2 KORIN 6 - Cho Bible Common Language 2016

¹ Cun ah kyasei Khanpughi ah khuut bi nak ghawm awn nangmi cu kami ning hui na gui ci. Nangmi cu Khanpughi ah m’gein nak nami gah ci kyasei, cun cu kä nami m’di en vai.

² Khanpughi naw, “Ka ning m’htei nak gui vai ah khin a gawk law ung, Nami ng’yoih cu ka ning ngaih pe gui ci nei; Ka ning hun nak gui vai ah khin a gawk law ung, Ka ning m’htei gui ci nei” a cicu ngai yah vä. Ngai vä, Khanpughi ah m’gein nak gah nak vai ah khin cu, a tuhbäi ah kyak ci; hun nak ah hnüüp cu a tuhngawi ah kyak ci!

³ Keimi ah khuut bi nak ah mawng ung chang naw kä ah nam kat en gui vai ah, chang ah kä ng’yak hlü a i phi kä kami bi vai ah kami k’tha nak ci.

⁴ Yaica nak khüikhaa nak la geivai nak gui cu, hnimgei nak awn aut u ne, a mawng avan ung Khanpughi ah changshäm ah, kami kyak ah mawng cu kami m’dang ci nei.

⁵ Keimi cu tukthah nak, thawng chum nak, m’thüiplah nak kami gah ci; kä ng’düm ah bi kami bik ci kya ne, ih khin ei khin phi kä om ci.

⁶ Theingcim nak, htangkhaa nak, hnimgei nak, ng’awi ng’gi nak gui awn phi bäi, Mumcha Theing ah m’gein nak la kami m’hni nak ak cang awn phi bäi;

⁷ ng’düng ciah ng’thu pyein nak la Khanpughi ah hlüngtai nak awn phi bäi, keimi cu Khanpughi ah changshäm ah kami kyak ah mawng cu kami dang sak ci. Ng’tuk bi nak la gaa shung nak ung, ng’düng nak cu, kami li khim ah mäih ah kami mang ci.

⁸ Keimi cu m’tamkhah nak la yoshe nak, päipih nak la m’hlüngtai nak kami gah ci. Kami hleeihlak ciah na pyein gui u sei phi düng nak cu ka mi pyein ci:

⁹ kä mingthang ciah kami kyak ung phi chang van naw na hmat gui ci; ak si ah kami kyak ung phi, nami hmuh a mäih ah kami ghing ci. M’kyuk nak kami gah ung phi a u naw kä na ngawn gui ci.

¹⁰ Thüisei nak a om ung phi angtäi sei kami yei ci; chang k’pyaam ah kami kyak ung phi chang akda kami maang sak ci; khawh a i kä kami taak ung phi a päng avan kami khäm ci.

¹¹ Korin ah teihpüi gui aw! Keimi naw akdei dang ah kami ning thu püi gui ci nei kami m’lung choh phi ang shawng ah kami hmawng ci nei.

¹² Ami m’lung choh khai ci gui cu keimi ah kä kyak ci; keimi ah ma ah ami m’lung choh khai cicu nangmi ah kyak ci.

¹³ Tuhbäi kei naw ka hta gui ah mäih ah ka ning m’cäi gui ci nei; Keimi ah ning ngaih gui ah mäih ah na ngai gui u ne, nami m’lung choh a ng’shawng ah k’hmawng vä!

Khoyo Yum Ci Gui Khän tam Nak Gui

¹⁴ Kä yum ci gui awn a täng täng ah kä nami hnün thawh vai, atäng ah om ih vai ah kä kyak ci. Ak ni la ak ka cu kä ng’gui ng’pha hlawt khai goi. Akdei la ak hnüp cu a täng ah kä om hlawt khai goi.

¹⁵ Bawi Khrih la khoshe cu kä kawng ät hlawt khai goi. Zum ciah chang cu kä yum ciah chang awn kä om ghawm hlawt khai goi.

¹⁶ Khanpughi ah pum im cu a gup gui awn ng’thu kä khän hlawt khai gui. Mikmi cu Ghing ciah Khanpughi ah Pum im ah mi kyak ci! Khanpughi amät naw; “Ka chang gui awn ka im ka pyang khai, Ami ng’lung ah ka om khai! Kei cu ngami ah Khanpughi, Ngami cu kei ah chang gui ah kyak khai gui” ci ne pyein ci.

¹⁷ Cun ah kyasei Bawipa naw; “Ngami cu nawng shüt gui ne, ngami awn ng’cha ne nami om vai. Kä theingcim cicu kut awn phi kä nami tawk en vai, cun ung ka ning dou gui khai.

¹⁸ Kei cu nangmi ah Pa, Nangmi cu kei ah hta gui, ah nami kyak khai, ci ne m’gäi pi ciah Khanpughi naw pyein ci” ciah khän ne pyein ci.