2 PETER 1 - Cho Bible Common Language 2016

¹ Simon Peter, Bawi Jesuh Khrit ah ak changshäm la ang düihpüi naw, Mi Khanpughi la Hunbawipa Jesuh Khrit ah peit ah, mikmi ah mäih ah küikyang ciah yum nak om ciah chang gui-am ca ka guk law ci nei.

² Khanpughi la Hunbawipa Jesuh Khrit cu hmuhmat cüivai nak awn, m’geinsei nak la dimdeeih nak cu na mi khan ah kümbe ne om sä.

Khanpughi ah Ng’khü nak La Ghü nak

³ Khanpughi naw akcang ah yum nak awn mi ghin vai ah, khankho hlüngtai nak awn mi ng’yak hlü phung cu, na pe gui ci, cun cu Bawipa hmuhmat Lulang nak awn, amät ah bämang nak la nikiom nak mi gah vai ah na khü gui ciah Bawipa ung a na peit gui ah kiak ci.

⁴ Acun ah ang htei ah hlüngtai ci la küikyang ciah m’shumphyuk shaitaak cu na pe gui ci. Cun ah m’shumphyuk nak awn nang mi cu, khomdek khan ah shetkat dimaih nak cu phiawn nah u ne, Khanpughi ung nami ng’yung tu ba ci.

⁵ Cun ah kyasei nami yum nak cu nikiom nak awn, nami nikiom nak cu Lulang nak awn,

⁶ nami Lulang nak cu htingling nak awn, htingling nak cu khüighaat nak awn, khüighaat nak cu Khanpughi ung bä nak awn,

⁷ Khanpughi ung bä nak cu ng’phäi nau nak awn, ng’phäinau nak cu yum hni nak awn akümbe vai ah nami tha nak pi bäih vai nei.

⁸ Cun ah hlü ci gui cu nangmi ung dämda ne a om ah a kyak ung, a cun gui naw Bawipa Jesuh Khrit nami hmuhmat Lulang nak ung ghing ne ning hnünthawh sak gui sei akcang ah awngtang nak phi om khai.

⁹ Cun ung phi cun ah hlü nak gui kä om ciah chang cu, ak tawi ah ngai ne, a i kä hmuk ci. Ani cu ayanä ashetkat nak ung kaa theingcim nak agah cu kä shüm ba ciah kyak ci.

¹⁰ Cun ah kyasei phäinau gui aw, nangmi Khanpughi naw khü ne ning ghü gui ciah, angtäi sei ngaih gep ne, nami tha law nak pi täi ah a kyak ung, a i sang ung phi nami yum nak cu kä nami ng’hlah ta hlawt khai nei.

¹¹ Cun ah kyasei nangmi cu, Hunbawi Jesuh Khrit ah ng’täi ciah Uknak Kho ung luh nak vai ah ng’düng nak cu nami gah khai nei.

¹² Cun ah kyasei nangmi cu shin ah a mawng gui hmuhmat ne, nami yum nak ah thu thuuk ung nami khäng htek pyi ciah a kyak pang ung phi, kei naw angtäi sei ka ning m’shümthein ba gui khai nei.

¹³ Kei ghing ne ka om yah ah chuih shin ah a mawng gui ka ning m’shümthein ba gui lä khai ah ka ngai ci nei.

¹⁴ Kei cu kä shou pha sei, shin ah sheka thei ciah pumsa cu ka nawng shüt lawk khai ah ka hmat ci nei, cun cu Bawipa Jesuh Khrit naw ang dang ah anam thein pyi ah kyak ci.

¹⁵ Kei ka sih kawn ah shin ah a mawng gui cu, nami shüm ba lä vai ah k’tha na pi bäih ne ka bik khai nei.

Bawi Khrit ah Bämang Nak Hmuk Ciah Saksi Gui

¹⁶ Bämang nak awn Bawipa Jesuh Khrit a kyum law ba vai ah mawng ning m’thein gui cu, kami mät ah ngaih-tüh ah kami pyein ah pumah awi ah kä kyak ci. Keimi cu ani ah hlüngtai nak kami mik awn kami hmuk ciah chang ah kami kyak ci.

¹⁷ Pa Khanpughi naw m’tamkhah nak la bämang nak a peit yah ung keimi phi kami om ci, cun sang ung hlüngtai säih ciah bämang nak awn ng’shan lawk ciah thu k’aw cu, “Shin cu kei ah Htapa nei, ani awn kei ka yei ci nei,” ciah kyak ci.

¹⁸ Cun yah ung keimi cu khomhtung theing ung Bawipa awn a täng ah om u ne, khan mawpi ah kaacun ah k’aw cu kami ng’yak ci.

¹⁹ Cun ah kyasei keimi naw profet gui ah ng’shäu ah ng’thu cu kami yum law pi ci. Cun cu nami ngaih-tüh kheng vai nei, a i ah kia sei ci ung cun cu hmüp khui ung mei m’däi ah mäih ah, kho a thaih law güt nami m’lung kyong ung khäng ciah thaihke aisi ah kiak ci.

²⁰ Cun ung phi cacim cu a u chang naw phi amät ah ngaih ah kä k’phlan thei ci, cicu nami shüm vai nei.

²¹ A i ah kyasei ci ung, a i thu thuuk phi chang ah ng’yak hlü düt ah dang lawk ciah kä kyak ci, Mumcha Theing ah lamshäm nak awn vah chang gui naw, Khanpughi ah thuthuuk cu ami pyein ah kiak ci.