Biblia Todo Logo
Bib sou entènèt

- Piblisite -

2 GHANGPUGHANG GUI 16 - Cho Bible Common Language 2016


Judah Ghangpughang Ahaz
( 2Stn 28:1-2 )

1 Remaliah ah hta Pekah naw Israel ghangpughang ah kya ne a uknak a kum gha lei chih nak ung Jonathan ah hta Ahaz cu Judah ghangpughang ah kya lawk ci,

2 cun sangung ani cu a kum m’ku lawk ci, ani naw Jerusalem ung kum gha lei chuk ung uk ci. Ani naw a pughi ghangpughang David naw akni ah a bi cu kä läk ci, cun nak vaisü ung a Khanpughi, Bawipa naw kä a yeinak vai ah bik ci,

3 Israel ghangpughang gui ah bi gui cu läk ci. Israel gui ami kai law yah ung shin ah khaw ungka Bawipa naw ak täm gui ah ami ma ah chang gui ah shemshai ciah bilawh cu thei tu ne, amät ah hta cu mei awn m’khih ne douthak ah a gup cu khawihnah nak ci.

4 Khongyo khawihnah nak ah hmun ah kyak ciah m’htung khan, sing hnim ka yung ah Ahaz naw khawihnah nak la tui ng’ui m’khih cu douthak ci.

5 Siria ghangpughang Rezin la Israel ghangpughang Pekah naw Jerusalem cu tu ni ne khaai ci goi, cun ung phi Ahaz cu kä hnim hlawt ci goi.

6 (A cun ah a khin ung Edom ghangpughang naw Elah mang gaw cu k’pan ne, a cun ung om ciah Judean gui cu k’täm gui ci. Edomit gui cu Elath ung om u ne, tu ä om ci gui.)

7 Ahaz naw Assirian uktu Tiklath Pileser am chang tüi ne a pyen cu: “Kei cu na ngaih gep ah changshäm ah ka kyak ci. Siria la Israel ghangpughang gui naw kei law ne na tu lawk ci gui nei, law ne na gung law ä.”

8 Ahaz naw Taigüim ungka ngui la ghui gui, mang im ungka m’küm khawh gui la ne uktubawi am m’khäh ci.

9 Tiklath Pileser naw Ahaz ah khü cu k’cang na ne, a gakap gui awn law ne, Damaskas cu tu ne khäm ne, Ghangpughang Rezin cu ngawn ne, chang gui cu Kir ah hteh püi gui ne thawng chum gui ci.

10 Ghangpughang Ahaz cu uktu Tiklath Pileser cu hmuk khai ah Damaskas ah a hteh nak ah sonkiang tumat hmuk ci, ani naw a cun ah müi bä bä cu a püh kheh ah taigü Uriah ah m’khäh ci.

11 Uriah naw a cun ah mäih bä ah sonkiang cu pyang ne Ahaz kä a law ba pha ung ana pyi ci.

12 Damaskas ah a law ba lam ah Ahaz naw sonkiang cu pyan pyi ah kyasei hmuk ci,

13 Cun ah kyasei ani naw a cun ah khan ah seme m’khih ne khawihnah nak la htang-douthak nak cu bik ci, tui-douthak la khawtsheng-douthak nak ung asi awn yuk shawi ci.

14 Bawipa am vawipeh nak kyei sonkiang cu sonkiang ak thai la Taigüim ah ng’lak ah om ci, cun ah kyasei Ahaz naw cun cu sonkiang ak thai ah a siiptäng ah k’plon ci.

15 Cun kawn ah ani naw Uriah am; “Shin ah kei ah sonkiang am kawm cu khongawi lam ah m’khi-douthak nak, mühun lam ah htang-douthak nak, ghangpughang la chang gui ah douthak nak la chang gui naw sapyitui ami douthak nak ah nami mang vai. Khawihnah nak ah seime gui avan ah asi cu cun ah khan ah yuk lawn vai. Cun ung phi kyei sonkiang cu kei naw ka ng’cäbang nak vai ah nami na tha pek vai.”

16 Uriah naw ghangpughang ah thumkhän ah mäih ah bik ci.

17 Ghangpughang Ahaz naw kyei ng’hle gui cu la neta Taigüim ung mang ne, cun ah khan ah om ciah khawk gui phi a hei ah k’plon ci; ani naw kyei vantang gha lei goi ah a hnu ah om ciah kyei tuikan cun phi la neta lung ang nei ah khan ah tha ci.

18 Assiria uktubawi naw a yeinak vai ah Ahaz naw mangkiang pyan nak ah kiang cu Taigüim ung ka k’plon ne, ghangpughang ah Taigüim ung a luh nak phih khai ci.

19 Ghangpughang Ahaz ah bi phung phung cu Judah ghangpughang gui ah mawng ca uk ung guk ah kyak ci.

20 Ahaz cu si sei David ah mang gaw, mang gui ah ng’phuh nak ung phuh ci gui, a hta Hezekiah cu ghangpughang ah kya ba ci.

Cho Bible Common Language © Bible Society of Myanmar, 2016.

Bible Society of Myanmar
Swiv nou:



Piblisite