2 KORIN 4 - Cho Bible Common Language 2016

M’Dek Am Kyong ah Mumcha Khawh

¹ Khanpughi naw chimgein nak awn a khuut bi vai ah na pe gui sei, k’tha dam nak vai a i kä om ci.

² Keimi naw m’yih vai la lü ng’aa nak vai cu kami nawng shüt ci; keimi cu kä kami thuvi ci, Khanpughi ah ng’thu phi hleei ne kä kami pyein ci. Keimi cu Khanpughi ah maa ah düng ciah akdei ung ghing u ne, chang gui ah ni kyom nak vai ah k’tha na ne kami bik ci.

³ Keimi ah pyein, ah Thu Ni cu ang yih ah a kyak ung chükmaih ci gui ah hmawk ah ng’yih ciah kyak khai.

⁴ Khodek khan ah khoshe naw ami m’lung cu shung sei, ngami naw kä yum hlawt ci gui. Satan naw shung gui sei, Khanpughi ah müi ak cang ah kyak ciah, Bawi Khrih ah bämang nak ah mawng, ngami ah khan ah ng’shü lawk ciah: Thu Ni ah akdei cu kä hmu hlawt ci gui.

⁵ Keimi naw ka mi mät ah mawng kami pyeinsak ah kä kyak ci; Jesuh Khrih cu Bawi ah a kyak ah mawng la keimi cu Bawi Jesuh ah hmawk ah nangmi ah changshäm ah kami kyak ah mawng kami pyein ci.

⁶ “Hnüp ah khui ung akdei ng’shü lawk khai” cine pyein ciah Khanpughi cu, Bawi Khrih ah hmai ung ng’shü ne khang ciah bämang nak ah mawng cu hmat nak vai ah, mikmi ah m’lung kyong ung, akdei cu ng’shü law sak ciah Khanpughi ah kyak ci.

⁷ Cung ung phi Mumcha khawh mi m’küm ciah mikmi cu, m’dek am düt ah mäih mi lawk ci kyasei, mikmi ung uknak ah hlüngtai nak kä om ci, Khanpughi bäng ung vah om ci.

⁸ Mikmi cu ashäng shäng mi yaica ung phi kä mi ng’pyäuh sagei ci; ak hngü ät mi khüi khaa ung phi, m’lung kä thüi ci;

⁹ Mi gaa ada ung phi, teihpüi kä maih ci, ng’tään vai ah ami nam shän ung phi kä mi di ci.

¹⁰ Bawi Jesuh cu mikmi ah pumsa ung ang dang vai ah, thuka thei ciah mi pumsa naw Bawi Jesuh ah autah sih nak cu angtäi sei mi aut ci.

¹¹ Mikmi cu mi ghin yah ak chuih Bawi Jesuh ah hmawk ah sih nak cu mi aut ci, cun cu mikmi ah thuka thei ciah pumsa ung Bawi Jesuh a ghin ah mawng ang dang vai ah hmawk ah kyak ci.

¹² Sih nak cu keimi ung a hnün thawh ung phi ghin nak cu nangmi ung hnüntho ci.

¹³ Cacim ung, “Kei naw yum ne Thu ka pyein ci” a ciah mäih ah keimi ung phi yum nak om sei, yum nak awn thu kami pyein ci.

¹⁴ Bawipa Jesuh thawh ba sak ciah Khanpughi naw, kei mi cun phi Bawipa Jesuh awn a täng ah na thawh ba sak gui ne, nangmi awn a täng ah ama ah na hteh püi gui khai cicu kami hmat ci.

¹⁵ Shin gui avan cu nangmi ah hmawk ah kyak ci; Khanpughi ah m’gein nak gah ci da law pipi ne, Khanpughi ah bämang nak m’hlüngtai ne taigü ci phi da law pipi khai khai nei.

Yum Nak awn Ghin Nak

¹⁶ Shin ah mawng ung keimi a i yah ung phi kami tha kä maih khai nei. Ka mi pumsa cu a dängphai law ung phi ka mi mümcha cu ak hnüüp tä k’thai ba pi pi ci nei.

¹⁷ Keimi naw a shäng ak yaang ah kami aut ah yaica nak naw cun ah hlüngtai pi ciah angtäi sei bämang nak cu na gah sak gui khai nei.

¹⁸ Kei mi naw mik awn hmuh cu kä kami kheing ci, mik awn kä hmuh vah kami kheing ci. Mik awn hmuh cu a shängta khäng ne, Mik awn kä hmuh cu angtäi sei khäng ci.