Biblia Todo Logo
Bib sou entènèt

- Piblisite -

2 SAMUEL 15 - Cho Bible Common Language 2016


Absalom naw Küknet vai a Pawng nak

1 Cun kawn ah Absalom naw yatha ni, ng’se gui ni amät ah phäh ah pawng püi ne, ngäng ciah chang hma-kip tha ci.

2 Ani cu khaw ngawi hta ah let law ne hteit ne mang gaw m’kawt lam ung ng’düi ci. A i yah ung phi ang cuhcan nak om ciah chang tumat mat law ne ghangpughang am, am thein hlü ah akiak ung, Absalom naw ana khü neta, a hawi ka a law ah ng’shik ci. Cun ah chang naw ani a i pakhui ungka lawk ciah am thein kawn ah,

3 Absalom naw, “Teng ä, thukhän cu nang täng ah om ci nei, cun ung phi nang ah cuhcan ah mawng ng’yak khai ah ghangpughang ah chang m’düih kä om ci nei.

4 Cun kawn ah ani naw am khah ba cu, “Kei cu suki ah ka kya hlü aih ci nei! Chang tumat ung cuhcan nak, thäh chah a om ah a kyak ung, kei ah a law vai, kei naw taga nak ka pek khai” cik ci.

5 Chang tumat naw ama ah m’khukdong ne, a chang m’sui law ah a kyak ung Absalom naw akut awn pang ne ng’ui ci ci.

6 Absalom naw taga nak gah vai ah ghangpughang ah lawk ciah Israel chang phung a cun ah cik ci, cun ah bi ne ani ah khan ah ami bekhüt nak gah ci.

7 Kum phli a lüng kawn ah Absalom naw ghangpughang David am, “Bawi aw, Hebron ah na hteh sak ä, ka shai tak cu k’pang ne, Bawipa ung ka bik khai nei.

8 Siria khaw Geshura ung ka om yah Bawipa ah ka shaitak cu, Jerusalem ah ani naw ana hteh püi ba ah akiak ung, kei naw Hebron ung ka khawihnah khai” ciah kyak ci.

9 Ghangpughang naw, “Ak dimgei ah hteit ä” cik ci. Cun ah kyasei Absalom cu Hebron ah hteit ci.

10 Cun ung phi ani naw Israel pakhui avan ung chang tüi ne a pyen sak gui cu, “Phyung heng ah ng’gin nami ng’yak ah akiak ung, ‘Absalom cu, Hebron ung ghangpughang ah kai ci nei’ cine nami m’lau vai!” ciah pyen ci.

11 Absalom naw khü gui sei, Jerusalem ungka naw ani awn a täng ah hteit tuk ci gui cu chang phia goi lawk ci; ngami cu ceng cham nak a i kä hmat ah ami van m’lung ni awn hteit tuk ci gui.

12 Khawihnah nak a dou thak yah ung Absalom naw Gilo gawnu ah Ahithophela am chang tüih ci, ani cu Ghangpughang David ah chang vai tumat ah kyak ci. Ghangpughang ceng cham hnu ng’tuk nak cu khüi ghat law ne, Absalom läk ciah chang cu da lawk ci.


Jerusalem ungka David Dawng ci

13 Thu ng’shäu ciah chang tumat naw David am, “Israel chang gui naw ami bekhüt nak cu Absalom täng ah m’hlat pyi ci gui nei” cine m’thein ci.

14 Cun ah kyasei David naw Jerusalem ung om ciah a bawi gui avan am, “Mikmi cu Absalom ah kut ung mi phyawn hlü ung ang ghit ah mi dawng khai nei! Yaang vä! Kä cun ung ani ang ghit ah gawk law ne, na hnim gui ne, mang gaw ung chang nü ngawn khai nei!” cik ci.

15 Ngami naw, “Ä, bawi mang aw, kei mi cu na pyen nak phung ah hteh vai ah kami om ge ci nei.

16 Cun ah kyasei ghangpughang cu a kyongchang gui avan la a bawi gui awn dawng ci gui. Mang im m’htei khai ah a chutuba hnumi gha bä nawng shüt ci.

17 Ghangpughang la a chang gui ami van cu mang gaw ungka hteit u neta, ak cawi bäih ah im ung ng’düm ci gui.

18 Abawi avan cu ani tawi ne ng’düi ci gui, bekhüt ne ani ngäng ciah chang gui cu ma ne, ama ung hteit ci gui. Gath ungka ani läk lawk ciah gakap phia chuk phi ma ne hteit ci gui.

19 Ghangpughang naw ami matawn Ittai am, “A i ah kyasei nangmi keimi awn a täng ah nami hteh tu ang? Ng’hlat ne hteit ba ne ghangpughang k’thai awn om vä. Nangmi cu a khaw hei chang gui, nami khaw awn ng’shawng ne cümbawng chang ah nami kyak ci.

20 Nang mi shin ung a shäng va nami om tuk khai, cun ah kyasei, a i vai kei naw, kei awn a täng ah nami ng’vak shüi khai ah ka ning ci gui vai ang? Kei a hawi ka hteh vai cu ka mät naw phi kä ka hmat ci. Hteit ba ne, nami khaw-chang gui cu hteh püi ba gui vä — Bawipa naw ning m’gein gui ne nangmi ung bekhüt sä” cik ci.

21 Ittai naw, “Ka bawi mang, kei naw Bawipa ah ming ung ng’gun ne ka pyen cu, kei cu na hteh nak päng ah angtäi sei ka hteit tuk khai, sih vai a kyak pui ung phi” cik ci.

22 David naw, “Bä khai, kaan ne hteit vä!” cik ci. Cun ah kyasei Ittai cu achang gui ami van la ami om püi gui awn hteit ci gui.

23 David ah hnu läk gui naw hteh ta gui u sei, chang gui cu kyap m’lau ci gui. Ghangpughang naw Kidron tui lawng cu kat sei ak chang gui naw kat tuk ci gui, ngami cu a täng ah bung täng ah hteit ci gui.

24 A cun ung taigüi Zadok cu om ci, ani awn a täng ah Levit chang gui phi om ci gui, ngami naw Thukhän M’küm cu kawt ci gui. Ngami naw cun cu hmoh u ne, chang avan mang gaw ungka, kä a luh law pha ah chuih kä chang ba ci gui. Taigü Abiatha phi a cu ah om tuk ci.

25 Ghangpughang naw Zadok am, “Thukhän M’küm cu la ne mang gaw ah hteh püi ba vä, Bawipa naw ana yei nak ah akiak ung hnüüp ät ung na law ba sak khai, a om nak ah hmun ung ka hmu ba khai.

26 Cun ung phi kei kä ana yei nak ah akiak ung — bäi khaai, ani naw am hni ah kei ah khan ah bi sä” cik ci.

27 Cun kawn ah Zadok ah hteit ne pyen ba ci, “Teng ä, na hta Ahimaaz la Abiatha ah hta Jonathan cu la ba goi ne mang gaw ah ding gei sei hteit ba vä.

28 Cun yah ung, nang mi ah ng’thu kä ng’yak pha ah chuih, tui hei kah nak ah bung ungka ning ngäng gui khai” cik ci.

29 Cun ah kyasei Zadok la Abiatha naw Thukhän M’küm cu hteh püi ne, Jerusalem ah hteit ba ne, om ci goi.

30 David cu Olive M’htung ah hang kai ne, thüi kyap ne, a pha hnak sut ne, thüi m’dang nak ah a lu shung ci. Ani läk ciah chang ami van phi ami lu shung ne thüi kyap ci gui.

31 Ahithophela cu Absalom ah küknet nak ung ng’dawn tuk ci nei, cine David am m’thein u khäta, ani cu taigü ne, “Na bä ni, Bawipa, Ahithophela ah m’shüm thein nak gui cu a khawlä ah kyak sak ä” cik ci.

32 David cu m’htung lai ah hang gawk khäta, a cu ah khawihnah nak hmun om ci, a cu ah ang ngaih u ah teih püi Archit chang Hushai cu, a sui shum ne, a lu khan ah m’dek khui tha ne, ani dou khai ah lawk ci.

33 David naw ani am, “Nang cu kei awn a täng ah na law ah akiak ung, na na kugam nak kä om khai.

34 Cun ung phi na na kugam nak hning cu, mang gaw ah ng’hlat ne hteit ba ne, apa ah khut na bi ah mäih ah tuhbäi ani ah khut bekhüt ne na bik khai pyen ne, Absalom am na m’thein vai. Cun kawn ah Ahithophela ah m’shüm thein nak a pek gui cu avan na hnu ng’tuk vai ah na bi vai.

35 Taigü goi Zadok la Abiatha cu aca om khai goi; ghangpughang ah mang im ung na ng’yak phung ngani am na m’thein goi vai.

36 Ngani ung ani hta goi Ahimaaz la Jonathan cu om ci goi, nami hmuh ng’yak phung avan m’cäi goi ne, ngani cu kei ah nami tüi law hning ci” cik ci.

37 Cun ah kyasei David ah teih püi Hushai cu mang gaw ah hteit ba ci, cun ung Absalom cu mang gaw ah ana gawk lawk ci.

Cho Bible Common Language © Bible Society of Myanmar, 2016.

Bible Society of Myanmar
Swiv nou:



Piblisite