2 KORIN 12 - Cho Bible Common Language 2016Paul ah Muimang La Thuphlaan 1 Khäghah cu kä a ni ung phi, kei ka khäghah vai om ci. Cun ah kyasei Bawipa naw ana peit ah muimang la Thuphlaan ah mawng cu m’dang ne ka pyein khai. 2 Yanä khokum gha-lei-phli yah ung khritha tumat cu, ak hlüng pi ah khankhaw ah a yon püi cu kei naw ka hmat ci (Cun cu akcang ah a kyak la muimang ah a kyak ah kei naw kä ka hmat ci, Khanpughi bäng naw vah hmat ci.) 3-4 Acun ah chang cu Paradise khaw ah yon püi sei, chang ah m’gawng awn kä pyein hlawt ah thu cu ng’yak ci, cicu leng ne ka pyein ba ci, (Cun cu akcang ah a kyak la muimang ah a kyak ah kei naw kä ka hmat ci, Khanpughi bäng naw vah hmat ci.) 5 Cun ah chang ah mawng ung kei ka khäghah khai, cun ung phi ka mät läi cu kak tha a ken ah mawng ah kawn ah khähghah vai kä om ci. 6 Kei cu ka khäghah hlü ung, ak gu ah kä ka kyak khai, akcang pyein ciah ka kyak khai Cun ung phi chang naw ana hmuh ng’yak ah tah bä pi sei ana m’hlüngtai vai kä ka ng’ya hlük ci kya ne, kä ka khäghah khai nei. 7 Kei naw ka hmuh ah cäicat vai mawng ung kei cu kä ami nam hlüngtai en vai ah, kei cu ka pumsa awn geinvai nak ka aut ci nei. Cun ah geinvai nak naw, Satan ah ng’shä tüih ah mäih ah, kei cu na hnem ne, kam ghä m’ce nak cu na k’cheih pek ci nei. 8 Cun gui ana liim pet vai ah Bawipa ah thum vei kak taigü ci nei. 9 Cun ung phi ani ah nam shan nak cu, “Nang nak tha a ken yah ung kei ah hlüngtai nak cu, ak kuikyang pi ah kyak ci, cun ah kyasei kei ah m’gein nak bäng cu nang ung hlü ciah kyak ci” ciah kyak ci. Cun ah kyasei kei cu Bawi Khrit ah hlüngtai nak ung ka ng’yii nak vai ah, kak tha a ken ah hmawk ah, yeikyai aih ne ka khäghah ci nei. 10 Kei cu Bawi Khrit ah hmawk ah tha ken nak, ghingshe nak, geinvai nak, k’dudei nek, la tüihtok nak gui ka aut ung phi, kei cu kak tha a ken yah ung kak thamah ba pi ci nei. Korin Chang Gui ah Hmawk ah Paul ah ng’Ä Ai Nak 11 Kei cu ak gu ah mäih ah ka kya lawk ci, cun cu nang mi ah na kyak sak ah kyak ci. Nangmi cu kei nak püi ciah nami kya khin te ci. Kei cu a i ah kä ka mawng pang ung phi, ang düihpüi ah nami k’bäi gui ah kä ka ng’neim pi khai. 12 Kei cu ang düihpüi ah ka kyak ah mawng cu, cäi aih gui vai la cäicat gui vai awn, hniim gei nak awn ka ning m’dang gui ci. 13 Kei naw nangmi cu a hei khrithabum gui ah mäih ah m’täng ne ka ning om püi gui ci, ngui ah mawng bäng ung kä ka ning bilawh sak gui ci. Cun ah kä täng khai ah ka bi ah hmawk ah kei cu nami nam gein vai nei. 14 Tuhbäi nangmi ah ak thum vei nak ah ka lawk khai ah ka pawng ci nei. Cun ung phi nangmi kä ka ning khüikhaa sak gui khai nei. Nangmi ah khawh kä ka ng’ya hlük ci, nangmi vah ka ning ya hlü gui ci. Hta hmaw gui naw nupa gui ah hmawk ah khawh käm cun ci gui, nupa gui naw vah hta hmawk gui ah hmawk ah khawh m’cun ci gui. 15 Nangmi ah hmawk ah a kyak ah khoi ung ka khawh la ka mät cu yeikyai ne ka ng’pyi sak khai nei. Kei naw ang htei ah ka ning m’hni gui ung nangmi naw a pi ah nami nam hni khai maa? 16 Kei naw nangmi phuih kä ka ning gih sak gui ah mawng cu, nami ng’kyaa khai nei. Cun ung phi chang a tumat naw kei naw thuvi ne ka ning m’hleeihlak gui ciah ngai hngaw khai nei. 17 A i chaa ah ang kei naw ka ning m’hleei gui? Ka tüih law ah chang gui ung kaa, a u awn ang kei naw ka länglawt nak a om? 18 Kei naw Titus cu ng’paa na ne tüi law ne, ani awn a täng khritha tumat phi ka tüih law nei. Titus cu nangmi ung länglawt ciah pyein vai kya ne ang? Ani la kei cu ka ni m’lung ngaih täng sei lam tumat ung ka ni hteit ciah kä kya ne ang? 19 Keimi naw a thawm ah kami mät kami ng’küikyan ciah nami ngai hngaw khai nei! Cun ah kä kyak ci, Bawi Khrit ah nam theithang gui ah mäih ah, Khanpughi ah ma ah ng’thu kami pyein ah kyak ci. Teih püi gui aw, keimi ah bi gui phung cu nangmi ah hmawk ah kyak ci nei. 20 Nangmi ah kei ka gawk law ung, ka ning hmuh gui hlü ah mäih ah kä ka ning hmuh gui vai la, nangmi naw phi kei cu nami na hmuh hlü ah mäih ah kä nami na hmuh vai ah kang ä ci nei. Ng’tukvook nak, m’thüikhang nak, m’lungshe nak, ng’küükneet nak, ghingshe nak, khleei nak, m’ghäm’ce nak, ng’go ng’gan nak gui ka hmuh vai ah ang htei ah ka ng’ä ci nei. 21 Cän kawn ah nangmi ah kei ka law ba ung Khanpughi naw, nami ma ah, kei cu na lü ng’aa sak khai ni mä, yan ä sheka u netah tuh güt kä ng’yu ba u ne, m’gu plet ng’yaw ng’pawm düut ciah chang gui ah hmawk ah, kei cu ka ng’phli tui kya law ei bawk khai ni mä, cine kang ä ci nei. |
Cho Bible Common Language © Bible Society of Myanmar, 2016.
Bible Society of Myanmar