2 KORIN 1 - Cho Bible Common Language 2016

¹ Khanpughi ah ang yak hlü ah Bawi Khrih Jesuh ah ang düihpüi Paul la anau Timothi naw — Korin ung Khanpughi ah Khrithabum la Achaia kho Khanpughi ah chang gui a van am ca pe lawk ci goi nei.

² Mi Pa Khanpughi la Bawipa Jesuh Khrih naw m’gein nak la dim nak cu ning pe gui sä.

Paul Naw Khanpughi Am Hlüngtai Nak

³ M’hteihtang ciah Bawi, chimgein ciah Pa, mi Bawipa Jesuh Khrih ah Pa Khanpughi cu mi m’hlüngtai khai nei!

⁴ Ani naw yaica nak phung ung nam htei gui ci, cun ah kyasei Khanpughi ung mi gah cun ah m’htei nak awn, yaica ciah chang gui cu mi m’htei tu hning ci nei.

⁵ Mikmi naw Bawi Khrih ah aut ah, da aih ciah geinvai nak cu mi aut tu ah mäih ah Bawi Khrih ung Khanpughi ah na peit gui ah m’htei nak cun phi mi gah ci.

⁶ Kei mi kami geinvai ung, nang mi naw m’htei nak la hun nak nami gah vai ah hmawk ah kyak ci. Keimi m’htei nak kami gah ung nangmi cun phi m’htei nak gah u ne, keimi naw kami aut ah geinvai nak cu hnimgei ne, aut m’khüt nak ah thagui cu nami gah khai.

⁷ Cun ah kya sei nangmi cu keimi ah aut ah geinvai nak gui nami aut tu ah mäih ah keimi ah gah ah m’htei nak cun phi nami gah tuk ci; cicu khäng sei ka mi yum ci.

⁸ Phäinau gui aw, Asia kho ah ka mi aut ah yaica nak ah mawng cu ka ning m’htein gui hlük ci. Cun ah yaica nak cu däm ne gih aih khätah, ghin nak hngaw kami hnu ng’hlah tak ci nei.

⁹ Kami mät naw kami mät sih nak ung kami gawk ciah kami ngai ci. Cun ah a kyak cu keimi naw, kami mät kä ngaih u, u ne, ak si thawh ba sak ciah Khanpughi kami ngaih u vai ah hmawk ah kyak ci.

¹⁰ Cun hlawk ah kyih aih vai ah sih nak ung kaa, Bawipa naw na hun gui ci; na hun ba gui khai; cun kawn ah phi na hun ba gui mä khai ah yum ne mi ngaih u ci.

¹¹ Nangmi naw keimi cu taigü nak awn nami nam htei gui vai. Nangmi akda naw nami k’taigü cu Khanpughi naw ngai ne, keimi cu hrilham na pe gui khai. Chang akda naw keimi ah hmawk ah ami k’aw m’hlaw ne, Khanpughi cu m’hlüngtai khai gui.

Paul Naw Ang Shei Nak Am Thawng Ba

¹² Keimi ung m’lung ngaih theing awn khähghah nak vai tumat om ci, cun cu khodek khan ah ghin nak ung, ak tung pi ah, nangmi awn ng’khuihphaa nak ung chang ah cüivai nak awn ah kä kyak ciah Khanpughi ah hlüngtai ciah m’gein nak ung, Khanpughi ah na peit gui ah m’lung theing awn kami pawngpüi bilawh ah kyak ci.

¹³ Shin ah guk ah ca gui cu nangmi naw nami phat hning la nami hmat hning bäng ah kyak ci.

¹⁴ Tuhbäi keimi ah mawng amshah bäng nami hmat ung phi, avan nami hmat khai ah, ka ngaih u ci nei. Cun ah kyasei Mi Bawipa Jesuh a law hnüüp ung, nangmi ah hmawk ah kami khähghah ah mäih ah keimi ah hmawk ah nami khähghah khai nei.

¹⁵ Kei naw shin ah a mawng gui cu ngaih gep ne, nangmi naw hrilham hnih vei nami gah vai ah,

¹⁶ Macedonia kho ah ka hteh lam ah hnü ät, ka law ba lam ah hnüt ät, ka lawk khai, cun ungka naw Judea kho ah ka hteh hlawt vai ah nami na m’htei khai ah ka ngai ci.

¹⁷ Cun ah ka ngaih cu kam lung hnih ah ng’pai sei ang Cun ah ka k’bäi cu ka mät bäng ah ngaih ah kyai khai bawk ang? Atäng düt ah “ä ä, ka ka” ka ciah kyak khai ang?

¹⁸ Khanpughi ah ng’thu cu akcang ah ng’düng ci kyasei, kei ah shaitaak cu, “ä la ka” hnih ah kä kyak ci.

¹⁹ Silas ni, Timothi ni, kei ni naw ng’shäu ne kami pyein ah Khanpughi ah Htapa, Bawi Jesuh cu, “ä” ci shüm “Ka” ci shüm ciah Bawi ah kä kyak ci. Ani cu Khanpughi ah ng’yak hlü cu “ä ya” cik ciah Bawi ah kyak ci.

²⁰ Khanpughi ah shaitaak avan cang ah m’dang ciah kyak ci. Cun ah kyasei Khanpughi ah bämang nak ang dang vai ah, Bawi Jesuh Khrih ung “Amen” mi ciah kyak ci.

²¹ Bawi Khrih ung kawng ät nak awn keimi la nangmi na ghin sak gui ci cu, Khanpughi a mät ah kyak ci.

²² Khanpughi a mät naw m’khoi ne na khei gui ne, amät ah chang ah ng’kheing vai ah nam hnüt gui ci. Mikmi ah gah vai a na m’küm peit gui cu a kyän nak ah Mumcha Theing cu mi m’lung kyong ung na pe gui ci.

²³ Korin ah kä ka law vai ah ka k’bäi cu nangmi ka ning m’gein nak gui ah a kyak cu kei ah m’lung hmat ciah Khanpughi saksi ci.

²⁴ Nangmi naw a i nami yum vai ah ning k’bäi gui ah kä kyak ci, nangmi ah yum nak cu khäng ciah kami hmat ci. Keimi naw nangmi ah yeikyai nak vai ah nangmi awn a täng ah kami bi ah kyak ci.