2 SAMUEL 13 - Cho Bible Common Language 2016

Ammon la Tamar

¹ David ah hta Absalom ung kä ceimah ciah abe akiom om ci, aming cu Tamar. Ammon, David ah hta a hei tumat naw ani cu m’hni ci.

² Ani naw cun ah hnumi cu m’hni aih neta gaw ci, a i ah kyasei ci ung, ani naw cun ah hnumi hta a chu nak vai cu kä yäi ci; ani cu ng’lami hta ah kyasei pami awn kä hmuk khai goi ah ami tha ah kyak ci.

³ Cun ung phi ani ung akshe ah lunglang aih ciah ateihpüi tumat om ci, ang ming cu Jonadab ah kyak ci, ani cu David ah phäi Shammah ah hta ah kyak ci.

⁴ Jonadab naw Ammon am, “Nang cu ghangpughang ah hta ah na kyak ci, hnüüp ät, hnüüp ät ung thüi ci sei ka ning hmuk ci, Amawng a i ang a om?” cine ng’shik ci. Ani naw, “Kei naw Tamar ka m’hni ci, ani cu ka phäi m’shum Absalom ah be ah kyak ci.

⁵ Jonadab naw ani am, “Na gaw ciah ng’shei ne ih phak ung na ih vai. Na pa naw law ne a ning teng law ung, na pyen vai, ‘Ka be Tamar naw law ne ana tu m’bei vai ah na pyen pe ä, Shin ung ka hmuh nak ung om ne, ei vai ana pyan pek vai ah ka ng’ya hlük ci nei, cun ung ani naw amät ah ngaih ah na m’htei khai” cine m’cäi ci.

⁶ Cun ah kyasei Ammon cu gaw ciah ng’hlawk ne ih phak ung ng’yän ci. Ghangpughang David naw law ne teng law khäta, Ammon naw ani am, “Na bä ni, Tamar naw law ne m’htut na pyan law pe sä, shin ung ka hmuh nak vai ung, amät ah ngaih na m’htei law sä” cik ci.

⁷ David naw mang im kyong ah Tamar cu cük ne m’cäi ci, “Ammon ah im ah hteit ne, ei vai pyan pe sä.”

⁸ Ani naw hteit neta ih phak ung ng’yän sei hmuk ci. Ani naw m’htut den la ne, pyang ci, ani naw a hmuh nak vai ung om ne m’htut pyang ci. Cun kawn ah ng’shai ci.

⁹ Hlaw am ungka a ei vai ah lawh pek ci, cun ung phi kä ei ci. Ani naw, “Chang gui a hei ah hteit u sä” ci sei, a hei ah hteit yawp ci gui.

¹⁰ Cun kawn ah ani naw hnumi am, “M’htut cu shin ungka ih nak ung law püi ä, na mät naw na m’bei law ä” cik ci. Ani naw m’htut gui la ne, a om nak ah hteit ci.

¹¹ Ani naw m’htut pe law khäta, ani naw ven ne k’pang neta, “Kei awn ni ip khai” cik ci.

¹² Ani naw, “Ka nei, shin ah mäih akshe bi vai ah kä na güt ä! Shin cu kyih vai kyak ci!

¹³ A i hawkcha kei naw chang ah ng’lung ah ka lu ka m’dang tuba khai aw? Nang — nang cu Israel gui ah ng’lung ah ka thüi ng’a khai nei. Na bä ni, ghangpughang ah ma ah pyen ä, ani naw kei cu nang am ning pek khai nei” cik ci.

¹⁴ Cun ung phi ani naw kä ngai ci; ani cu hnumi ah ta gai tu ba ci kya ne, ani naw m’khüt ne, pyei ci.

¹⁵ Cun kawn ah Ammon naw ani cu ang htei ah thüi law nak ci. Ani naw a cita am hni ah ta tuhbäi thüi law na pi ci. Ani naw hnumi am, “Hteit ä!” cine pyen nak ci.

¹⁶ Ani naw, “Ka nei, kei na na k’täm cu tuhbäi na bi ah katnak ka ta she ka pi ci nei!” cik ci. Cun ung phi Ammon naw ani ah ng’thu cu kä ng’ngai ci;

¹⁷ Ani naw amät ah changshäm cu khü neta, “Shin ah hnumi kei ah pei ungka gawt ba ä! Akpung ah gawt neta shoh hei khai ä!” cik ci.

¹⁸ Changshäm naw akpung ah k’täm neta, shoh hei khai ci. Tamar cu akbe ah cüiche ah suinu sui ci. Cun yah ung kä ceimah phak ciah mang hta ng’la naw a sui ah kyak ci.

¹⁹ Tamar cu alu ung m’vut awn bu ne, a suinu k’teek ne, a hmai bawm ne, kyap ne dawng ba ci.

²⁰ Aphäi hta Absalom naw ani cu hmu neta, “Ammon naw ning ih-om püi ne ma? Na bä ni, ka be aw, ni sei kä na thüi vai. Ani cu na phäi m’shum ah kyak ci, cun ah kyasei a u am kä na m’thein vai,” cik ci. Cun ah kyasei Tamar cu Absalom ah im ah thüi ne amät hta om ci.

²¹ Cun ah a mawng gui cu ghangpughang David naw ng’ya neta, m’lung she ci.

²² Absalom naw Ammon cu abe Tamar ak pyei ah phäh ah thüi nak ci, ani naw ng’htau ah phi kä ng’htau püi ci.

Absalom ah Phu tuk

²³ Khaw kum goi lüng khäta Absalom cu Baala Hazora, Ephraim gawnu pei ung htomu teiu pawi bik ci. Ani naw ghangpughang ah hta gui ami van a cu ah khü gui ci.

²⁴ Ani naw ghangpughang David ah hteit neta, “Ka bawi mang, kei naw htome teiu pawi ka bik ci. Nang la na bawi gui law ne, cun ah ei awk pawi ung, nami ei aw lawk khai” cik ci.

²⁵ Ghangpughang naw, “Ka, ka hta, ‘Kei mi avan kami law ah akiak ung nang ah phäh ah bawngbai vai kyak khai” cik ci. Absalom naw ling ne khü ci, cung phi ghangpughang naw kä yum ne, Absalom cu a hteh ba vai ah pyen nak ci.

²⁶ Cun ung phi Absalom naw, “Cun ung phi, a i ah akiak ung phi ka phäi Ammon baw tah, na law sak vai! Ghangpughang naw, “Ani a i ah kyasei ang?” cine ng’shik ci.

²⁷ Cun ung phi Absalom cu ling aih sei, ak hnu ah David naw Ammon la a hta gui avan cu Absalom ah khü nak ah hteh sak gui ci. Absalom naw ghangpughang ah phäh ah aktung ah pyang tham neta,

²⁸ Achangshäm gui cu m’cäi gui ne, “Nami geing nak vai, Ammon naw akdäm a awk law ung, ka ning khü gui khai, nami ngawn vai, kä nami kyih vai. Kei naw ka mät ah bi vai cu ka bik khai. Nami nget vai, kä nami kut ng’gin vai!” cine m’cäi gui ci.

²⁹ Changshäm gui naw Absalom ah m’cäi cu läk u ne, Ammon cu ngawn ci gui. K’pawih ba ciah David ah hta gui ami van cu laa ng’cum u ne dawng ci gui.

³⁰ Ngami ami im lam ah ami hteh ba yah ung, David am ng’thu ami m’thein law cu; “Absalom naw na hta gui avan ngawn ci nei — tumat phi kä pawih ba ci nei!”

³¹ Ghangpughang cu düi lawk phäi ne, thüi ne a sui k’teek ne, m’dek ung amät yung phäi ci. Acun ung om ciah ak chang gui naw phi acun ah mäih ah ami sui k’teek ci gui.

³² Cun ung phi Jonadab, David ah phäi Shammah ah hta naw, “Ka bawi mang, ngami naw na hta gui avan kä ngawn ci gui, Ammon bäng nei a sih” cik ci. Nang naw Absalom cu teng neta, na pyen hning ci, Ani cu Ammon naw abe Tamar ak pyei ge ung tün ne, a shin ah bik khai ah m’lung na tu ge ci nei.

³³ Cun ah kyasei na hta gui ami van sik ci, ciah ng’thu cu kä na yum vai; Ammon bäng nei ami ngawn” cik ci.

³⁴ Cun yah Absalom cu dawng ci. Cun vai am gaw ngäng ciah gakap gui naw, chang akda cu Horonaim ah ka, khomhtung lam ung ana a vü u sei hmuk ci gui. Jonadab naw ghangpughang ah hteit ne, a hmuh gui cu m’thein ci.

³⁵ Jonadab naw David am, “Cän gui na hta gui nei, law ba ci gui, tuhbäi ka pyen ah mäih ah ngami nei.”

³⁶ Cun ah ng’thu a pyen yawp vai am, David ah hta gui cu gawk law ba ci gui; ngami cu m’lau ne kyap law u sei, David la a bawi gui phi ak tä ah kyap ci gui.

^37-38 Absalom cu dawng ne Geshura ghangpughang, Ammihud ah hta Talmai ah khaw kum thum om tuk ci. David cu a hta Ammon ah phäh ah akshou thüi sei ci;

³⁹ Cun ung phi Ammon ah sih am hnih law kawn ah A hta Absalom cu khaih na ne om dam ci.