2 GHANGPUGHANG GUI 4 - Cho Bible Common Language 2016

Elisha naw Dukhaih ciah Hmeinu M’htei ci

¹ Prophet gui ungka tumat ah hmeinu cu Elisha ah law neta, “Saya aw, kei ka cei cu sik ci nei! Na hmat ah mäih ah ani cu Khanpughi kyih aa ciah kyak ci, cun ung phi ani naw ngui apu nak ah chang naw law ne, apu ah phäh ah ka hta goi cu hteh püi ne shäm goi khai ah pyen ci nei” cik ci.

² Ani naw, “A i ka ning bi pek vai ang? Na im ung a i ang a om, na m’thein ä?” cik ci. Hmeinu naw, “A i kä om ci, oliv-situi k’am hta tumat bäng om ci” cik ci.

³ Elisha naw, “Nami im pei yung ah hteit ne k’am a ghawng na gah phung nami ng’vah vai.

⁴ Cun kawn ah nang la na hta gui im kyong ah lut ba u ne, shoh khai u neta, k’am gui ung situi nami kei vai. Be lawk ciah k’am phung aphe ah nami hmoh vai” cik ci.

⁵ Hmeinu ah a hta gui cu kyong ah lut ba ne shoh khai u neta, situi k’am hta ungka, a hta gui ah law püi ah k’am avan ung situi kei ci gui.

⁶ K’am avan ung be khäta, ani naw, k’am om ba ne ang, cine ng’shi gui ci, a hta tumat naw, kä om ba ci nei, ci sei, situi cu ng’düm ci.

⁷ Hmeinu cu ng’thu m’thein ciah prophet Elisha ah hteit ba khäta, “Oliv-situi cu yawi ne, na pu avan thung ä, k’pawih ciah ngui awn, namät la na hta gui ah hnun m’ghin vä” cik ci.

Elisha la Shunem ah ka Bühmang ciah Hnumi

⁸ Hnüüp ät ung Elisha cu bühmang ciah hnumi ah om nak Shunem ah hteit ci. Ani naw khü ne ei m’bei tuk ci, cun ung tün ne, Shunem ah a hteh päng ung a cun ah hnumi ah im ah ei ei tuk ci.

⁹ Cun ah hnumi naw a cei am, “Shin ah chang shi ah a shäng shäng lawk ciah chang cu theingciim ciah chang ah kei naw akcang ah ka hmat ci.

¹⁰ Im khan ah akhan hta tumat mi cawh pek khai, ih phak ni, tawnglang ni, ngoh nak ni, mei im ni mi tha pek khai, cun ung ani a law päng ung a cun ung om hning khai” pyen nak ci.

¹¹ Hnüüp ät ung Elisha cu Shunem ah law ba neta akhan ah hteit ne ng’düm ci.

¹² Ani naw achangshäm Kehazi am cun ah hnumi cu khü sak ci. Ani law khäta,

¹³ ani naw Kehazi am, “Mi law ba päng ung mi ng’yak hlü ana pek tak gui ah khüikha nak avan ah phäh ah kei naw a i ka bi pek vai ang yak hlü cu nang shi vai. Kei naw ghangpughang ah baw, gabawi ah baw hteit ne ng’thu ni ka pyen pek vai cu ng’ya hlü hman khai nei” pyen nak ci. Cun ah hnumi naw, “Kei shin ung ka mät ah chang gui ah ng’lung ah ka ng’yak hlü avan küm ci nei” cik ci.

¹⁴ Elisha naw Kehazi cu ng’shi ba ne, “Cun kawn ah mä a i nei ka bi pek vai a om” cik ci. Ani naw, “Ani ung a htapa kä om ci, a cei phi a ghipanu ah kyak ci nei” cik ci.

¹⁵ Elisha naw, “Shi ah a law vai ah m’thein ä” cine k’bäi ci. Ani cu law ne m’kawt pei ah ng’düi khäta,

¹⁶ Elisha naw pyen nak ci, “Hneng kum a tuhbäi ah a khin ung nang naw na kut ung htapa cu nak pawm khai nei” cik ci. Ani naw pyen ba ne, “Oh, na bä ni, Bawi, kei kä na m’hleei ä. Nang cu Khanpughi ah chang nei!” cik ci.

¹⁷ Cun ung phi Elisha naw a pyen ah mäih ah a hnengkum a cun ah akhin ung ani cu pamihta ah hta lawk ci.

¹⁸ Khokum sho hta khäta geit khäm khin ung, khongawi ät ung a hmaw cu, geit khäm ci gui awn a täng ah loma ah om ciah apa ah hteit ci.

¹⁹ Ang ghit ah ani cu apa ah ma ah m’lau ne, “Ka lu na vei! Ka lu na vei!” cik ci. Apa naw achangshäm am, “A hmaw chang ne anu ah hteh püi ba ä” cik ci.

²⁰ Changshäm naw a hmaw cu anu ah om nak ah hteh püi ba sei, anu naw a khaw khan ah m’shän ne, khaw hnüüp law a sih güt ung om püi ci.

²¹ Cun kawn ah ani naw Elisha ah khan ah chang ne hteh püi neta, ih phak ung m’shän ne, shoh awn hei khai shi ci.

²² Cun kawn ah ani naw a cei khü neta a pyen cu, “Changshäm tumat cu laa awn m’khah ne tüi law ä, kei cu prophet Elisha ah ka hteit hlük ci nei, ka law ba yäk khai nei” cik ci.

²³ A cei naw, “A i ah kyasei tuhngawi na hteh vai ang? Tuhngawi cu kyin hnüüp käcung cha thei pawi hnüüp ah kä kyak ci nei” cik ci. Hnumi naw, “Bäi khai nei” cik ci.

²⁴ Ani naw alaa ung ngoh nak taih neta, achangshäm cu pyen nak ci, “Laa cu gai khai ah k’tut ä, kei naw a kyäp ah a hteh vai kä ka pyen ah khoi ung kä na shokshü en vai nei” cik ci.

²⁵ Cun ah kyasei ani cu pawng ne, Elisha ah om nak Karmela M’htung ah hteit ci. Elisha naw ani a law cu aksho nak ah ka naw hmu neta, achangshäm Kehazi am, “Teng ä, Shunem ah ka hnumi lawk ci nei!

²⁶ Ang ghit ah ani ah hteit ne, ani ah khan la, acei ah khan, a hta ah khan ah a päng avan cu bä ciang ciah ng’shi ä” cik ci. Hnumi naw Kehazi am, a päng cu bä ci nei,

²⁷ Cun ung phi Elisha ah a gawk law kawn ah ama ah kawp ne a khaw cu k’pang ci. Kehazi naw k’täm hlük ci, cun ung phi, Elisha naw, “Nawng en ä, ani am lung a thüi nak cu nang naw kä na hmu ne ma? A cun ah mawng cu Bawipa naw a i kä na m’thein ci nei” cik ci.

²⁸ Hnumi naw ani am, “Bawi aw, kei naw htapa ka ning thäh ne ang? A kholä kä ka ngaih u khai nei, cine ka pyen ciah kä kya ne ang?” cik ci.

²⁹ Elisha cu Kehazi lam ah ng’hlat ba neta, “Ang ghit ah ka ng’shopawng la ne hteit ä. Lam ah a u phi kä na yavaih vai, ning yavaih ci a om ung phi, aksho kä na ng’hta en vai. Cun ah im ah ang düng ah hteit ne ka ng’shopawng cu a hmaw ah khan ah na taih vai nei” cik ci.

³⁰ Hnumi naw Elisha am, “Kei naw ka bekhüt nak ah ghing ciah Bawipa la nang ung ka ng’khän ci nei, nang kä na hteh tu ung kei kä ka hteit ba khai!” cik ci. Cun ah kyasei ngani cu a täng ah hteit ci goi.

³¹ Kehazi cu ana hteit ma ne, Elisha ah shopawng cu ak hmaw ah khan ah taih ci, cun ung a i k’aw, a ghin ba mawng cu kä ng’dang ci. Cun ah kyasei ani cu Elisha ah law ba neta, “A hmaw kä tho lawk ci nei” cik ci.

³² Elisha cu gawk law ne, amät akhan kyong ah valut neta hmaw cu ih phak khan ah si ne ng’yän sei hmuk ci.

³³ Ani naw shoh khai neta, Bawipa ah taigü ci.

³⁴ Ani naw ak hmaw ah khan ah yuk bawk shi neta, a hmaw ah a m’gawn ah khan ah am gawng, amik ah khan ah amik, a kut ah khan ah a kut yuk tha ci. Cun ah a hmaw ah khan ah yuk bawk khäta, a hmaw ah pumsa cu awh law ba ci.

³⁵ Elisha cu tha ba ne, akhan kyong ah hteit shüi ci, cun kawn ah law ba ne a hmaw ah khan ah ng’bawk ba mä ci. A hmaw chih vei ng’yeet neta, amik m’dei law ba ci.

³⁶ Elisha naw Kehazi cu khü neta, a hmaw ah nu cu khü sak ci. Ani law khäta a pyen nak cu, “Shin ung na htapa.”

³⁷ Ani cu Elisha ah kho pei ah a hmai m’dek ung gawk khai ah kawp neta; a hta chang ne hteit ba ci.

Cäi-aih Vai Ahei Hnih

³⁸ Hnü ät ung ami khaw avan ung ei vai maih sei Elisha cu Kilkal ah law ba ci. Ani naw prophet bum gui am thei gui yah ung, achangshäm am, k’am nu am kawm kyäng ne antui ami shon vai ah m’thein ci.

³⁹ Ngami ungka tumat cu thui an shui khai ah lo ah hteit ci. Ani naw k’pya um ng’shun cu hmu neta, ani naw a phuih hning ah a phuih vai um cu k’bit ci. Ani naw cun cu law püi neta, lem ne antui ung shum ci, cun cu um kha ah ani naw kä hmat ci.

⁴⁰ Antui cu hmin sei ei vai kyak ci, cun ung phi ngami naw ei shüm u neta, Elisha am m’thein ci gui, “Shin cu m’guui vai kyak ci nei, kä ei vai nei.”

⁴¹ Elisha naw m’htut den api k’thäh gui neta, k’am ah khui ah yuk shum neta, pyen ci, ngami ah phäh ah antui lawh pe gui vä,” cik ci. Cun kawn ah a i chei ci kä om ba ci.

⁴² A hei akhin ung Baal Shalishah ah ka chang tumat cu Elisha ah law ne, acu kum ami khäm htük ah htang awn pyan ah m’htut pum m’ku cu avui ami ah thai cu law püi ci. Elisha naw a cun ah m’htut gui cu prophet ng’bum gui am bei gui vai ah pyen ci,

⁴³ Cun ung phi ani naw, “Chang phia ah phäh ah shin cu ng’büh khai ah na ngai ne ma?” cik ci. Elisha naw, “Ami ei vai ah pe gui ä, a i ah kyasei ci ung ngami naw ei khai gui, cun kawn ah phi k’pawih ba khai cine, Bawipa naw pyen ci nei” cik ci.

⁴⁴ Cun ah kyasei changshäm naw ei cu m’bei gui ci. Cun kawn ah Bawipa naw a pyen ah mäih ah ami van naw ami ei kawn ah phi k’pawih ba ci.