2 SAMUEL 14 - Cho Bible Common Language 2016

Absalom A Law Ba Vai ah Joab naw Bik ci

¹ Joab naw ghangpughang David cu Absalom täng ah aktung ah ng’hlat lawk ciah hmat neta,

² ani naw Tekoa ah ka lunglang ciah hnumi cu tüi ci. Ani naw cun ah hnumi cu m’cäi ne, “Nang cu na thüi kyap ciah na ng’hlawk vai; Thüi kyah ung sui na sui vai, na lu kä na huih vai. Ak shou thüi kyap ciah hnumi ah mäih ah na om ih vai.

³ Cun kawn ah ghangpughang ah hteit ne, na pyen vai ah ka ning m’thein gui cu na pyen vai” cik ci. Cun kawn ah Joab naw ani am a pyen vai cu m’thein ci.

⁴ Hnumi cu ghangpughang ah hteit ne, m’dek ung m’khukdong ne, chang m’sui neta, “Na m’htei htang ä, ka Bawi mang!” cik ci.

⁵ Ani naw hnumi am, “A i ang na ng’ya hlü?” cine ng’shik ci. Ani naw, “Kei cu dukhaih ciah hmei nu nei, bawi aw, ka cei sih pyi ci nei.

⁶ Bawi aw, kei ung ka hta hnih om ci, hnüüp ät ung ngani cu loma ah ng’tuk ci goi, m’cha goi ci a u kä om ci, tumat naw tumat cu ngawn ci.

⁷ Tuhbäi, bawi aw, ka mäit yah gui avan naw kei cu na hnu ng’tuk püi u ne, ka hta cu ka ap gui vai ah na k’thäh ci gui, ngami naw a phäi a ngawn ah phäh ah ngawn ba khai gui. Ngami naw cun ah ami bi ung ka ng’ngaih u khüt cu ngami naw m’di khai gui, kei ah ka cei ah ming m’ghin khai ah htapa cu maih khai,” cik ci.

⁸ Ghangpughang naw, “Na im ah hteit ba ä, shin ah mawng cu kei naw ka m’htei khai nei” cik ci.

⁹ Ani naw, “Ka bawi mang, nang naw na bi phung, katnak cu kei ah kyongchang la kei naw kami k’chaw nak khai nei. Nang la nang ah mangkiang kyongchang cu ni nak om ci” cik ci.

¹⁰ Ghangpughang naw, “Tumat mat naw a ning cicum ah akiak ung, ani cu kei ah na law püi vai, ani naw kä ning yaica sak ba khai” cik ci.

¹¹ Hnumi naw, “Ka bawi mang, na bä ni, Bawipa na Khanpughi ah taigü ä, cun ung sik ciah ka hta ah phäh ah phu tuk khai gui ah pawng ciah ka mätyah gui naw, ka hta tumat cu kä ngawn u ne, dämduh pi ciah katnak cu kä bik khai gui nei” cik ci. David naw, “Kei naw ghing ciah Bawipa ung shai ka tak ci, na hta cu a i naw phi kä plawh kheih khai nei” cik ci.

¹² Hnumi naw, “Na bä ni, ka bawi mang, tumat hta bäng na pyen ba sak ä” cik ci. Ani naw, “Pyen ä” cik ci.

¹³ Hnumi naw ani am, “A i ah kyasei nang naw shin ah mäih ah chei shoh nak cu Khanpughi ah chang ah khan ah na bi ang? Nang naw na mät ah hta cu omk’tu khaw ah kaa, a law ba vai ah kä na ng’kiaa ci, cun ah kyasei nang cu tuhbäi na ng’thu awn na mät naw na mät na m’kyuk ci.

¹⁴ Mikmi mi van mi sik khai; mikmi cu m’dek ung kyak ciah tui ah mäih ah mi kyak ci, cun cu kaw ba ne kä gah ah kyak ci. Khanpughi naw phi aksi cu kä ghin ba sak ci. Cun ung phi ghangpughang naw omk’tu khaw ah ka chang lak nak ba vai ah lam cu hmu hning ci.

¹⁵ Tuhbäi, ka bawi mang, nang ah law ne ka ning thu püi ah a mawng cu chang gui naw na cicum ci gui, cun ah kyasei, ka mät ng’htau ne, nang ka ning thu püi ung, kei ah ka thäh cu nang naw na bik khai ciah ka ngaih u ci nei.

¹⁶ Kei ah ka ngaih cu, nang naw na ngai ne, ka hta la kei ngawn neta, Khanpughi naw a chang gui am apek ah khaw ungka na k’täm gui khai ah k’tha nak ci gui ah kut ungka na na hun khai.

¹⁷ Ka mät naw ka mät ka pyen ci bawi aw, na shaitak naw kei cu nak phyawn khai, a i ah kyasei ci ung ghangpughang cu Khanpughi ah khanchang ah mäih ah kya ne, ak ni, ak kaa cu m’khoi m’cha hning ci. Bawipa na Khanpughi cu nang awn a täng ah om sä!” cik ci.

¹⁸ Ghangpughang naw, “Kei naw tumat ka ning ng’shi khai, nang naw avan akcang na na m’thein vai” cik ci. Hnumi naw, “Ka Bawi mang, na ng’shi ä” cik ci.

¹⁹ Ani naw hnumi am, “Joab naw ning m’cäi naw?” cik ci. Hnumi naw, “Theing cim ci avan awn ka ng’gun ci nei, bawi mang aw, na na ng’shi kä ning m’shang ne hlawi nak vai ah lam kä om ci nei. Akcang ah a i bi vai la a i pyen vai ah na m’cäi cicu na bawi Joab ah kyak ci nei.

²⁰ Shin ah mawng avan ng’tän ne düng khai ah ani naw abi nei. Nang bawi mang cu Khanpughi ah khanchang ah mäih ah cüi vai ne, a mawng päng na hmat ci nei” cik ci.

²¹ Cun kawn ah ghangpughang naw Joab am, “Kei naw nang ah ng’yak hlü bi vai ah ka k’bäi pyi ci nei. Hteit ne changnong Absalom cu, shia ah law püi ba ä” cik ci.

²² Joab naw m’dek ung boup ne, David ah ma ah chang m’sui neta, “Khanpughi naw hriham ning pe sä, bawi mang aw! Tuhbäi nang naw kei na na yei nak ciah ka hmat ci nei, a i ah kyasei ci ung kei ah ng’thu m’kai cu nang naw nak püüi ci.”

²³ Cun ung ani cu tho ne, Geshura ah hteit ne Absalom cu la tu ba ne Jerusalem ah law püi ba ci.

²⁴ Ghangpughang naw thu k’bäi ne, Absalom cu mang im ung kä a om tu vai ah pyen ci. Ghangpughang naw, “Ani kä ka hmu hlük ci” cik ci. Cun ah kyasei Absalom cu amät ah im ung om ne, ghangpughang ah ma ah kä ng’dang phung ci.

Absalom cu David awn Ng’gei ba sak ci gui

²⁵ Israel khaw ung Absalom ah mäih ah kyom sang ne mingthang ci a u kä om ci; ani cu alu ungka naw a khaw ah khüt sei akat nak a i kä om ci.

²⁶ Ani ah lu cu shah aih ci, ng’sau law aih ne, gih law aih ne akiak ung kum ät ung hnü ät ci k’teiu ci. Mang im khin nak ung ami khin ung alu sam cu pit thum ah däm ci.

²⁷ Absalom ung a htapa thum la a hta hnumi tumat om ci, aming cu Tamar ah kyak ci, ani cu ang htei ah kyom ciah hnumi ah kyak ci.

²⁸ Absalom cu Jerusalem ung ghangpughang kä hmuh ah khaw kum goi ung om ci.

²⁹ Cun kawn ah Joab chang tüi ne, ani ah phäh ah ghangpughang ah a hteh tu pek vai ah k’thäh ci; cun ung phi Joab kä lawk ci. Absalom naw chang tüi ba mä ci, Joab naw ma ba mä ne kä lawk ci.

³⁰ Cun ah kyasei Absalom naw a changshäm gui am, “Teng vä, Joab ah lo cu kei na ak tawi ci nei, cun ung htang gui tho ci. Hteit ne mei awn m’khih vä” cik ci. Cun ah kyasei ngami cu hteit ne lo cu mei awn m’khih ci gui.

³¹ Joab naw Absalom ah im ah hteit neta ak thäh cu, “A i ah kyasei na changshäm gui naw ka lo ami m’khih ang?”

³² Absalom naw, “A i ah kyasei ci ung chang ka tüih law yah ung kä na law ah phäh ah kyak ci. Nang cu ghangpughang ah na hteh vai, kei ah ng’shi nak na m’thein vai ka ng’ya hlük ci, “A i ah kyasei kei naw Geshur hteh ta ne, shia ah ka law ang? Kei ah phäh ah cau ah ka om cu bä pi khai nei.” Absalom naw pyen ba ne, “Ghangpughang ka hmuh vai ah na na ci tu pek vai ah ka ng’ya hlük ci nei, kei ka hma nak a om ah akiak ung, ani naw kei cu na ngawn sä” cik ci.

³³ Cun ah kyasei Joab cu Ghangpughang David ah hteit ne Absalom ah pyen cu m’thein ci. Ghangpughang naw chang tüi ne Absalom cu khü ci. Absalom cu hteit ne, ama ah m’dek ung kawp ne, chang m’sui ci. Ghangpughang naw dou ne ng’ui ci.