2 PETER 3 - Cho Bible Common Language 2016

Bawipa A Kyum Law Vai ah Mawng Shaitaak

¹ Teihpüi gui aw, shin ah ca cu ak hnih vei nak ka ning guk law gui ah kyak ci nei. Shin ah caguk ani nik hnih ung, shin ah mawng gui cu shüm ba ne, nami m’lung ngaih theing sei,

² cau pui profet theing gui ah ng’thu pyein la Hunbawipa naw ang düihpüi gui awn a ning peit gui ah thu khän cu nami shum vai ah ka ng’ya hlük ci nei.

³ Ak htük ah, ak hnubäih hnüüp ung, amät ah ng’yak hlü düt ah ghing ciah chang gui dang lawk khai ci cu, nami hmat vai nei. Ngami naw nangmi cu ning gaih m’gin gui ne,

⁴ “Ani lawk khai ah shaitak ci, kä law ne ma? A hawi ang ani? Kami pupa gui cu si yawp pyi ci gui, cun ung phi a päng avan cu, khomdek ang tüi law sang ungka ah mäih bä ah om ci gui nei,” ci ne ning kyak na gui khai gui.

⁵ Khanpughi naw khan mawpi la khomdek cu ang thu küi awn atüi pian la khomdek cu tui ungka tui awn apian ah mawng,

⁶ khomdek phyim cu tui bä awn am di ah mawng gui cu, ngami naw a guih ah m’hnih he ci gui.

⁷ Cun ung phi khawnmawpi la khomdek cu mei awn kä am di pha ah chuih, Khanpughi ah ng’thu bä awn om lä khai. Khanpughi kä yum ci gui ng’thumcha ne am di gui hnüüp ung ngami cu dimaih khai gui.

⁸ Cun ung phi teih püi gui aw, tumat kä nami m’hnih vai cu, Bawipa ung kho hnüüp ät la khokum phia-ghaa cu ang lak kä om ci, a täng ah kyak ci.

⁹ Chang amshah ah ngaih ah mäih ah, Bawipa cu a shaitaak ah mäih ah bi abi vai ah kä shokshü ci, chang tumat hta phi kä dimaih ne, chang avan cu cheishoh nak ungka ami ng’hlah law ba vai ah ng’ya hlü ne, hnimgei ne om ci.

¹⁰ Bawipa ah hnüüp cu m’guk ei a law ah mäih ah gawk lawk khai nei. Cun ah hnüüp ung khanmawpi cu viik ne ng’pyaang ne maih khai, khankho pumsa avan mei naw m’khih sei dimaih yawp khai, m’dek la m’dek khan ung om ci avan kä om ba khai.

¹¹ Cun ah a päng avan a dimaih yawp ah a kyak ung, nangmi cu a i mäih ah chang ah kya ne nami om khai ang?

¹² Khankho cu mei naw m’khih sei dimaih ne, khankho pumsa a phiäp nak vai ah Khanpughi a hnüüp gawk lawk khai cine, k’tha nah ne nami ngäng yah ung, nami ghin nak cu theing cim sak ne Khanpughi ah nami ng’ap vai nei.

¹³ Cun ung phi Khanpughi ah shaitaak ah ng’düng nak ah hmun ah om nak, khankho thai la khomdek thai cu, mi ngäng ci nei.

¹⁴ Cun ah kyasei teihpüi gui aw, cun ah hnüüp cu nami gin yah ung, Khanpughi ah ma ah, theing ne shetkat nak kä om sei, dimdeeih nak a om vai ah nami tha nak vai nei.

¹⁵ Kami nau Paul naw Khanpughi ah peit ah cüivai nak awn ca a ning guk law gui ah mäih ah Bawipa ah hnimgei nak cu, hun nak nami gah vai ah lam a ning m’awng peit gui ah mawng cu, nami hmat vai nei.

¹⁶ Shin cu Paul naw a guk ah ca ung ang dang sak ah mawng ah kiak ci. Cun ah ca ung kä hmat yäi vai amshah om ci. Kä hmuhmat la lawklak ciah chang gui naw ang lihlat ah, khei ne pyein ci gui. A hei cacim gui cun phi acun ah mäih ah m’ki m’hlat u sei, ami mät ah dimaih nak vai ah kyak ci.

¹⁷ Cun ung phi teihpüi gui aw, shin ah mawng cu nami hmat pyi ah kiak ci. Chang shekha gui ah lam k’she ung kä nami läk en tu vai ah, khäng sei nami ng’düih nak ungka kä nami yung kyak en vai ah geing nah ne nami om vai nei.

¹⁸ Mi Hunbawi Jesuh Khrit ah m’gein nak la hmuhmat nak ung nami ng’ghotai law pi vai nei. Cun ah Bawi ah bämang nak cu tuhngawi tün ne ngawi yä om sä. Amen.