2 GHANGPUGHANG GUI 6 - Cho Bible Common Language 2016

Ghei Ami gah Ba ah Mawng

¹ Hnüüp ät ung Elisha ah aka ung om ciah prophet gui naw ami pyen law cu, “Kami om nak ah hmun cu yaw hta aih ci!

² Jordan ah hteit ne sing kami chuk vai ah na k’bäi gui ä, cun ung keimi naw kami om nak vai kami co hning khai nei” cik ci gui. Elisha naw, “Ä ya” cik ci.

³ Ngami ungka tumat naw a täng ah a hteh tu vai pyen ci; ani naw yum sei,

⁴ ngami cu a täng ah hteit ci gui. Ngami cu Jordan ung gawk u neta, tün ne bi lawk ci gui.

⁵ Tumat naw sing ghing a chuk yah ung, ang ghit ah ani ah ghei cu tui yung yu kya vük ci. Ani naw, “Saya aw, a i ah ka kyak lawk khai ang? Shin ah ghei cu ka ng’vah te nei” cine Elisha am m’thein ci.

⁶ Elisha naw, “A hawn ung ang ayu kyak vü?” cine ng’shik ci. Cun ah chang naw a yu kyak vü nak cu m’hnuh khäta, Elisha naw sing chüng ne, tui ung yuk sük ne, ghei cu ng’phon sak neta,

⁷ “Yuk la ba ä” cik ci. Chang tumat naw kawp ne yuk la ba ci.

Sirian Gakap gui Hnim ci gui

⁸ Siria ghangpughang cu Israel awn ng’tuk ci gui. Ani naw a bawi gui ng’ge püi gui neta, phung ami tuk nak vai ah hmun cu ghü ci.

⁹ Cun ung phi Elisha naw Israel ghangpughang am ng’thu m’khäh ci, a cun ah hmun ah pei ah kä a hteh vai ah m’thein ci, a i ah kyasei ci ung Sirian gui cu a cung ami mah ah phäh ah kyak ci.

¹⁰ Cun ah kyasei Israel ghangpughang naw a cun ung om ciah chang gui cu m’cäi gui ci, cun ah kyasei ngami cu ng’ngäng ge ne om ci gui. A shin ah mäih cu akda vei kya law pyi ci.

¹¹ Sirian ghangpughang cu a shin ah phäh ah anghtei ah thüisei neta; ani naw a bawi gui cu khü gui ne ng’shi gui ci, “Nangmi ungka, a u ang Israel ghangpughang täng ah a kyak tu?”

¹² Tumat naw pyen ne, “Ka bawi aw, a u kä kya tuk ci nei” cik ci. Prophet Elisha naw na mät ah kyong ah na pyen gui phi Israel ghangpughang am m’thein ci nei” cik ci.

¹³ Ghangpughang naw, “Ani a hawi ang a om, shui vä, ani ka phak khai nei” cik ci. Elisha cu Dothan ah a om ah mawng m’thein u khäta,

¹⁴ ani naw gakap akdäm cu ng’se gui la yatha gui awn tüi gui ci. Ngami cu cun ah gawnu ah mü ung gawk u neta, koi khüp ci gui.

¹⁵ A ngawi ung khongawi hta Elisha ah changshäm cu tho law ne, im ah k’pung ah hteit neta, ng’se gui, yatha gui awn gawnu koi ciah Sirian gakap gui cu hmu gui ci. Ani cu Elisha ah law ba neta pyen ci “Mikmi cu mi ng’yiin pyi ci nei, a i ah mi kyak khai ang?”

¹⁶ Elisha naw, “Kä nami kyih en vai nei, ngami täng ah om ciah ta bä pi cicu mikmi täng ah om ci nei.

¹⁷ Cun kawn ah ani cu taigü ne, “Bawipa, ani ah mik cu, m’dei sak ne, hmuh sak ä!” cik ci. Ani ah taigü cu Bawipa naw ngaih pe sei, Elisha ah changshäm naw teng neta, khogui yung cu ng’se gui la yatha gui ah mei naw küm sei Elisha cu avan naw koi ci gui.

¹⁸ Sirian gui naw tu law u khäta, Elisha naw taigü ne, “O Bawipa, shin ah chang gui ami mik m’dauh sak gui ä!” cik ci. Bawipa naw ani ah taigü cu ngaih pe ne, ami mik cu m’dauh sak gui ci.

¹⁹ Elisha naw ami om nak ah hteit ne a pyen cu, “Nangmi lam nami hma ci nei, shin cu nangmi naw nami shui ah gawnu ah kä kyak ci nei. Kei na läk vä, kei naw nami shui ah chang ah om nak ah ka ning hteh püi gui khai nei” ci neta Samaria ah hteh püi gui ci.

²⁰ Mang gaw ung ami luh law yah ung Elisha cu taigü ne, “Bawipa, ami mik m’dei sak gui ne, hmuh sak gui ä” cik ci. Bawipa naw ak taigü cu ngaih pe ne; ami mik m’dei ba sak gui khäta, ngami cu Samaria gaw kyong ah om ci gui ah hmuh lawk ci gui.

²¹ Israel ghangpughang naw Sirian gui cu hmu law gui neta Elisha cu ng’shik ci, “Bawi aw, shin gui ka ngawn gui vai ang? Ka ngawn gui vai ang?”

²² Ani naw, “Ka nei, ng’tuk nak ung pha gui ah gakap gui cu na ngawn gui vai kya ne maa. Ei vai awk vai pe gui neta, ami ghangpughang ah hteh ba sak gui ä” cik ci.

²³ Cun ah kyasei Israel ghangpughang naw aknui ah tu m’bei gui neta, ami ei awk pyi kawn ah Siria ghangpughang ah tüi ba gui ci. Cun ung tün ne Sirian gui naw Israel kho cu kä tuba ci gui.

Samaria Ami Khaai ah Mawng

²⁴ Api sho hta khäta, Siria ghangpughang Benhadad naw a gakap avan awn Israel tuk vai law ne Samaria mang gaw cu khaai ci.

²⁵ Cun ah kya ne mang gaw kyong ah ei vai maih ne khak aih sei laa ah lu tumat ngui cheitkip, ng’yungsu akhawk ngui phe hma ah kyak ci.

²⁶ Israel ghangpughang cu mang gaw k’paang pei ah a hteh shüi sangung, hnumi tumat cu m’lau ci, “Ka bawi aw, na m’htei ä!” cik ci.

²⁷ Ani naw m’shang ne, “Bawipa naw kä a ning m’htei ah a kyak ung, kei naw a i ka ning pe hning khai aw? Htang den baw, sapyit tui baw kei api om ne ang?

²⁸ Nang ah na yai nak cu a i ang? Ani naw, “Yanta shin ah hnumi naw, kei ah hta cu ei neta ani ah hta mä a ngawi ung ei vai ah pyen ci.

²⁹ Cun ah kyasei kei ah hta cu shong ne kani ei ci. A ngong ani ah hta mä ei vai ah kei naw ka pyen nak ci, cun ung phi ani naw a hta cu thup ci!” cik ci.

³⁰ Ghangpughang naw cun ah ng’ya neta, thüi aih ne a sui cu k’teek ci. A cun ah paang pei ah om ciah chang gui naw ani cu htu ah kyong täng sui k’she sui sei hmuk ci gui.

³¹ Ani naw, “Khohni kä ah hang luh pha ung Elisha ah lu kä a pit ah a kyak ung Khanpughi naw na m’shih sä!” cine ng’taam ci.

³² Cun kawn ah Elisha cu phak khai ah chang tüi ci. Cun sang ung Elisha cu ang vaihta gui awn a täng ah ngo ne im ah om ci. Ghangpughang ah chang tüih kä a gawk law pha ung Elisha naw angvaihta gui a pyen nak gui cu, “Chang ngawn ciah chang naw kei na ngawn khai ah chang tüi lawk ci nei! Tuhbäi, shin ung a gawk law ung, shoh khai ne, ani kyong ah kä nami luh en sak vai nei. Ghangpughang amät cu ani ah hnu ah gawk lawk khai nei.

³³ Ani cun ah ang thu vai am, ghangpughang gawk law neta, “Shin ah yaica nak mikmi ah khan ah gawk law sak cicu Bawipa ah kyak ci nei! Ani naw a i baw a bi law vai cu a i ah kyasei kei naw ka ngäng lä vai ang?” cik ci.