2 KORIN 7 - Cho Bible Common Language 2016

¹ Teihpüi gui aw, shin ah shaitaak gui cu mikmi ah hmawk ah kyak ci. Cun ah kyasei pumsa la m’lungkyong shetkat sak ci phung cu theingcim sak ne, Khanpughi kyih aa nak awn kümbe ciah theingcim ne mi om khai nei.

² Keimi nam hni gui vä. Keimi naw a u phi kami shetkat nak kä om ci; a u phi kä kami didap sak ci, a u ah khan ah phi kä nik khai ah kami m’käng nak kä om ci.

³ Cun ah ka pyein cu nangmi ka ning m’kat gui ah kä kyak ci, ayan ka pyein ah mäih ah, nangmi awn sih ung phi ghin ung phi atäng ah om vai ah ka mi ning m’hni gui ah hmawk ah kyak ci.

⁴ Nangmi ka ning ngaih gep gui ci, nang mi ah phäh ah ka längtang ci! Zaica nak a i chü a om ung phi, kei cu k’thamah ne ang htei ah ka yeikyai ci.

⁵ Macedonia kho ah kami gawk law kawn ah phi kami ng’düm nak kä om ci; yaica nak akda kami aut ci, chang gui ah ng’tuk ng’vauk nak akda om sei, ang htei ah kami kyikyawk ng’ä ng’ai ci.

⁶ Zaica ng’ä ng’ai ci, k’thamah sak ciah Khanpughi naw, keimi ah gawk lawk ciah Titus awn k’thagui na pe ba gui ci.

⁷ Cun bäng ah kä kyak ciah, Titus nami m’htei tu ah mawng phi ng’ya ne kami yei ci. Kei nami na hmuh hlü aih ah mawng, nami ng’ä aih ah mawng, kei nami na küikyan khai ah nami ng’düih ge ah mawng gui cu, ng’ya netah ka yeikyai pi aih ci nei.

⁸ Ka guk law ah ca naw nami m’lung a ning m’thüi gui ung phi cun ah ca ka guk ah phäh ah kä ka ng’yu ba ci nei. Cun ah ca ah phäh ah kä nami yei cu hmat ne ka thüi te ci, cun ung phi,

⁹ tuhbäi ka yei ci nei, cun cu ka ning m’thüi gui ah hmawk ah kä kyak ci nami thüi nak naw, nami m’lung a ning thawng sak gui ah hmawk ah kyak ci. Cun ah thüisei nak cu Khanpughi naw mang ci kyasei, nangmi ning yaica nak sak gui a i kä om ci.

¹⁰ Khanpughi ah mang ah thüisei nak naw m’lung kyong ng’thawng sak ne, hun nak ah gawk sak ci Cun ah phäh ah thüi nak pi kä om ci! Cun ung phi ng’yu ba nak kä om ciah thüisei nak cu sih nak ah kyak ci.

¹¹ Nami thüisei nak ung Khanpughi ah bi bi cu teng vä! Nami k’thamah law pyi ci, nami katnak a theing ah mawng nami m’dang law pyi ci, nami m’lung k’she ah phäh ah nami ng’ä pyi ci, nami kyikyawk pyi ci, nami ng’ap pyi ci, cheishoh nak m’kat vai nami hmat pyi ci, a mawng avan ung katnak nami phyawn nak ah mawng nami mät naw nami m’dang pyi ci nei.

¹² Cun ah kyasei a yan ka guk law ah ca cu, cheishoh ciah chang ah hmawk ah phi kä kyak ci, ami cheishoh nak ah chang ah hmawk ah phi kä kyak ci. Khanpughi ah maa ah nangmi naw keimi cu a i hlawk ah nami na yum hni gui cu akcang ah ang dang vai ah phäh ah kyak ci.

¹³ Cun cu dang sei keimi cu kami k’thamah ci. Kami k’thamah bäng ah kä kyak ciah Tutus cu m’hteihtang uk ci sei, ani a yeikyai cu hmuh u netah, ang htei ah kami yei kyai ci.

¹⁴ Kei naw nangmi ah mawng, Ani ah ma ah khähghah ne kam thein te ci, acun cu nangmi naw dang khai ah nami bi ah kyak ci. Keimi naw nangmi ah maa ah düng ciah thu bä ka mi pyein ci, Titus ah maah khähghah ne kami pyein cun phi akcang ah kya pyi ci nei.

¹⁵ Ani ah ng’thu ngai ghet khai ah nami om la, ani kyih aa ne nami na dou ah mawng cu, ani naw shüm ba netah, nangmi cu ning m’hni law gui pi ci nei.

¹⁶ Kei cu nangmi ah khan ah m’lung üp ngaih gep nak om khätah ang htei ah ka yeikyai ci nei!