2 SAMUEL 11 - Cho Bible Common Language 2016

David la Bathsheba

¹ Khaw kum ung khaw cing khaw a gawk law ung ghangpughang gui cu ng’tuk nak ah hteit ci gui, cun ah kyasei David naw Joab la a bawi gui la Israel gakap gui cu tüi gui ci; ngami naw Ammonit gui cu tu hnim u ne, Rabbah mang gaw cu khaai ci gui. Cun ung phi David amät cu Jerusalem ah om ci.

² Hnüüp ät ung khaw k’awi nu ung; David cu ang yän nak ungka tho law ne, mang im k’cih khan ah hang kai ci. Ani cu hteit shüi neta tui ng’si ciah hnumi cu hmuk ci. Ani cu ang htei ah kyom ci.

³ Cun ah kyasei chang tüi ne, cun ah hnumi cu a u ah a kyak ah ng’shi sak gui ci, ani cu Bathsheba, Eliam ah hta, Hittit chang Uriah ah chu ah kyak ciah hmat ci.

⁴ David naw chang tüi ne ani cu law püi sak gui ci; ngami naw law püi u khäta ani naw m’hni ne ih püi ci. (Ani naw a cha shui cu a tuhbäi hta theing sak ciah kyak ci.) Cun kawn ah ani cu im ah hteit ba ci.

⁵ Acun kawn ah, ani naw kämah ciah hmat law neta, chang tüi ne David am m’thein ci.

⁶ David naw chang tüi ne Joab am ng’thu am khäh cu, “Hittit chang Uriah cu na tüih law vai nei.” Cun ah kyasei Joab naw ani cu David ah hteh sak ci.

⁷ Uriah law khäta, David naw, Joab la gakap gui ami gai ah mawng, ami ng’tuk a i hawkcha a kyak ah mawng cu ng’shik ci.

⁸ Cun kawn ah ani naw Uriah am, “Na im ah hteit ba ne a shäng na ng’düm vai” cine pyen nak ci. Uriah hteit ba sei, David naw a im ah phäh ah pe tak ci.

⁹ Cung phi Uriah cu a im ah kä hteit ba ci, ghangpughang ngäng ciah chang gui awn mang im kawt ung a täng ah ip tuk ci.

¹⁰ Uriah a im ah kä a hteh ba cu David naw ng’ya neta, ani naw ng’shik ci, “Nang ak shou kä na om nak ungka tuhbäi na law ba ci maw, a i ah kyasei na im ah kä na hteh ba ang?” cik ci.

¹¹ Uriah naw, “Israel la Judah chang gui cu a shaw nak ah ng’tuk bik ci gui, thukhän m’küm cu ngami awn a täng ah om ci; ka gabawi Joab la a bawi gui cu khaw häu ung om ci gui. A i hawkcha ah kei ka im ah hteit ba ne, ei ne aw ne ka chu awn ip düt ne ka om khai aw? Theing cim ciah avan awn, cun ah mäih kei naw kä ka bik khai cine ka ng’gun ci nei!” cik ci.

¹² Cun ah kyasei David naw, “Tuh ngawi mü ne shia om toä, ngawi ung ka ning tüi ba khai” cik ci. Cun ah kyasei Uriah cu, cu hnüüp la a ngawi ung Jerusalem ah om tuk ci.

¹³ David naw ani cu ei awk vai ah khü neta awk tat khai ah tu ci. Cun ung phi cu mü ah Uriah cu a im ah kä hteit ba ne, mang im ngäng nak ah kyong, a ih phak ung ip ci.

¹⁴ A ngawi ung khaw ngawi David naw Joab am ca guk neta Uriah am hteh püi sak ci.

¹⁵ Cun ah ca ung, “Uriah cu aktung ah ng’tuk nak pi k’bäih ung hma ne na tüih vai, cun kawn ah gakap gui na ng’hlah sak gui vai, ani ami ngawn vai ah na bi vai” ciah guk ci.

¹⁶ Cun ah kyasei Joab naw mang gaw ak haai yah ung, ani naw ga da pi k’bäih ciah a hmat nak täng ah Uriah cu tüi ci. Ga gakap gui cu mang gaw ungka lut law ne, Joab ah gakap gui cu tu lawk ci gui. David ah bawi amshah gui cu ngawn gui ci gui, Uriah phi ngawn ci gui.

¹⁷ Ga gakap gui cu mang gaw ungka lut law ne, Joab ah gakap gui cu tu lawk ci gui: David ah bawi amshah gui cu ngawn gui ci gui, Uriah phi ngawn ci gui.

¹⁸ Cun kawn ah Joab naw a chang tüi ne ami ng’tuk ah mawng cu David am m’thein ci,

¹⁹ ani ak chang tüih am cäi cu, “Nang naw ng’tuk ah mawng avan ghangpughang am na m’thein kawn ah,

²⁰ Ani cu m’lung she neta ning shi hman khai, “A i ah kyasei mang gaw et aih ne, nami tuk gui ang? Ngami naw k’pang ungka naw ning kap gui hning ciah kä nami hmat ci ma?

²¹ Gideon ah hta Abimelek ami ngawn cu kä nami shüm ba ne ma? Thebez pigaw ung hnumi tumat naw k’pang khan ah kai neta sum lung awn vawi ne a ngawn ah kyak ci nei. A i ah kyasei k’pang nami k’et aih ang? Cun ah ghangpughang naw a ning shi ah akiak ung “Na bawi Uriah phi ngawn ci gui nei, cine na m’thein vai” ciah kyak ci.

²² Cun ah kyasei chang tüih cu David ah hteit ne Joab naw a pyen vai ah am cäi gui cu m’thein ci.

²³ Ani naw, “Kami ga gui cu keimi ah ta khüi ghat pi ci gui, ngami cu mang gaw ungka lut law ne na tuk püi gui ci gui, cun ung phi mang gaw m’kawt ung khüt ne tu ne kami k’täm ba gui ci.

²⁴ Cun kawn ah ngami naw pang ung om neta m’la awn na kap gui ci gui, nang bawi mang ah na bawi amshah cu ngawn ci gui; na bawi Uriah phi ngawn ci gui” cine m’thein ci.

²⁵ David naw chang tüih am, “Joab a k’thamah vai, kä am lung k’si en vai ah na m’thein vai, ng’tuk nak ung a u sik khai cicu tuh güt ung kä nami pyen hning ci. Na m’thein ba vai, khüi ghat pi ne mang gaw nami tuk vai, nami khäm vai” cine m’cäi ci.

²⁶ Bathsheba cu a cei ami ngawn ng’ya neta ang htei ah thüi ci.

²⁷ A thüi api pyei khäta, David naw chang tüi ne, mang im ah law sak ci; ani cu ak chu ah kya law ne pami ah hta lawk ci. Cun ung phi David ah bi cu Bawipa naw kä yei nak ci.