2 GHANGPUGHANG GUI 8 - Cho Bible Common Language 2016

Shunem ah ka Hnumi Law ba ci

¹ Tuhbäi Shunem ah ka hnumi, ani naw a hta a ghin ba sak am Elisha naw a pyen nak cu, khaw avan ung Bawipa naw khoyaw tuishet nak tüi lawk khai, cun cu kum chih lüng khai, cun ah kyasei hnumi naw akyongchang gui awn a täng ah a hei ah hteit ne ami om vai,

² cun ah hnumi naw ani ah beit cu ng’ngai ne, akyong chang gui awn a täng ah Philistin ah hteit ne khokum chih om tuk ci.

³ Khokum chih ng’pyi law khäta, Israel ah law ba ne, ghangpughang ah hteit ne a im la a lo ami pet tuba vai ah k’thäh ci.

⁴ Cun yah ung ghangpughang cu Elisha ah changshäm, Kehazi awn ng’htau ci goi: Ghangpughang naw Elisha ah cäiaih vai gui abi cu hmat hlük ci.

⁵ Elisha naw aksi am ghin ba ah mawng Kehazi naw ghangpughang am, am thein tu sangung, cun ah hnumi cu ghangpughang ah ng’dang ne gawk lawk ciah kyak ci. Kehazi naw ani am, “Ka bawi aw, cun ah hnumi cu shin nei, Elisha naw a gai sak ah a htau cu shin nei!” cik ci.

⁶ Ghangpughang ah ng’shi am hlan sang ung ani naw Kehazi ah pyen cu k’cang nak ci, cun ah kyasei ghangpughang naw a bawi tumat khü neta, hnumi ah aka man gui avan la khokum chih ah kyong ung, ani kä a om yah ung, ani ah lo ungka ami khäm gui avan ami pek ba vai ah pyen nak ci.

Elisha la Siria Ghangpughang Benhadad

⁷ Siria ghangpughang Benhadad a gaw ah khin ung Elisha cu Damaskas ah hteit ci. Elisha cu ah a gawk cu Ghangpughang am m’thein u khäta,

⁸ ani naw Hazela, a bawi tumat cu pyen nak ci, “Prophet am m’cümhnah nak thak neta, kei kä ka gai vai la ka gai vai ah mawng Bawipa cu ng’shi sak vä” cik ci.

⁹ Cun ah kyasei Hazela naw kalauk phlikip ung, Damaskas ung ami pyan gui akni pikbäih gui cu taih ne, Elisha ah hteit ci. Hazela naw ani cu hmu law neta, “Na changshäm Ghangpughang Benhadad naw, kei cu na tüi law ne, ani a gaw nak ungka agai law vai, kä a gai vai ah mawng cu na ng’shi sak ci nei” cik ci.

¹⁰ Elisha naw, “Bawipa naw na m’thein ci nei, ani cu sik khai; cun ung phi na gai ba khai nei, cine hteit ne m’thein ba ä” cik ci.

¹¹ Elisha naw Hazela cu cäicat khai ah m’dei ne kä om thei güt khai ah a hmai ung teng neta, Elisha cu ang ghit ah amit tui ng’kya lawk ci.

¹² Elisha naw, “Saya aw, a i ah kyasei na kyah nei?” cik ci. Elisha naw, “Nang naw Israel chang gui hnungtuk püi ne kyih aih vai ah na bi law vai gui cu ka hmat ah phäh ah kyak ci nei” cik ci. Nang naw ami gaw pang gui cu m’khih ne, ami chang nong kyom pi gui cu ngawn ne, ami hmawhta gui cu m’dek teuh na ne ngawn gui ne, m’gäi ciah hnumi gui cu na yawih sak gui khai” cik ci.

¹³ Hazela naw, “Kei cu a kholä nei! A i hawkcha ah cun ah huham mah ne ka kyak vai ang?” cik ci. Elisha naw, “Bawipa naw na m’hnuh ci, nang cu Siria ghangpughang ah na kya lawk khai” cik ci.

¹⁴ Hazela cu Benhadad ah hteit ba khäta, ani naw ani ng’shi ci, “Elisha naw a i ang a pyen?” Hazela naw, “Nang akcang ah na gai ba khai ah pyen ne, ana m’thein nei” cik ci.

¹⁵ Cun ung phi a ngawi ung Hazela naw yih la ne, tui ung m’hnawm neta, ghangpughang ah hmai cu uk ne ngawn ci. Cun kawn ah Hazela cu Benhadad ah hnün ung ghangpughang ah ngo lawk ci.

Judah Ghangpughang Jehoram

¹⁶ Ahab ah hta Joram naw Israel ghangpughang ah kya ne a uk nak, akum hma nak ung, Jehoshaphat ah hta Jehoram cu Judah ghangpughang ah kya lawk ci,

¹⁷ ani cu cun yah ung a khokum thumkip lei goi lawk ci, ani naw Jerusalem ung om ne kum cheit ung uk ci.

¹⁸ Ani ah chu cu Ahab ah hta ah kyak ci, ani cu Ahab ah mäih ah Israel ghangpughang gui ah mi shetnak bäng cu läk ci. Ani naw Bawipa hnungtuk ne katnak bik ci,

¹⁹ cung phi Bawipa naw Judah m’di vai cu kä ng’ya hlük ci, a i ah kyasei ci ung, ani naw a changshäm David am, ani ah hta ng’shon gui naw ami uk lä vai ah shaitak a bi pyi ah kyak ci.

²⁰ Jehoram naw a uk yah ung Edom naw Judah cu hnungtuk püi neta, amät uk ciah kho ah kya lawk ci.

²¹ Cun ah kyasei Jehoram naw a yatha gui avan pawngpüi ne Zair gawnu ah lawk ci, a cu ah Edomit gakap gui naw koi gui ci gui. Khomü ah ani la ani ah yatha gabawi gui naw ngami müt gui ne phyawn u sei a gakap gui cu püi ne ami im ah hteit ba ci gui.

²² Edom cu cun ung tün ne Judah ungka amät uk ciah kho ah kya lawk ci, cun sangung Libnah mang gaw naw phi hnungtuk lawk ci.

²³ Jehoram ah abi gui phung cu Judah Ghangpughang gui ah a mawng guk ah kyak ci.

²⁴ Jehoram cu si sei, David mang gaw, mang gui ah phuh hmun ung phuh ci gui, ani ah hta Ahaziah cu ghangpughang ah kya ba ci.

Judah Ghangpughang Ahaziah

²⁵ Ahab ah hta Joram naw Israel ghangpughang ah kya ne a uknak a kum gha lei goi nak ung, Jehoram ah hta Ahaziah cu Judah ghangpughang ah kya lawk ci,

²⁶ Cun yah ung ani cu a khokum m’kum lei goi lawk ci, ani naw Jerusalem ung om ne kum ät ung uk ci. Ani ah nu cu Athaliah, Ghangpughang Ahab ah hta, Israel ghangpughang Omri ah tu ah kyak ci.

²⁷ Ahaziah cu ghangpughang Ahab awn ng’kawi cang nak awn mätyah ah kya ne, Ahab ah kyong chang gui ah bi ah mäih ah ani naw Bawipa hnungtuk püi ne katnak bik ci.

²⁸ Ghangpughang Ahaziah cu Israel ghangpughang Joram awn ng’awm neta, Siria ghangpughang Hazela cu tuk ci goi. Gakap gui naw Kilead kho Ramoth cu tuk ci gui, Joram cu ng’tuk nak ung leim ci.

²⁹ Ani cu a leim m’tui khai ah Jezreelaa mang gaw ah hteit ci, Ahaziah phi ani teng düt khai ah a cu ah hteit ci.