2 SAMUEL 10 - Cho Bible Common Language 2016

David naw Ammonit gui la Sirian chang gui Hnim gui ci

¹ Shou hta khäta Ammon ghangpughang Nahash cu si sei, a hta Hanun cu ghangpughang ah kya lawk ci.

² Ghangpughang David naw, “Kei naw bekhüt ne khawt nak cu Hanun ung ka bi khai, cun cu apa Nahash naw kei ung abi ah mäih ah kyak ci” cik ci. Cun ah kyasei ani naw chang tüi ne, ak büi nak cu pyen ci. Ngami cu Ammon ah gawk law u khäta,

³ Ammonit ng’vai gui naw ami ghangpughang am, “Shin cu David naw napa am taam nak ah, nang a ning k’büi nak ah chang gui a tüih law ah na ngai ne ang? Cun ah kä kyak ci! Ani naw a tüih law gui cu mang gaw a tuk nak vai ah ng’dät-khai gui ah kyak ci nei, cun ah kyasei ani naw na khäm gui hning ci nei!” cik ci gui.

⁴ Hanun naw David ah ng’shä gui cu k’pang gui ne, ami m’gawng mu avang ci k’teiu pe gui ne, ami sui gui ami lengbe ung khüt khai ah ah pe gui neta k’täm ba gui ci.

⁵ Ngami cu ang htei ah ng’a ne, ami im ah hteit ba ci gui. Cun ah a mawng gui cu David naw ng’ya neta, ami m’gawng mu kä ah sei ba pha ah chuih kä law ba ne, Jerikho ah ami om vai ah thu m’khäh gui ci.

⁶ Ammonit chang gui naw David cu ami ga ah kyak khai ah ci pyi ci gui ah hmat u neta, Bethrehob la Zobah ungka Sirian gakap phia phia goi, Tob ungka chang phia phia la m’ku, Maakah ghangpughang la a chang phia gha cu ng’vat ci gui.

⁷ David naw cun cu ng’ya neta, Joab cu gakap avan awn ana tu gui khai ah tüi ci.

⁸ Ammonit chang gui cu ng’kaan law u ne, Rabbah ami mang gaw m’kawt ung ng’mah ci gui. Ahei gui ah kyak ciah Sirian gui la Tob la Maakah ah ka chang gui cu khaw dou ng’piäu ung om ne ng’mah ci gui.

⁹ Ga gakap gui naw ma täng la hnu täng ung tu lawk khai gui ah ami pawng cu Joab naw hmuk ci, cun ah kyasei ani naw Israel gakap akbä pi gui cu ghü neta Sirian gui ma nak khai ah om sak gui ci.

¹⁰ K’pawih ciah a gakap gui cu anau Abishai ah ka ah Ammonit gui ma nak khai gui ah tha gui ci.

¹¹ Joab naw ani am, “Sirian gui naw na hnim u sei na hmuh ah akiak ung dawng law ne na na gun law vai, Ammonit gui naw ami ning hnim ah akiak ung kei naw law ne ka ning gung lawk khai.

¹² Khüi ghat ne nami thamah vai! Mi chang gui la mi Khanpughi ah mang gaw gui ah phäh ah k’tha na ne mi ng’tuk khai nei. Bawipa naw ang yak hlü ah bi bik khai nei!” cine m’cäi gui ci.

¹³ Joab la a chang gui cu ng’tuk vai ah ng’phäi law u khäta, Sirian gui cu dawng ci gui.

¹⁴ Ammonit gui naw Sirian gui ami dawng cu hmu u neta Abishai cu ng’hlah ta ne, dawng ne mang gaw kyong ah gawk ba ci gui. Cun kawn ah Joab cu Ammonit gui awn ng’tuk vai ah a hteh nak ungka, ng’hlat ne Jerusalem ah hteit ba ci.

¹⁵ Sirian gui naw Israel gui naw ami näng gui cu hmat law u neta, ami gakap gui avan khü ne k’bum ba ci gui.

¹⁶ Euphratis tuinu ah a kiangtäng ah om ciah Sirian gui ah Ghangpughang Hadadezer naw chang tüi sei, ngami cu Helam ah law u ne, Zobah ah Ghangpughang Hadadezer ah gakap bawi Shobach ah ka ah om ci gui.

¹⁷ David naw cun cu ng’ya neta, Israel gakap gui cu k’bum gui ne, Jordan tuinu hei kat ne, Sirian gui naw ani hmai na ne, ami ng’mah nak Helam ah gawk ci gui. Cun ung tün ne ng’tuk ci gui.

¹⁸ Israel gui naw Sirian gakap gui cu k’täm ba ci gui. David la a chang gui naw Sirian yatha mawngtu phia chih la ng’se cu gakap phia phia phli-kip ngawn ci gui, ami ga gui ah gabawi Shobach phi k’phleim ci gui, ani cu ng’tuk nak ung sik ci.

¹⁹ Israel gui naw ami hnim gui cu, Hadadezer ah chang ah kyak ciah ghangpughang gui naw hmat law u neta, Israel gui awn dimdeeih nak bi u ne, ami chang ah kya lawk ci gui. Sirian gui cu Ammonit gui ami kuram ba gui vai ah kyi lawk ci gui.