2 KORIN 5 - Cho Bible Common Language 2016

¹ Mikmi ah om nak ah kyak ciah khomdek pumsa cu ang kawn ah a kyak ung, Khanpughi naw khankho ah, amät ah pyan ah, angtäi om nak ah im, na k’hman gui khai cicu mi hmat ci.

² Khodek pumsa awn mi om yah ung khankho im cu mi hmu hlü ne, mi ng’hlo ei ci;

³ cun ah khankho im ah sui cu mi sui law ung mikmi cu pumsa k’maih ah kä mi kyak khai.

⁴ Khodek im ung mi om yah ung mikmi cu mi ng’hlo ei ci, cun cu khodek pumsa mi nawng hlü su ah kä kyak ci, thuka thei ci ung ng’huuk ne, angtäi ghin nak ah khankho pumsa cu ng’yak hlü ah hmawk ah kyak ci.

⁵ Cun ah ng’huuk nak vai na pyan pe gui cicu khanpughi ah kyak ci, Mikmi am a na gim peit gui, a kyän nak ah Mumcha cu na pe gui ci.

⁶ Cun ah kyasei keimi cu kami k’tha mah ci. Mikmi cu pumsa im ung mi om yah ah chuih Bawipa ah im awn mi ng’shawng ci, cicu mi hmat ci.

⁷ Mi ghin nak ung yum nak cu ak tung ah kyak ci, mik awn hmuh nak cu ak tung ah kä kyak ci.

⁸ Kei mi cu k’thamah nak om sei, pumsa im cu nawng shüt ne, Bawipa awn a täng ah om vai cu kami ng’ya hlü pi ci.

⁹ Keimi cu shi ah, cä ah, a hawi ah om ung phi Bawipa naw ana yei nak gui vai kami ng’ya hlük ci.

¹⁰ Mikmi mi van cu m’khoichaa nak mi gah khai ah Bawi Khrih ah maa ah mi gawk yawp khai. Pumsa awn mi om yah ung ak ni, ak she mi bi gui ah ciah, mi k’chaw phäh phäh cu mi gah khai.

Bawi Khrih ung Khanpughi awn Ng’khawtsheng Nak

¹¹ Keimi cu Khanpughi kami kyih aa ci kya ne, chang gui cu kami m’cäi m’ä gui ci. Khanpughi naw mikmi cu na hmat gui yüm ci; nangmi naw kei ah mawng cu nami m’lung kyong ah, nami hmat yüm khai ah ka ngai ci.

¹² Cun cu keimi ka mi mingthang vai ah tha nak ba ah kä kyak ci, keimi ah khan ah nangmi ah mingthang nak vai cu k’tha na ne ning peit gui ah kyak ci. Cun ung vah, chang ah om ih kä teng ah a müisa düt teng ne khähghah ciah, chang gui ah ng’thu cu nami m’hlan tuha hlawt khai.

¹³ Keimi cu kä ka mi gu ei ci ang? Kami gu ah a kyak ung Khanpughi ah hmawk ah kyak khai. Kä ka mi gu ah a kyak ung, nangmi ah hmawk ah kyak khai.

¹⁴ Chang tumat cu chang avan ah hmawk ah si sei, chang avan naw ani awn a täng ah sik nak ami aut ah mawng cu tuhbäi keimi naw kami hmat pyi ci kya sei, keimi cu Bawi Khrih ah m’hni nak naw na uk gui pyi ci nei.

¹⁵ Bawipa cu chang van ah hmawk ah sik ci, cun ah kyasei chang gui cu ami ghin yah ung ami mät ah hmawk ah kä ghing ba u ne, ngahmi ah hmawk ah a hnun gui pe ne, tho ne ghing ba ciah Bawipa ah hmawk ah a mi ghin vai ah kyak ci.

¹⁶ Cun ah kyasei keimi naw chang ah m’hnüt nak awn, a u kä kami m’khoi cha ba ci. Yanä keimi naw, Bawi Khrih cu chang ah m’hnüt nak awn kami m’khoichaa man ung phi, tuhbäi cun ah kä kami kya ba ci.

¹⁷ Chang nak cicu Bawi Khrih ung a ghin ung, ak thai ah ng’tüi ba ciah kyak ci; ak phyim avan ng’kawn yawp ne, avan ak thai ah kya yawp ci.

¹⁸ Cun avan cu Khanpughi ah bi ah kyak ci, Khanpughi naw mikmi cu a gaa ungka a teihpüi ah Bawi Khrih awn na ng’thon sak gui ci, chang hei gui cun phi a teihpüi ah ami kyak law tu vai ah, bi nak vai cu na pe gui ci.

¹⁹ Keimi ah ng’thu pyein cu, Khanpughi naw hnicim chang avan, Bawi Khrih awn a teihpüi ah pyan ci ciah mawng ah kyak ci. Khanpughi naw chang gui ah katnak cu kä m’hnüt pe gui ci, chang gui a teihpüi ah a kyak sak nak gui ah mawng, thu cu na pe gui ci.

²⁰ Tuhbäi keimi naw Bawi Khrih ah hnün ung kami ning thu püi gui ci, Khanpughi a mät naw keimi ung om ne a ning thu püi gui ah mäih ah kyak ci. Bawi Khrih ah hnün ung keimi kami ng’ge ci nei; Khanpughi ah gaa ungka naw a teihpüi ah ng’thawng tu vä.

²¹ Bawi Khrih cu katnak kä om ci, cun ung phi mikmi cu ani awn kawng ät ne, Khanpughi ah mäih ah mi ng’düng vai ah, Khanpughi naw Bawi Khrih cu mikmi ah hmawk ah, mi katnak a aut sak ah kyak ci.