2 KORIN 8 - Cho Bible Common Language 2016

Khritha ah Peittaak Nak

¹ Phäinau gui aw, Macedonia Kho ah Khrithabum gui am Khanpughi naw am gein nak gui ah mawng cu ka ning m’thein gui hlük ci nei.

² Ngahmi cu yaica nak ak nui ah aut ci gui. Cun ung phi ang htei ah yeikyai u ne, ang htei ah ami pyamthaam pang ung phi, peit taak nak ung, ng’khailang aih ci gui.

³ Ngahmi naw ami peit hning ah kawn ah hang lawn pui khai ah ami peit cu, kei naw akcang ah hmuh ne ka pyein ci nei.

⁴ Ngahmi naw Judea kho ah Khanpughi ah chang gui cu m’htei tu hlük ci gui, cun ah kya sei keimi ah k’thäh law laih laih ci gui.

⁵ Ngami naw keimi ah ngaih yatah däm pi khai ah pe hning ci gui. Ak htük bäih ah ngami cu Bawipa ung ng’ap ci gui, cun kawn ah khanpughi ah ng’yak hlü ah keimi ung ng’ap ci gui.

⁶ Shin ah bi tün ne bi lawk ciah Titus naw, shin ah m’hni nak ah bi cu, ang pyi ung khüt sei a ning bi püi gui vai ah kami m’cäi ci nei.

⁷ Nangmi cu yum nak, thu thei nak, hmuhmat nak, m’hteihtang hlü nak la keimi nami nam hni nak gui ung, nami bühmang ciah kyasei shin ah m’hni nak ah bi bi nak ung khailang peittaak nak phi m’dang vä.

⁸ Shin cu ka ning khänkhi gui ah kä kyak ci. Chang gui ah peittaak m’hteintang nak ah mawng ka ning m’thein gui cu nangmi ah m’hni nak akcang, ah hmat vai ah phäh ah kyak ci.

⁹ Nangmi naw mi Bawipa Jesuh Khrih ah m’gein nak cu nami hmat ci; Ani cu bühmang ciah Bawipa ah a kyak ung phi, nangmi ah hmawk ah pyam ci. A pyaamthaam nak awn ning bühmang sak gui ci.

¹⁰ Ka mät ah ngaih ka pyein hlü cu, tuh kum tün ne nami bi cu, tuhbäi nami m’khüüp ung bä pi khai. Nangmi naw yum nak awn peittaak nak cu nami tün ci.

¹¹ Cun ah kyasei shin ah bi cu k’täi ne m’khüüp ne bi vä. Nangmi naw shin ah bi cu nami ngaih-tüh ah mäih ah, m’khüüp ne nami bi vai nei. Nami ngaih ah mäih ah nami peit taak vai nei.

¹² Nangmi naw na mi peit hlü cang ah a kyak ung Khanpughi naw, yum nakcang awn nami peit cu ning dou pe gui khai, nangmi ah kä peit nak hning cu Khanpughi naw kä ning k’thäh gui khai.

^13-14 Nangmi ung gih ne chang ung a yang vai ah ka pyein ah kä kyak ci, a tutäng vai ah ka pyein ah kyak ci. Tuh chü nangmi ah bühmang nak naw pyamtham ci gui ak bukbe tu ah mäih ah, nangmi nami pyaamthaam tu ba ung ngami ah bühmang nak naw ning k’bukbe ba gui khai.

¹⁵ Cacim naw, “Akda gah ciah kaa, kä k’pawih ci; api gah ciah kaa kä ken ci” a ciah mäih ah kyak ci.

Titus La Apaw Gui

¹⁶ Keimi naw kami ning m’hteihtang gui hlü ah mäih ah Titus cu kyak sak ciah Khanpughi cu m’hlünttai nei.

¹⁷ Titus naw keimi ah khü a dou nak bäng ah kä kyak ciah a mät ah m’hteihtang nak hlü ah m’lung awn, nang mi ah lawk khai ah amät naw ak bäi ah kyak ci nei.

¹⁸ Keimi naw ani awn a täng ah kami nau cu kami tüi lawk ci nei, ani cu, ng’Thu Ni pyein ne bi nak ung Khrithabum gui naw ami chang m’sui ah chang ah kyak ci nei.

¹⁹ Cun bäng ah kä kyak ciah peittaak nak ah bi bi nak ung keimi awn a täng ah hteit hton ne bi tuk khai ah Khrithabum gui naw ami ghü ah kyak ci nei. Shin ah peit taak nak ah mawng kami bi cu, Khanpughi ah bämang nak ah hmawk la keimi ah m’hteihtang nak cu ang dang vai ah, phäh ah kyak ci.

²⁰ Cun ah ng’khailang ne ami peit gui cu kami bilawh nak ung, keimi cu chang naw kä a nam kat ten gui vai ah kami geing nak ci nei.

²¹ Keimi ah ng’bü nak cu Bawipa ah ma bäng ah kä kyak ciah chang ah ma ah phi ng’düng khai ah bi vai ah kyak ci.

²² Cun ah kya sei ngah ni awn a täng ah kami nau tumat phi kami tüi lawk ci nei: ani cu akda vei teng kheng u ngä sei, chang m’hteihtang ciah chang ah kyak ci nei. Ani cu nangmi ning ngaih gep gui ciah kya ne, ning m’hteihtang gui hlü pi ci nei.

²³ Titus cu nangmi ah hmawk ah kei awn a täng ah bi bik ciah kyak ci; ani awn lawk ci gui ah kami nau gui cu, khrithabum ah ghü gui, Bawi Khrih ah bämang nak law püi ci gui ah kyak ci.

²⁴ Keimi ah khähghah nak akcang ah ami hmat tu vai la, ngami ung kaa naw khrithabum gui naw ami hmat tu vai ah, nami hni nak cu nami m’dang gui vai nei.