2 GHANGPUGHANG GUI 9 - Cho Bible Common Language 2016

Jehu cu Israel Ghangpughang Kyak Khai ah Phyuh Theh ci gui

¹ Cun yah ung prophet Elisha naw chang nong prophet cu khü neta a pyen nak cu, “Pawng ne, Kilead kho Ramoth ah hteit ä. Shin ah oliv-situi k’am hteh püi ä,

² Cau na gawk ah a kyak ung Jehu, Jehoshaphat ah hta, Nimshi ah tu cu na shui vai. Ani cu apaw gui ungka, akhan tumat ung amät khü neta,

³ Ani ah lu khan ah shin ah oliv-situi cu yuk shawi neta, “Bawipa naw ng’shäu ci, ani naw nang cu Israel ghangpughang ah ning phyuh theh ci nei!” ci neta ang ghit ah na hteh tak vai nei” cik ci.

⁴ Chang nong prophet cu Ramoth ah hteit ne,

⁵ gabawi gui civui u sei hmu gui neta, ani naw, “Saya, kei naw nang ah phäh ah ng’thu ka law püi ci nei” cik ci. Jehu naw, “Keimi ungka a u ang na ng’thu püi?” cik ci. Ani naw, “Nang nei, saya” cik ci.

⁶ Cun kawn ah ngani cu im kyong ah lut ni neta, prophet nong naw Jehu ah lu khan ah oliv-situi cu yuk shawi neta, a pyen nak cu, “Bawipa, Israel Khanpughi naw ang ng’shäu cu; kei naw nang cu ka chang gui Israel chang gui ah ghangpughang ah ka ning phyuh theh ci nei.

⁷ Nang naw na bawi ghangpughang, Ahab ah hta cu na ngawn vai, cun ah kyasei ka prophet gui la ka changshäm gui ngawn ciah Jezebela cu kei naw ka m’kyuk khai.

⁸ Ahab ah kyong chang gui la a hta ng’shon gui cu ami van sik khai gui; kei naw ani ah kyong khui chang pami phung ak hmaw angvai avan kak heng yawp khai.

⁹ Israel ghangpughang Jeroboam la Israel ghangpughang Baasha ah kyong chang gui ah khan ah ka bi ah mäih kei naw ani ah kyong ah ka bik khai.

¹⁰ Jezebela ah pumsa cu kä phuh vai: ani ah pumsa cu Jezreela khopäng ah ui gui naw ei khai gui” cik ci. Cun a pyen kawn ah prophet nong cu kyong ah ka lut law ne hteit ba ci.

¹¹ Jehu cu apaw gui bawi gui ah hteit ba khäta, ami ng’shi cu, “A päng avan cu bä ne ang? Cän ah chang gu aang naw a i ang ang yak hlü?” Jehu naw, “Ani naw ang yak hlü cu nangmi naw nami hmat ci” ci nak ci.

¹² Ngami naw, “Ka nei, kä kami hmat ci, ani naw a i a pyen cu na m’thein gui ä!” cik ci gui. Ani naw a na m’thein cu, kei naw nang cu Israel ghangpughang ah ka ning phyuh theh vai, Bawipa naw ng’shäu ci.”

¹³ Cun vai am Jehu ah a paw gui bawi gui naw ami suinu gui hlaak ah khan ah Jehu naw angdüih nak vai ah k’phiat u ne, phyungheng tum ne, “Jehu cu Ghangpughang ah kyak ci nei” cine m’lau ci gui.

Israel Ghangpughang Joram cu Ngawn ci gui

^14-15 Jehu naw ghangpughang Joram cu tuk vai ah pawng ci, cun yah ung ani cu Siria ghangpughang Hazela awn Ramoth ung ami ng’tuk nak ung a leim m’tui ne Jezreela ung om ci. Cun ah kyasei Jehu naw a bawi gui am, “Nangmi cu kei awn a täng ah nami om ciah a kyak ung, Jezreela chang gui am ng’thu m’thein khai ah a u phi Ramoth ungka kä a luh en lawk khai ah na mi m’thein vai” cik ci.

¹⁶ Cun kawn ah a yatha ung kai ne Jezreelaa ah hteit ci. Joram cu kä gai ba phak ci, Judah ghangpughang Ahaziah cu a cu ah teng yah ci.

¹⁷ Jezreelaa tänghän ung gaw ngäng ci naw Jehu la a chang gui ami law cu hmu neta, “Ng’se ng’cum ciah chang gui ka hmuk ci nei!” cine m’lau ci. Joram naw, “Teihpüi ang, ga ang va hmat khai ah ng’se ung cun ciah chang tumat tüi ä” cik ci.

¹⁸ Ng’se ung cum ciah ng’shä cu Jehu ah hteit neta, “Nang cu teihpüi ah kya ne na lawk ci ma, cicu ghangpughang naw hmat hlük ci nei” cine ng’shik ci. Jehu naw, “Cun cu nang ah bi vai ah kä kyak ci nei, ka hnu ah na läk ä” cik ci. Tänghän ung gaw ngäng ci naw, ng’shä cu gawk te ci, cun ung phi kä ng’hlat law ba ci nei” cine pyen ba ci.

¹⁹ A hei ng’shä mä tüi ba ne, a cun bä ah Jehu ng’shi ba sak ci gui. Jehu naw pyen ba mä ne, “Cun cu nang ah bi vai kä kyak ci nei, ka hnu na läk ä” cik ci.

²⁰ Tänghän ngäng ci naw pyen law ba mä ne, ng’shä cu gawk te ci, kä ng’hlat law ba ci nei” cik ci. Ani naw, “Law ci gui ah ami ng’vaipi naw a yatha cu Jehu ah mawng ah mäih, akgu ah mawng ah mäih ah mawng lawk ci nei” cik ci.

²¹ “Ka yatha cu pawng püi ge vä” cine ghangpughang Joram naw k’bäi gui ci. Ami pawng yawp vai am ani la ghangpughang Ahaziah cu ani yatha phäh phäh ng’cum ne Jehu hmuh vai ah lawk ci goi. Ngami cu Naboth ah m’dek ung ng’hmuk ci gui.

²² “Nang cu dimdeih nak awn na lawk ci ma?” cine Joram naw ng’shik ci. Jehu naw, “A i hawkcha ah dimdeih nak a om vai ang? Mikmi ung na nu Jezebela naw a tün ah cunce nak la a gup khawihnah nak cu om lä ci nei” cik ci.

²³ “Cun cu ng’tuk ng’ah nak nei, Ahaziah aw!” cine m’lau neta, Joram cu a yatha m’hlat ne dawng ba ci.

²⁴ Jehu naw ali cu ak thagui avan awn ang bang ah koi ne kap sei, Joram ah akpaang ungka naw amsinkak ung ng’täih lawk ci, Joram cu a yatha kyong ung kyu ne sik ci.

²⁵ Jehu naw bawm ciah Bikan am, “A pumsa cu la ne, Naboth khomdek ung yuk chah vä. Nang la kei naw k’se ni ng’cum ne ghangpughang Joram ah pa Ahab ah a hnu ah ni om yah ung Bawipa naw Ahab hnungtuk ne a pyen ah ng’thu gui cu na shüm vai nei:

²⁶ ‘Kei naw Naboth la a hta gui ami ngawn gui cu yanta ka hmuk ci nei. Kei naw a shin ah m’dek ung ka ning m’kyuk khai nei, ci nei shai ka tak ci.’ Cun ah kyasei Jehu naw yatha bawm ci am, “Joram ah pumsa cu la ne, Naboth ah khomdek ung yuk ghawt ä, cun ung Bawipa ah shaitak cu kümbe ciah kyak khai nei” cik ci.

Judah Ghangpughang Ahaziah Ngawn ci gui

²⁷ Cun gui cu ghangpughang Ahaziah naw hmu neta, a yatha awn Beth Haggan täng ah dawng ci, Jehu naw gawt lawk ci. Jehu naw a chang gui am, “Ani phi ngawn vä” cine k’bäi gui ci. Ibleam gawnu pei, Kur lam ung a yatha ung ani cu k’phleim ci gui. Cun ung phi ani cu ling ne hteit ne, Mekiddo mang gaw ung gawk neta sik ci.

²⁸ A bawi gui naw a pumsa cu yatha awn Jerusalem ah hteh püi ba u neta, David ah mang gaw, mang gaw gui ah ng’ci, hmun ung phuh ci gui.

²⁹ Ahab ah hta Joram Israel ghangpughang ah a kyak nak a kum gha lei ät nak ung Ahaziah cu Judah ghangpughang ah kya lawk ci.

Ghangpughangnu Jezebela cu Ngawn ci gui

³⁰ Jehu cu Jezreelaa ung gawk ci. Jezebela naw cun ah a mawng gui cu ng’ya pyi ci kya neta, amik mu pyang ne, a lu huih neta, mang im kyong ah m’kawt ung ng’düi ne lam cu hei teng ci.

³¹ Jehu m’kawt a gawk law yah ung ani naw khü ne, “Nang Zimri! chang hleeng ne ngawn ci! Shin ung a i ah kyasei na law ang?” cik ci.

³² Jehu naw han teng neta m’lau ne, “A u ang kei täng ah a om?” cik ci. Bawipa gui hnih thum naw mang gaw m’kawt ung om ne yuk teng ci gui,

³³ Jehu naw ngami am, “Yuk cha law vä!” cik ci. Ngami naw yuk cha law u khäta, k’pang ung ni, ng’se gui ah khan ni ah asi ng’phyuh ci. Ani ah a pum ah khan ah Jehu naw ng’se gui la yatha awn kai na neta,

³⁴ mang im kyong ah lut ne, ei ei ci. Cun kawn ah ani naw, cän ah hnumi she cu la neta k’phuh vä; a i ah a kyak ung phi ani cu ghangpughang ah a hta nei” cik ci.

³⁵ Cun ung phi ani phuh khai ah hteit ci gui naw a lukoi la a kut guh, a khaw guh gui bäng hmuk ci gui.

³⁶ Cun cu Jehu am m’thein ba u khäta, ani naw, “Cun cu Bawipa naw a changshäm Elijah ah ma ah thu a pyen yah ung, a cun ah kya lawk khai ciah a pyen ah kyak ci: “Jezreela khopäng ung Jezebela ah pumsa cu ui gui naw ei khai gui.

³⁷ K’pawih ba cicu ekk ah mäih ah ng’yaih khai, a u naw a i ah m’khoi chah ne kä hmat khai.”