2 GHANGPUGHANG GUI 5 - Cho Bible Common Language 2016

Naaman Agai ah Mawng

¹ Naaman cu Siria gabawi ah kyak ci, Siria ghangpughang naw a hlüng ah achang m’sui, am hni ah kyak ci, a i ah kyasei ci ung Bawipa naw Sirian gakap gui am ani ung näng nak a pek gui ah phäh ah kyak ci. Ani cu dämduh ciah gakap ah kyak ci, cun ung phi ani cu kyih vai kyak ciah kheilei ung gaw ci.

² Hnü ät ung Sirian gui naw Israel hnungtuk ne ami tuk nak ung, Israel hnumihta tumat cu law püi ci gui, ani cu Naaman ah chu ah changshäm ah kya lawk ci.

³ Hnüüp ät ung ani naw abawinu am, “Kei ah ka bawi cu Samaria ah om ciah prophet ah a hteh vai ka ng’ya hlük ci nei! Ani naw a gaw nak cu gai sak khai nei” cik ci.

⁴ Naaman naw a cun cu ng’ya neta, ghangpughang ah hteit ne, hnumihta ah pyen cu m’thein ci.

⁵ Ghangpughang naw, “Israel ghangpughang ah hteit ä, shin ah ca hteh püi ä” cik ci. Cun ah kyasei Naaman naw ngui pit phia phia thumkip, ghui pit phia phia chukkip la sui k’ni ng’yung gha hteh püi ne hteit ci.

⁶ A cun ah ca phat khäta, “Shin ah ca awn ka yungbawi Naaman ah mawng cu ka ning m’thein ci nei. Nang naw a gaw nak na gai sak vai ah ka ng’ya hlük ci nei” ciah om ci.

⁷ Israel ghangpughang naw ca cu phat neta, a sui cu teek ne, “A hawcha ah shin ah chang kei naw ka gai sak vai ah Siria ghangpughang naw ngaih u ci ang? Kei cu sih nak la ghin nak ah huham awn om ciah Khanpughi ah na ngai ne ang? Shin cu kei a na ghüh hlawh tu ah kyak ci nei” cik ci.

⁸ Cun gui cu prophet Elisha naw ng’ya neta, ghangpughang am ng’thu m’khäh lawk ci, “A i ah kyasei nang na thüi ang? Cun ah chang cu tüi law ä, Israel ung prophet a om cu kei naw ka m’dang khai nei!” cik ci.

⁹ Cun ah kyasei Naaman cu ang se gui la yatha awn hteit ne Elisha ah im m’kawt pei ah ng’düm ci.

¹⁰ Elisha naw changshäm tüi law ne, Jordan tuinu ah hteit ne chih vei angsi vai ah m’thein sak ci, cun ung a gaw nak maih yüm yüm khai nei cik ci.

¹¹ Naaman cu anghtei ah m’lungshe neta, “Ani cu lut law ne, Bawipa a Khanpughi ah taigü ne, akhei nak ah khan ah a kut väng ne, kei na gai sak khai ah ka ngai ci nei!

¹² Damaskas ah Abana la Pharphar tuinu goi cu Israel ah tuinu ah ta ni tuba ciah kä kya ne ang? A cun ung kei ng’si ne ka gai hning ciah maw” cik ci.

¹³ A changshäm gui naw a om nak ah law u neta ami pyen cu, “Prophet naw khak khai a ning bi sak ung phi nang naw na bi vai kyak ci, tuhbäi na mät tui ung ng’si ne na gai vai ah a pyen ah phäh ah a i ah kä na bi hning vai ang?”

¹⁴ Cun ah kyasei Naaman cu Jordan tuinu ah hteit ne chih vei tui ung ng’hnim ci, Elisha naw a pyen ah mäih ah bik ci, ani cu akni ah gai ci. A sa cu a hmawhta ah mäih ah theek ne gai ci.

¹⁵ Ani cu achang gui avan awn Elisha ah law ba u neta, “Tuhbäi kei naw ka hmat pyi ci, a hei Khanpughi kä om ci, Israel Khanpughi bäng om ci nei; bawi aw ka yei aih ci nei, kei ah m’cümhnah nak gui cu na dou pe ä” cik ci.

¹⁶ Elisha naw, “Abii ka bi ah ghing ciah Bawipa ung ka ng’taam ci, m’cümhnah nak cu kä ka lak khai nei” cik ci. Naaman naw a dou vai ah pyen aih ci, cun ung phi ani naw kä dou ci.

¹⁷ Naaman naw, “Nang naw ka m’cümhnah nak kä na lak ah a kyak ung laa hnih ah phuih vai ah khomdek cu ka im ah ka hteh püi vai ah, na hteh püi sak ä, a i ah kyasei ci ung tuhbäi ung tün ne, khawihnah, m’khih ne khawihnah nak cu Bawipa ah kawn ah a i Khanpughi, m’khih ne khawihnah nak cu Bawipa ah kawn ah a i khanpughi am phi kä ka dou thak khai nei.

¹⁸ Cun ah kyasei Siria khanpughi ah om nak Rimmon Taigüim ah ghangpughang khah püi ne ka khawihnah tu cu Bawipa naw na m’gein khai ah ka ng’ngaih u ci. Akcang ah Bawipa naw na m’gein khai nei!”

¹⁹ Elisha naw, “Dimdeeih sei hteit ba ä” cisei Naaman cu hteit ba ci. Ani akshou nu ah kä ah hteh ba pha ung,

²⁰ Elisha ah changshäm Kehazi naw amät ng’htau ne, “Ka bawi naw Naaman ah a i phi kä dou ne hteh ba sak ci! Sirian naw a pek cu ani naw a dou ah khin te ci. Ghing ciah Bawipa ung kei naw gawt ne buuk neta ani ung a i baw ka lak khai” cik ci.

²¹ Cun ah kyasei ani naw Naaman cu gawit lawk ci. Naaman naw chang tumat naw a gawit law cu hmu neta, ani hmuk khai ah a yatha ungka, kyum law ne, a i nei a hma?” cine ng’shik ci.

²² Kehazi naw, “Ka nei, cun ung phi a tuhbäi ng’lung, Ephraim khomhtung ah hnih lawk ciah prophet ng’bum cu gawk law u sei, ka bawi naw ka ning m’thein gui vai pyen ci. Ngami am nangmi naw ngui pit phia thumkip la suinu ni ng’yung goi cu nami pek gui vai ah ng’ya hlük ci nei” cik ci.

²³ Naaman naw, “Na bä ni, ngui pit phia chukkip cu la ä, cine k’bäi ne bi neta, ngui cu ng’ip goi ung m’khäp ne khit neta, pe gui ne, a changshäm hnih am suinu ng’yung goi phi pe gui neta, Kehazi ah ma ung hteh sak gui ci.

²⁴ Ngami cu Elisha ah om nak khomhtung ah gawk u neta, Kehazi naw ng’ip goi cu chang ne im kyong ah luh püi ci. Cun kaw ah ani naw Naaman ah changshäm gui cu tüi ba gui ci.

²⁵ Ani cu im kyong ah lut ba khäta, Elisha naw ng’shik ci, “A hawi na hteit ci ang?” Ani naw, “A hawi kä ka hteit ci nei” cik ci.

²⁶ Cun ung phi Elisha naw, “Cun ah chang nang ning hmuk khai ah yatha ungka, akyum law yah ung kei cu ng’mümcha awn acun ung ka om ciah kä kya se ang? Shin cu ngui ni, suinu ni, oliv-dum, sapyit dum ni, htome ni, seipat ni, changshäm ni dou nak vai ah akhin ah kä kyak ci nei.

²⁷ Tuhbäi Naaman ah gaw nak cu nang ah khan ah gawk sä, nang la nang ah hta ng’shon cu ngawi yä a cun ung gaw vä!” cik ci. Kehazi cu a hteh ba vai am, ani ung gaw nak gawk sei ani ah vun cu khüi toi ah mäih ah bawk ci.