2 SAMUEL 16 - Cho Bible Common Language 2016

David la Ziba

¹ David cu m’htung lai api phlän khäta, Mephibosheth ah changshäm Ziba awn ng’hmuk ci goi, ani naw la ng’hnih ung, m’htut pum phia goi, sapyit theih ket cawi phia, sing theih a cawi phia la sapyit tui than ah meh vun ng’ip gui taih ne law püi ci.

² Ghangpughang David naw, “Shin gui awn a i na cik khai ang?” cine ng’shik ci. Ziba naw, “La goi cu nang bawi mang la na kyongchang naw nami kium nak vai, m’htut la ak theih gui cu chang gui naw ami ei vai, sapyit tui cu ngami bungpuk ah ami bawngbai ung ami awk vai” cik ci.

³ “Hawi ang Mephibosheth, na bawi Saul ah atu” cine ghangpughang naw ng’shik ci. Ziba naw, “Ani cu Jerusalem ah om ci nei, Ani naw, tuhbäi Israel chang gui naw ka pughi Saul ah uknak khaw cu na pek ba khai gui” cik ci.

⁴ Ghangpughang naw Ziba am, “Mephibosheth ah ka phung phung cu nang ah ka ah kyak ci nei” cik ci. Ziba naw, “Kei cu nang ah changshäm nei, kei naw nang bawi mang cu angtäi sei ka ning yei nak khai nei” cik ci.

David la Shimei

⁵ David cu Bahurim ung gawk khäta, Saul ah mätyah ah kyak ciah Rera ah hta Shimei naw law ne hmu lawk ci. Ani cu alaw vai am nawm shai lawk ci.

⁶ Shimei naw David la a bawi gui cu lung awn vawi gui ci, David cu a chang gui la ngäng ci gui naw koi läi ah koi te ci gui.

⁷ Shimei naw ani taam ne a pyen cu, “Hteit ä! Hteit ä! Chang ngawn ci! Cawi m’sa ci!

⁸ Nang naw Saul ah uknak khaw na gut ci, Saul ah kyong chang akda na ngawn ah phäh ah Bawipa naw tuhbäi ning m’kyuk ci nei. Bawipa naw uknak khaw cu na hta Absalom am pe pyi ci nei, nang na dishum ci, chang ngawn ciah chang!” cik ci.

⁹ Abishai, Zeruiah nu nak ci naw, “Ka bawi mang, a i ah kyasei shin ah ui naw a ning shai nak ang? Kei naw hteit ne alu ka m’chün khai nei!” cik ci.

¹⁰ Ghangpughang naw Abishai la ana Joab am, “Shin cu nang ah bi ah kä kyak ci, ana shai nak cu Bawipa naw a shai vai ah am thein nei, a i ah kyasei shin ah abi cu ani naw ng’shi hning ci nei.

¹¹ David naw Abishai la a bawi gui ami van am, “Ka mät ah hta naw na ngawn khai ah tha nak ci nei; a i vai shin ah Benjamin chang gui ah phäh ah nami cäicat ang? A shai vai ah Bawipa naw am thein nei; cun ah kyasei amät nawng vä, am hni ah bi sä.

¹² Bawipa naw ka cümbawng nak cu hmat neta, ani ah shai she ah hnün ung hriham cu na pe hman khai nei” cik ci.

¹³ Cun ah kyasei David la a chang gui cu lam ung k’täi ne hteit ci gui. Shimei phi ngami awn a täng ah hteit ci, m’htung peem lam ung hteit ci; ani naw ng’plah gäk gäk ne, hteit ne, lungni m’dek ni awn vawi gui ci.

¹⁴ David la a chang gui cu bawngbai u ne, Jordan ung gawk neta ng’düm ci gui.

Jerusalem ah Absalom

¹⁵ Absalom cu Israel chang avan khah püi ne Jerusalem ah lut ci, Ahithophela phi hteit tuk ci.

¹⁶ Hushai, David ah ngaih gep ah teihpüi naw Absalom cu hmu neta,” Ghangpughang ghi ne ghing sä!

¹⁷ Absalom naw, “Na teihpüi David ung na bekhüt nak cu a i hawkcha ah ang akiak? A i ah kyasei ani awn a täng ah kä na hteh tu ang?” cik ci.

¹⁸ Hushai naw, “Kei a i ah ka kyak khai aw? Kei cu Bawipa naw a ghü la, shin ah chang gui, Israel chang avan naw a ghü ah chang täng ah ka om ci nei. Nang awn a täng ah ka om khai nei.

¹⁹ Ka bawi ah hta ah khut kä ka bi ung a u ah khut ka bi vai aw? Na pa ah khut ka bi ah mäih ah tuhbäi nang ah khut ka bik khai nei” cik ci.

²⁰ Cun kawn ah Absalom naw Ahithophela täng ah ng’hlat neta, “Tuhbäi shin ung mi om pyi ci, a i kami bi vai ah na na m’shüm thein gui khai ang?” cik ci.

²¹ Ahithophela naw, “Mang im m’htei khai gui ah ami nawng shüt gui ah napa ah chuba gui cu, hteit ne yaw gui ä. Cun ung napa naw a ga ah a ning k’bäi cu Israel chang avan naw hmat khai gui, ning läk ci gui phi akdäm ah thamah khai gui nei” cik ci.

²² Cun ah kyasei ngami naw mang im m’kiung khan ah Absalom ah phäh ah phung tuk ci gui. Cun kawn ah chang päng ah hmuh ah Absalom cu hteit ne, apa ah chubawk gui cu yaw gui ci.

²³ Ahithophela ah m’shüm thein nak phung cu Khanpughi ah thu cang ah cun yah ung dou man ci gui; David la Absalom ani nik hnih naw phi läk ci goi.