2 SAMUEL 12 - Cho Bible Common Language 2016

Nathan ah Thu pyen la David ah Ng’yuu nak

¹ Bawipa naw prophet Nathan cu David ah tüi ci. Nathan naw ani ah hteit neta, “Pigaw ät ung om ciah chang hnih om ci goi; tumat cu bühmang ci, tumat cu dukhaih ci.

² Bühmang ci ung sei akda la htome akda om ci,

³ dukhaih ci ung htome hta tumat bäng ak hleih tu om ci. Ani naw akni ah m’htei ci, cun cu a im ung a hta gui awn a täng ah däm ng’ghaw lawk ci. Ani naw amät ah ei ungka m’bei ci, amät ah khap ung tui tu ci, ak coi ung k’pawm ci. Htome hta cu a hta hnumi ah mäih ah kyak ci.

⁴ Hnüüp ät ung büh mang ciah im ah chang tumat om law tuk ci. Büh mang ciah chang naw akhin am am bei vai ah amät ah sei me tumat phi kä ngawn hlük ci, ani naw dukhaih ciah htome hta cu la ne, ngawn ne shong ne akhin am m’bei ci,” cik ci.

⁵ David cu ng’büh mang ciah khan ah ang htei ah m’lung she neta, “Kei naw ghing ciah Bawipa ah ma ah ka ng’gun ci nei, cun ah bik ciah chang cu si sä!

⁶ Cun ah akshekha bik ciah chang naw a lak ah phäh ah ak phli ah a pek ba vai nei,” cik ci.

⁷ Nathan naw David am, “Nang cu cun ah chang nei. Shin cu Israel ah Bawipa Khanpughi ah ng’thu nei: “Kei naw nang cu Israel ghangpughang ah ka ning hmoh ci, Saul ah kut ungka, ka ning gung ci.

⁸ Kei naw ani ah uk ah khaw la ak chu gui phi ka ning pek ci; Israel la Judah avan ah ghangpughang ah ka ning pyang ci. Cun gui kä ang büh ah akiak ung kei naw cun ah a goi ah ka ning pe ba khai.

⁹ A i ah kyasei kei ah thumkhän kä na läk ang? A i ah kyasei shin ah akshe na bi ang? Nang naw Uriah cu ng’tuk nak ung na ngawn ci; Ammonit gui am na ngawn sak gui ci, cun kawn ah ak chu nak chu nak ci!

¹⁰ Tuhbäi, ang shon päng ung, na hta ng’shon amshah cu ng’sai ung sik khai, a i ah kyasei ci ung nang naw ka ng’thu kä na ngai ci. Uriah ah chu phi na gut ci.

¹¹ Kei naw ng’gun ne ka ning pyen nak cu, na mät ah kyong chang tumat mat naw, na mät ah khan ah khüikha nak a law püi vai ah kei naw ka bik khai. Kei naw na chu gui cu la ne a hei pami am ka pek khai, cun cu na hmuk khai, ani naw ngami cu khaw dei ung ng’yaw püi gui khai.

¹² Nang naw adüm ah katnak na bik ci, cun ung phi kei naw shin gui cu khaw dei ung Israel gui avan naw ami hmuh vai ah ka bik khai” cik ci.

¹³ David naw, “Kei naw Bawipa hnu ng’tuk püi ne katnak ka bik ci nei” cik ci. Nathan naw, “Bawipa ning m’gein sei ci, nang kä na sik khai.

¹⁴ Cun ung phi, a i ah kyasei ci ung, nang naw shin ah mäih bi ne Bawipa na thui ng’a sak ah phäh ah na hta sik khai” cik ci.

¹⁵ Cun kawn ah Nathan hteit ba ci. Bawipa naw Uriah ah chu la David ah ani hta ak hmaw cu gaw sak sei ana ah gaw lawk ci.

David ah hta sik ci

¹⁶ David cu ak hmaw a gai ba vai ah Khanpughi ah taigü ci. Ani cu ei api ah phi kä ei ci, amü päng akhan kyong ah hteit ba ne, amü pum k’cigem ung ng’yän ci.

¹⁷ A yung bawi gui naw hteh shi u ne, ami m’thawh ba vai ah k’tha nak ci gui, cun ung phi ani cu ma ne, a i phi ngami awn a täng ah kä ei awk ci.

¹⁸ Hnüüp chih lüng khäta ak hmaw cu sik ci, cun ah mawng ani am m’thein vai ah David ah bawi gui cu kyik ci gui. Ngami naw, “A hmaw a ghin yah ung pang, mikmi naw mi ng’htau püi ung David naw kä na m’shang gui ci. A hta ah sih ah mawng cu a i hawkcha mi m’thein khai ang? Ani naw amät cu amät naw a i ah baw ci hning ci nei!” cik ci gui.

¹⁹ David naw dümdüm ah ami ng’htau cu hmat gui neta, ak hmaw sik ciah hmat ci, cun ah kyasei ani naw, “A hmaw si ne ma?” cine ng’shi gui ci. Ngami naw, “Ä, sik ci nei” cik ci gui.

²⁰ David cu k’cigem ungka tho law ne, tui ng’si ne, alu huih ne, a sui sak ng’thong ci. Cun kawn ah ani cu Bawipa ah im ah hteit ne khawihnah ci. Mang im ah law ba ne, ei k’thäh ne ami lawh chang vai am ei ci.

²¹ A bawi gui naw ani am, “Shin cha ah na om cu keimi naw kä ka mi hmat hlawt ci nei, a hmaw a ghin yah ung ani ah phäh ah na thüi ci, ei kä na ei ci; cun ung phi a sih vai am tho law ne, ei na ei ci!” cik ci gui.

²² David naw, “Ä, ani a ghin yah ung kei cu ei hlawi ne, thüi ne ka kyak ci. Bawipa naw kei cu na chimgein ne, a hmaw cu kä sih sak khai ah ka ngai ci.

²³ Cun ung phi tuhbäi ani sik ci, a i vai ei ka hlawi ba vai aw? Kei naw a hmaw ka ghin ba sak hning khai ma? Hnüüp ät ung kei cu ani ah om nak ah ka hteit khai, cun ung phi ani cu kei ah kä law ba khai” cik ci.

Solomon Hta Ng’tüi Lawk ci

²⁴ Cun kawn ah David naw a chu Bathsheba cu m’cäi ci. Ani cu cun ah ak chu awn ng’yaw ba ni ne, pami ah hta lawk ci. David naw aming cu Solomon ah sui ci. Bawipa naw ak hmaw cu m’hni ci,

²⁵ ani naw prophet Nathan cu Thumkhän ne ak hmaw cu Jedidiah ah a ming sui sak ci, a i ah kyasei ci ung Bawipa naw ani cu m’hni ci.

David naw Rabbah Tu ne Khäm ci

²⁶ Cun yah ung Ammon gui ah mang gaw Rabbah cu Joab naw tu gäk gäk ci, cun cu näng nak vai ng’et lawk ci.

²⁷ Ani naw cun ah mawng cu chang tüi ne David am m’thein lawk ci, “Kei naw Rabbah cu ka tuk ci, tui ami pek nak cu ka khäm pyi ci.

²⁸ Tuh bäih k’pawih ba ciah gakap gui m’cut neta, mang gaw cu tu ne, na mät naw la ä, kei naw cän ah mang gaw näng ne ming nak vai kä ka ng’ya hlük ci nei.

²⁹ Cun ah kyasei David naw a gakap gui m’cut ne, Rabbah ah hteit ne, tu ne, khäm ci.

³⁰ Ammonit gui ah khanpughi Molech ah a gup ah alu ungka, ghui lukhu cu David naw lak ci, cun cu ghui pit gha lawk ci, pyülung phi akyong ah om ci. David naw pyülung cu la ne amät ah lukhu kyong ah tha ci. Ani naw mang gaw ung ami guh gui ah khawh ak chün phi lak ci.

³¹ Chang gui phi hlawh gui, k’tu shep, ghei shep la uk ng’shai cu ang ghit ah bi sak gui ci. Ani naw a hei Ammon gawnu gui ung chang gui phi acun ah bi sak gui ci. Cun kawn ah ani la a chang gui cu Jerusalem ah hteit ba ci gui.