2 GHANGPUGHANG GUI 2 - Cho Bible Common Language 2016

Elijah cu Khankho ah Kai ci

¹ Bawipa naw Elijah cu khokhi kuiphak awn khankho ah akai püi nak vai ah akhin cu gawk lawk ci. Elijah la Elisha cu Kilkala ka naw lawk ci goi.

² Lam ung ani hteh sang ung Elijah naw Elisha a pyen nak cu, “Shin ung tuhbäi ana om mä; Bawipa naw Bethela ah ka hteh vai ah ng’thu nak bäi ci nei.” Cun ung phi Elisha naw, “Ka bekhüt nak ah ghing ciah Bawipa la nang ah ma ah ng’taam ne ka pyen ci, kei naw kä ka ning hteh tak khai” cik ci. Cun ah kyasei ngami cu Bethela ah hteit ci gui.

³ A cu ah om ciah prophet bum gui naw Elisha hteh shi neta ng’shik ci gui, “Tuhngawi Bawipa naw, na bawi cu la lawk khai cicu na hmat ne ang?” Elisha naw, “Ä, ka hmat ci nei, cun ung phi cun ah mawng cu kä mi pyen khai nei” cik ci.

⁴ Elijah naw Elisha aw, “Tuhbäi shin ung om shüt ä; Jerikho ah ka hteh vai ah Bawipa naw thu nak bäi ci nei” pyen nak ci. Cun ung phi Elisha naw, “Ka bekhüt nak la ghing ciah Bawipa la nang ah ma ah ng’taam ne ka pyen ci, kei naw kä ka ning hteh tak khai” cik ci. Cun ah kyasei ngami cu Jerikho ah hteit ci gui.

⁵ A cu ah om ciah prophet ng’bum gui naw Elisha hteh shi neta ng’shik ci gui, “Tuh ngawi Bawipa naw na bawi cu la lawk khai cicu na hmat ne ang?” Elisha naw, “Ä, ka hmat ci nei, cun ung phi cun ah mawng cu kä mi pyen khai nei” cik ci.

⁶ Cun kawn ah Elijah naw Elisha pyen nak ci, “Tuhbäi shin ung om shüt ä; Jordan tuinu ah ka hteh vai ah Bawipa naw ng’thu nak bäi ci nei.” Elisha naw, “Ka bekhüt nak ah ghing ciah Bawipa la nang ah ma ah ng’taam ne ka pyen ci, kei naw kä ka ning hteh tak khai” cik ci. Cun ah kyasei ngami cu hteit u sei,

⁷ prophet hmakip naw Jordan ah khüt ne läk gui ci gui. Elijah la Elisha cu tuinu pei ah ng’düi ni sei, prophet hmakip cu ng’shawng pi pi ne ng’düi ci gui.

⁸ Cun kawn ah Elijah naw a savun suinu cu suut ne k’chaw neta, a cun awn tuinu that sei, tuinu cu ng’pai ci. Ani la Elisha cu m’dek hu ung kan ne cäga ah va kai ci goi.

⁹ Acu ah, Elisha am, “Kei a hei ah kä ka hteh pha ung, ka ning bi pek vai ah na ng’yak hlü cu na m’thein ä” pyen nak ci. Elisha naw, “Nang ah hnün ung ka bi nak hning vai ah na huham cu na gah tu sak ä” cik ci.

¹⁰ Elijah naw, “Cun ah ning pek vai cu khak ngai ci nei. Cun ung phi nang na om nak ung ka, kei ami na hteh püi law yah ung, na na hmuh ah a kyak ung, nang naw na gah khai nei; kä na na hmuh ah a kyak läi ung kä na gah khai nei” cik ci.

¹¹ Ngani cu hteit lai lai ne ani ng’htau sang ung; ang ghit ah meidäi yatha, meidäi ng’se gui ah kaih cu ani ng’lak ung gawk law ne, kuiphak ah khi ne, Elijah cu khankho ah hteh püi ci gui.

¹² Elisha naw hmu neta, Elijah cu kyap ne khü ci, “Kapa, kapa! M’gäi ne, Israel gui shungvong gui ci! Nang cu na ng’kawn pyi ci nei!” Cun kawn ah ani naw Elijah cu kä hmu ba ci. Elisha naw thüisei ne, a suinu cu hnih ah k’teek ci.

¹³ Cun kawn ah ani naw Elijah ungka ng’suut ne kya lawk ciah a suinu cu kaw neta, Jordan tuinu kem ah hteit ne ng’düi ci.

¹⁴ Ani naw Elijah ah suinu awn tui that neta a pyen cu, “Bawipa, Elijah ah Khanpughi cu a hawi ang?” Ani naw tui cu that ba mä ci.

¹⁵ Jerikho ah ka prophet hmakip gui naw ani cu hmu u neta, “Elijah ah huham cu Elisha ung gawk ci nei” cik ci gui. Ngami naw ani hteit ne hmu u ne, ama ah m’khuukdong u neta,

¹⁶ ami pyen cu, “Shin ung chang hmakip kami om ci, avan cu ak gai yah gui nei. Hteit ne nang ah bawi cu kami shui ba khai nei. Bawipa ah mümcha naw a chaan ah kyak khai nei, khomhtung khongnawi yung ah nawng shüt khai nei. Elisha naw, “Kaa, kä nami hteh vai nei” cik ci.

¹⁷ Cun ung phi ani naw a hteh sak gui güt ngami cu liing ci gui, chang hmakip naw hteit ne Elijah cu agüng abang ung hnüüp thum lüng ne shui ci gui, cun ung phi kä hmuk ci gui.

¹⁸ Cun kawn ah ngami cu Elisha ah om nak ah Jerikho ah ng’hlat ne law ba u khäta, ani naw, “Kä nami hteh vai ah kei naw ka pyen ciah kä kya ne ang?”

Elisha ah m’Dang ah Cäi-aih Gui Mawng

¹⁹ Jerikho ah ka chang amshah naw Elishah ah hteit neta, “Na hmat ah mäih bawi aw, shin cu mang gaw kyom ah kyak ci nei, cun ung phi tui kä ni sei chang gui ami m’gai yawih ci,” cik ci gui.

²⁰ “K’am ak thai ung m’shi api tha neta kei ah law püi vä” cine k’bäi gui ci. Ngami naw law püi ci gui,

²¹ Ani naw tui hta lawng ah hteit neta, m’shi cu tui ung lawn neta a pyen cu, “Shin cu Bawipa ah ng’thu pyen nei: Kei naw shin ah tui cu ka ng’ciim sak ci nei, cun kawn ah shin naw a u kä sih sak khai, a u ah m’gai phi kä yawih sak khai nei.”

²² Elisha naw acun ah a pyen ung tün ne, cun ah tui cu ng’ciim ci.

²³ Elisha cu Jerikho ungka naw Bethela ah hteit ci, lam ah gawnu ah ka a hmaw gui cu law u neta ng’pyan nak ci gui. “Alu k’de nu shin ungka a hei ah hteit ä” cine m’lau ci gui.

²⁴ Elisha naw ng’hlah shi gui ne, angküi ah teng gui neta, Bawipa ah ang ming ung taam gui ci. Cun kawn ah sing ghing hmu ah ka khawm anu goi lut law ni ne a hmaw phlikip-lei goi cu phyit ne htui gui ci.

²⁵ Elisha cu Karmela M’htung ah hteit neta, cun kawn ah Samaria ah hteit ba ci.