2 GHANGPUGHANG GUI 3 - Cho Bible Common Language 2016

Israel la Moab ah Ng’tuk

¹ Judah ghangpughang Jehoshaphat ah uknak a kum gha-lei-cheit nak ung, Ahab ah hta Joram naw Israel ghangpughang ah kya ne, Samaria ung om ne kum ghalei goi ung uk ci.

² Ani naw Bawipa hnungtuk püi ne katnak bik ci, cun ung phi ani cu apa ah mäih, kä cung anu Jezebela ah mäih aih ah kä shekha aih ci. Baala khawihnah nak vai ah apa naw a pyan ah a gup cu ani naw phutawn ci.

³ Cun ung phi ani naw ama ungka, Nebat ah hta ghangpughang Jeroboam ah mäih ah ani naw kä ng’düm ne, Israel gui cu katnak ung hteh püi gui ci.

⁴ Moab ghangpughang Mesha naw htome gui vuh ci, ani naw a kum tä sei Israel ghangpughang am htome hta 100,000 la htome 100,000 amu cu pe lawk ci.

⁵ Cun ung phi Israel ghangpughang Ahab a sih kawn ah, Mesha naw Israel cu ng’hnungtuk püi ci.

⁶ Ghangpughang Joram cu ang ghit ah Samaria ungka naw hteit ne gakap avan k’bum gui ci.

⁷ Ani naw Judah ghangpughang Jehoshaphat am ng’thu m’shäk ci, “Moab ghangpughang naw kei cu na hnungtuk püi ci nei; ani tuk vai ah kei ung na ng’dawn lawk khai aw?” cik ci. Ghangpughang Jehoshaphat naw, “Ä, ka lawk khai nei, kei cu nang ah pyen ah bi vai ah ka om ge ci nei, ka chang gui la ka ng’sela gui om ge ci nei.

⁸ A i täng ung hteit ne ng’tuk vai ang?” cik ci. Joram naw, “Mikmi cu lam shou ung hteit ne, Edom khawbung kan ne mi hteit khai nei” cik ci.

⁹ Cun ah kyasei Joram ghangpughang, Judah la Edom ghangpughang gui cu, pawng ne hteit ci gui. Ami hteh nak hnüüp chih law khäta tui maih sei, chang gui la ng’sela gui ami awk vai kä om ci.

¹⁰ Ghangpughang Joram naw, “Mikmi cu kä kya vai ci nei! Bawipa naw mikmi thum cu Moab ghangpughang ah kut ung na ap gui pyi ci nei!” cik ci.

¹¹ Ghangpughang Jehoshaphat naw, “Bawipa na ng’shi k’thäh pe gui khai ah prophet tumat mat shin ung kä om ne ma?” cine ng’shik ci. Ghangpughang Joram ah gakap bawi naw, “Shaphat ah hta Elisha om ci nei. Ani cu Elijah tawi ciah kyak ci nei.”

¹² Ghangpughang Jehoshaphat naw, “Ani cu prophet akcang nei” cik ci. Cun ah kyasei ngami thum cu Elisha ah hteit ci gui.

¹³ Elisha naw Israel ghangpughang a pyen nak cu, “A i ah kei naw ka ning m’hteihtang gui vai ang? Na nupa gui ah ng’shi man ah prophet gui cu hteit ne ng’shi gui ä.” Joram naw, “Ka nei! Keimi ghangpughang thum gui Moab ghangpughang ah kut ung na ap gui cicu Bawipa ah kyak ci nei” cik ci.

¹⁴ Elisha naw, “Abii ka bi ah ghing ciah Bawipa ung ng’taam ne ka pyen cu, Judah ghangpughang Jehoshaphat nang khawt püi ghangpughang cu kei naw kä ka chang m’sui vai sü ung, nangmi awn a i ka bi vai kä om ci nei.

¹⁵ Tuhbäi, tumkhawng cicu khü vä” cik ci. Tumkhawng ci naw tingtäng cu tum khäta, Bawipa ah huham cu Elisha ah khan ah gawk lawk ci,

¹⁶ Cun kawn ah ani naw, “Shin cu Bawipa ah thu pyen nei: shin ah lawng chawng cu avan kui ne co vä,

¹⁷ nangmi naw khokhi kho k’aa kä nami hmuh ung phi shin ah lawng chawng cu tui awn be khai nei, nangmi, nami vuhchah gui la nami seime gui ah awk vai tui da khai nei” cik ci.

¹⁸ Elisha naw k’täi ne, “Bawipa naw shin ah a bi vai cu yäi ci nei; ani naw Moabit gui ah khan ah näng nak phi ning pe gui khai nei.

¹⁹ Kiom ne khäng ciah ami mang gaw gui avan cu nangmi naw nami khäm khai nei; m’theih ciah ami sing gui avan cu nami chuk khai, ami tuihta gui avan phi nami be sak khai” cik ci.

²⁰ A ngawi ung kho ngawi hta, ami khawihnah nak man ah a khin ung Edom khaw täng ah ka tui long law ne, khohmun cu küm ci.

²¹ Ghangpughang thum naw tu gui khai ah ami law cu Moabit gui naw ng’ya u neta, likhim kawt hning ci phung aghi pi ungka naw a hmawpi ung khüt ciah chang avan cu pawng u ne khogii ung ng’bum ci gui.

²² A ngawi ung khongawi ami thawh law ung khohni cu tui ah khan ah pyü ne, tui cu si ah mäih sen ci.

²³ Moabit gui naw, “Cän cu si gui ah maw! Mi ga gui thum cu ami mät ng’tu u ne, ng’ngawn tuk ci gui kyak ci nei! Hteit ne, ami phung cu mi gut gui khai nei!” cik ci gui.

²⁴ Cun ung phi ngami cu ami phung ung gawk u khäta, Israel gui naw tu ne ana k’täm gui ci gui. Israel gui naw gawt ne k’täm gui ne, Moabit gui cu ngawn gui ci gui,

²⁵ ami mang gaw gui cu m’di ci gui. Ngami naw nik ciah ami lolai gui ami kan law ung Israel chang päng naw lung kaw ne lai ung abe güt ah ghawt ci gui, ngami naw ami tuihta gui cu ket sak u ne, m’theih ciah ami sing gui phi chu yawp ci gui. Ak hnu ah Kir Heres mang gaw bäng k’pawih ba sei yaili kawt ci gui naw khaai ne tuk ci gui.

²⁶ Moab ghangpughang naw ng’tuk nak ung a shum law cu hmat neta, khimcem kawt ciah gakap phia chih cu ghü ne, a ga gui cu güt gui ne dawng ne phyawng ne, Siria ghangpughang ah gawk vai ah k’tha nak ci, cun ung phi kä m’khüt hlawt ci.

²⁷ Cun ah kyasei ani naw a hnün ung ngo ba khai ah a hta ang vai pi cu la ne mang gaw k’paang khan ah taih neta, Moab Khanpughi cu khawihnah ci. Israel gui cu, kyikyawk u neta, mang gaw ungka ng’hlat ba u ne, ami khaw ah hteit ba ci gui.