David cu Pyen ah U Sei Phyawng ci

¹⁵ Cun kawn ah Hushai naw taigü goi, Zadok la Abiatha am, Absalom la Israel ng’vai gui am, ani naw m’shüm thein nak apek gui la, Ahithophela naw a pek gui ah mawng cu m’thein goi ci.

¹⁶ Hushai naw, “Ang ghit ah, tuhbäi! David am ng’thu nami m’thein vai, tui hei kah nak vai ah bung ung tuhmü kä ami om en vai, ang ghit ah Jordan tuinu ami hei kah vai, cun ung amät la a chang gui cu kä ngawn pha gui hlawt khai gui.

¹⁷ Abiatha ah hta Jonathan la Zadok ah hta Ahimaaz cu Enrogela tui hta Jerusalem gaw k’cawi ah ngäng ci goi, a i ah kyasei ci ung, ngani cu chang a hmuh goi vai kyi ne mang gaw kyong ah kä lut ci goi. Changshäm hnumi hta naw a i ai ah kyak ciah a mawng gui cu m’thein law ba goi sei, ngami naw hteit ne ghangpughang David am m’thein ba ci goi.

¹⁸ Cun ung phi hnüüp ät ung pami hta tumat naw hmuh gui ne, Absalom ah m’thein ba ci; cun ah kyasei ngami cu, ang ghit ah, Bahurim ung chang tumat ah im ah ng’thup ci goi. Ani ah im pei ah tuishawk om ci, acun ung lut ci goi.

¹⁹ Im ah chu naw tui shawk cu yuk uk ne, ak khan ah htang yuk phou ci, cun ah kyasei a u naw phi cun ung a i om ciah kä hmat ci.

²⁰ Absalom ah bawi gui cu im ah law u ne, hnumi cu ng’shi ci gui, “A hawi ang Ahimaaz la Jonathan?” Hnumi naw, “Tuinu hei kat pyi ci goi nei” cik ci. Chang gui naw shui ci gui, cun ung phi kä hmu goi ci gui, cun ah kyasei Jerusalem ah hteit ba ci gui.

²¹ Ngami ami hteh ba kawn ah Ahimaaz la Jonathan cu tui shawk ungka lut law ba ni ne, hteit ne, a mawng cu David am m’thein ci goi. Ngani naw, ani hnu ng’tuk püi ne, Ahithophela ah pawng m’htein cu m’thein ni neta, “Ang ghit ah tuinu nami hei kah vai” cik ci goi.

²² Cun ah kyasei David la a chang gui naw tuinu cu hei kat ci gui, khaw thai law sei hei kat yawp ci gui.

²³ Ahithophela naw ani ah m’shüm thein gui kä ami läk cu hmu neta, ang sela ung ng’cum ne, amät ah mang gaw ah hteit ba ci. Amät ah bi vai gui cu bi neta, amät ng’awk ne sik ci. Ani cu ami kyong ah phuh hmun ung m’cim ci gui.

²⁴ David cu Mahanaim pigaw ah gawk ci, cun yah ung Absalom la Israel gui cu Jordan tuinu kat ci gui.

²⁵ (Absalom naw Amasa cu Joab ah hnün ung gakap bawi ah tha ci. Amasa cu Ishmaelit chang Jether ah a hta ah kyak ci; anu cu Abigail, Nahash ah hta, Joab ah nu Zeruiah ah nau ah kyak ci.)

²⁶ Absalom la ak chang gui cu Gilead ung phung tu ne om ci gui.

²⁷ David cu Mahanaim ung gawk khäta, Ammon khaw Rabbah mang gaw ah ka Nahash ah hta Shobi la Lodebar ah ka Ammiela ah hta Machira la Gilead khaw Regelim ungka Barzillai ni naw hmu lawk ci gui.

^28-29 Ngami naw dawndai, m’dek khawk la ih phak gui la, David la ak chang gui ah ei vai; kiung, htang, m’htut den, m’va püm hlaw, k’bei, m’lui toi, khoitui, sei suk, singkhe la htome gui law püi ci gui. David la a chang gui cu cawi khai gui, gha khai gui, bung hmu ah bawngbai khai gui ciah ngami naw hmat ci gui.