2 GHANGPUGHANG GUI 7 - Cho Bible Common Language 2016

¹ Elisha naw, “Bawipa naw a i a pyen cu ngai ä! Ngawi ung a tuhbäi chü a khin ung, Samaria ung, cung htang ak ni pi pye thum käcung htang pye chuk cu ngui a phe awn na hleih khai nei” cik ci.

² Ghangpughang m’täh ciah chang naw Elisha am, “Bawipa amät naw ang ghit ah ei kho a yuk aa sak ung phi, cun ah kä kya hning khai nei!” ci nak ci. Elisha naw, “A cun ah a kyak cu nang naw na hmuk khai, cun ung phi api phi nang naw kä na ei tuk khai” ci nak ci.

Sirian Gakap Gui Ng’hlat Ba ci gui

³ Kheilei ung gaw ciah chang phli cu Samaria gawnu m’kawt ah akpung ah om u ne ami mät ng’htau ci gui, “A i ah kyasei mikmi mi sih güt ung shin ung mi om vai ang?

⁴ Mang gaw kyong ah kä mi hteit man ci. Mang gaw kyong ah mi hteh ung ei cawi ne mi sik khai; Shin ung mi om ung phi mi sik khai. Cun ah kyasei Sirian gui ah phung ah mi hteit khai nei; ngami naw ami na ci gui khüt ung na ngawn gui khai gui, kä cun ung na m’ghin gui hngaw khai gui nei.”

⁵ Cun ah kyasei ngami cu api kho amü law yah ung Sirian phung ah hteit ci gui. Cun ung phi cä ah ami gawk yah ung a u phi kä om ci.

⁶ Bawipa naw Sirian gui ah ng’yak vai ah ng’se gui la yatha gui awn lawk ciah gakap ak chün ah mäih ah k’aw cu ng’thang sak khäta, Israel ghangpughang naw Hittit la Egypt ghangpughang gui ng’vat sei ami gakap gui naw tu law gui ciah ngai ci gui.

⁷ Cun ah kyasei acun ah mühun ung Sirian gui cu a mi ghin phyawn nak vai ah ami k’pyu gui, ng’se gui, laa gui la ami phung cu a cun ah nawng shüt ne hteit ba ci gui.

⁸ Cun ah chang phli cu phung a hangleng ung gawk law u neta suisak gui ami hmuh cu hteh püi ne thup ci gui. Cun kawn ah ng’hlat ba u ne, a hei pyu ung mä lut ba ci gui, a cun ah mäih ah bi ba ci gui.

⁹ Cun kawn ah ngami cu ami mät gui ng’cengcäk u ne, “Shin ah kä mi bik khai! Mikmi ung thu k’ni om ci, a cun kä mi k’üüp düt khai. Mikmi naw khongawi güt kä pyen ne mi om ung na m’kyuk gui khai gui. Mikmi hteit ge ne ghangpughang ah bawi gui am mi m’thein gui khai nei!”

¹⁰ Cun ah kyasei ngami naw Sirian phung cu hteh ta u ne, Samaria ah hteit ba u ne, m’kawt ung om ne gaw ngäng gui cu khü gui ci gui: “Keimi Sirian gui ah phung ah kami hteit ci, a i phi kä kami hmuk ci, kä kami ng’yak ci; ng’se gui la laa gui cu ami k’pawn ah täng ah om ci gui, k’pyu gui cu Sirian gui naw ami nawng ah täng ah om ci.

¹¹ Cun ah ng’thu cu gaw ngäng gui naw ng’shäu u sei mang im ah gawk ci.

¹² Cun ah khomü ah kyak ci, ghangpughang cu a ih nak ungka tho law neta a bawi gui pyen ah gui ci, “Sirian gui ah pawng püi cu kei naw ka ning m’thein gui khai! Shin ung ei-kho a vät cu ngami naw hmat ci gui, ngami naw ami phung cu hteh ta u neta, bung ah ng’thup ci gui. Mikmi naw ei vai shui vai ah mang gaw ungka lut law ne mi hteh ung, ak ghing ah na pha gui u ne, mang gaw phi khäm khai gui ah pawng ci gui nei” cik ci.

¹³ Ani ah bawi tumat naw pyen ne, “Shin ah mang gaw ung chang gui cu sih pyi ci gui ah chang gui ah mäih ng’yiin ci gui nei. Cun ah kyasei k’pawih ba ciah ng’se hma awn chang gui mi tüi khai nei, cun ung a i ah kyak ci, cicu mikmi naw mi hmuk khai.”

¹⁴ Ngami naw chang gui ghü u neta, ghangpughang naw yatha hnih ung m’cäi ne Sirian gakap gui a i ah ami kyak, teng gui vai ah m’cäi ne tüi gui ci.

¹⁵ Cun ah chang gui cu Jordan tui güt ah hteit ci gui, lam pum ung suisak gui la a i bawi gui cu Sirian gui naw ami dawng nak ung m’chu shüt u sei hmuk ci gui. Cun kawn ah ngami cu hteit ba ne ghangpughang am m’thein ba ci gui.

¹⁶ Samaria ung chang gui cu ng’güüt ne dawng law u ne Sirian phung cu guttep ci gui. Cun kawn ah Bawipa ah pyen ah mäih ah cung htang akni pi pye thum käcung htang htang-pye chuk cu ngui a phe ciah yoi ci gui.

¹⁷ Cun ah kya law khäta Israel ghangpughang naw mang gaw m’kawt cu amät ngäng man ciah a cun ah bawi am uk sak ci. Cun ah bawi cu chang gui naw kai na käläk u sei a cun ung sik ci. Cun cu ghangpughang naw a hmuh law yah ung Elisha naw a pyen ah mäih ah kyak ci.

¹⁸ Elisha naw ghangpughang a pyen nak cu “A ngawi ung a cun ah khin ung cung htang akni pye thum käcung, htang pye chuk cu ngui a phe ah Samaria ung yoih vai” ci sei,

¹⁹ cun cu bawi naw m’shang ne, “Cun cu kä kya hning khai — Bawipa amät naw ang ghit ah ei kho a yuk aa sak ung phi kä kyak khai!” cik ci. Elisha naw pyen ba ne, “Nang naw cun cu na hmuk khai, cun ung phi api ah phi ei cu kä na ei tuk khai.”

²⁰ Cun cu ani ah khan ah akcang ah gawk lawk ciah kyak ci — ani cu sik ci, mang gaw m’kawt ung sik khai ah chang gui naw ami kai nak ah kyak ci.