2 SAMUEL 1 - Cho Bible Common Language 2016

Saul ah Sih ah Mawng David naw Ng’shikca Gui ci

¹ Saul a sih kawn ah David cu Amalek gui näng gui neta, law ba ne Ziklak ah hnüüp goi om ci.

² A ngawi ung Saul ah phung ung ka chang nong tumat gawk lawk ci. A thüi am dang nak ah, a sui gui cu shum ne, alu ung m’dek awn bu ci. Ani cu David ah hteit ne m’dek ung bop ne chang m’sui ci.

³ David naw, “A hawi ka na lawk ci ang?” cine ng’shik ci. Ani naw, “Israel gui ah phung ungka, ka phyawng lawk ci ne” cik ci.

⁴ David naw, “A i ah kyak ciah na m’theing ä” cik ci. Ani naw, “Kami gakap gui cu ng’tuk nak ungka, dawng yawp ci gui, kami chang gui akda ngawn gui ci gui, Saul la a hta Jonathan phi ngawn goi ci gui” cik ci.

⁵ “Saul la Jonathan ah sih cu a i hawkcha ah nang na hmat ang?” cine David naw ng’shik ci.

⁶ Ani naw, “Kei cu Kilboa M’htung khan ah ka hang gawk düt ci. Saul cu ak htei ung ng’düh sei ka hmuk ci. Yatha ng’cum ci la ng’se ung cun ci gui naw khaai ci gui.

⁷ Ani cu ng’hlat law ne, na hmu neta, na khü sei, ka äi ci.

⁸ Ani naw nang a u ang cine, na ng’shi sei, kei Amalek chang nei cine ka m’thein ci.

⁹ Cun kawn ah ani naw, “Law ne na ngawn law ä! Kei cu aktung ah ka leim ci, ka sik khai ah kyak ci” cik ci.

¹⁰ Cun ah kyasei kei naw hteit ne, ani cu ka ngawn ci, a i ah kyasei ci ung ani cu a kyuk nak ung sik khai ah kei naw ka hmat ci. Kei naw alu ungka a lukhu la akut ungka ak htau nak cu la ne, ka law püi ci nei bawi aw” cik ci.

¹¹ David naw thüi ne a sui cu k’teek ci, ak chang gui ami van a cun ah kyak ci gui.

¹² Ngami cu thüi kyap u neta, Saul la Jonathan la Israel chang, Bawipa ah chang gui ah phäh ah mühun güt ei hlawi ci gui, a i ah kyasei ci ung, ng’tuk nak ung akda aih ami ngawn gui ah phäh ah kyak ci.

¹³ David naw cun ah thu pyen lawk ciah chang nong cu ng’shik ci, “Nang a hawi ka ang?” Ani naw, “Kei cu Amalek chang nei, cun ung phi nang ah khopäng ung ka om ci” cik ci.

¹⁴ David naw ani am, “Khanpughi naw a ghü ah ghangpughang ngawn vai ah a i hawkcha ah na gäng tha lawk ci ang?” cik ci.

¹⁵ David naw akchang tumat khü neta, “Ngawn ä!” cik ci. Cun ah chang naw Amalek chang cu tu ne ngawn ci.

¹⁶ David naw, Amalek chang am, “Shin ah na kyak vai cu na mät naw na law püi nei. Bawipa naw ghangpughang ah a ghü ah chang, na ngawn ciah pyen ne, na ng’kia cu na mät naw na mät na m’kyuk ah kyak ci nei” ci nak ci.

Saul la Jonathan ah Phäh ah David ah Ng’äi Kyah

¹⁷ Shin ah ng’äi kyah cu Saul la a hta Jonathan am David naw ang äi ah kyak ci.

¹⁸ Cun ah ng’äi cu Judah chang gui am ami m’thei gui vai ah k’bäi gui ci. (Shin cu Jashar ca uk ung ami guk ah kyak ci.)

¹⁹ “Israel m’htung gui ah khan ah mi ng’vai gui cu sik ci gui nei! M’gäi pi ciah mi bawi gakap gui cu yung kyak ci gui nei!

²⁰ Shin ah mawng cu Kath khaw ung la, Ashkelon lam gui ung Kä nami shäu vai. Philistin hnumi gui yei khai ah kä nami bi vai; Khaw ng’yo ah hta hnumi gui kä nami yei sak gui vai.

²¹ Kilboa khaw m’htung gui ah khaw kä aa en sä, khlüitui kä baw en sä; ami lou ung angtäi ah khaw käu sä! A i ah kyasei ci ung chang m’gäi ah shawi gui cu acun ung thüi ne yung kyak ci; Saul ah shawi phih situi awn kä hluk ba nei.

²² Jonathan ah li cu sih nak ah kyak ci, Saul ah khim ung m’gein nak kä om ci, Hlüngtai ci tu hnep ne, ga phi ngawn ci.

²³ Saul la Jonathan cu cäi vai ah ng’khawt ni ne; a täng ah ghing ne, a täng ah sik ci goi; Ngani cu ghui langta ah yangkhai pi ne, phongkawng ah gai pi ci goi.

²⁴ “Israel hnumi gui Saul ah phäh ah thüi kyap vä! Ani naw bämang päsui, ning m’sui gui ne, ghui la pyü lung ning m’awi gui ci.

²⁵ “M’gäi ciah gakap gui kyuk ci gui, ng’tuk nak ung ami ngawn gui. Jonathan cu khaw ng’yung ah si ne ng’yän ci.

²⁶ “Nang ah phäh ah ka thüi ci nei, ka phäi Jonathan; Nang naw a i hlawk ah na na m’hni ci ang? Nang ah na m’hni cu i hlawk ah cäi vai ah kyak ci ang, Cun cu hnumi ah m’hni ah ta bä pi ci nei.

²⁷ “M’gäi ciah gakap gui cu kyuk ci gui, ami li khim cu nawng shüt u sei, akholä ah kyak ci nei.