2 GHANGPUGHANG GUI 12 - Cho Bible Common Language 2016

Judah Ghangpughang Joash

¹ Israel ghangpughang Jehu ah uknak akum chih nak ung Joash cu Judah ung ghangpughang ah kya lawk ci, ani naw Jerusalem khokum phlikip uk ci. Anu cu Beersheba mang gaw ungka Zibiah ah kyak ci.

² Ani naw a ghin ah chuih Bawipa ah yeikyai nak vai ah bik ci, a i ah kyasei ci ung taigü Jehoiada naw am m’cäii ah kyak ci.

³ Cun ung phi, khongyo khawihnah nak ah hmun gui cu kä ami phyeet ah kya ne chang gui naw a cun ung khawihnah douthak ne ang ui gui m’khih ne phi khawihnah ci gui.

⁴ Joash naw taigü gui khü gui neta ng’thu k’bäi gui ci; Taigüim kyong ah khawihnah nak ung ngui gui, khawihnah nak ah phu ngui gui la ng’päiye pek tak nak gui cu ami gim vai ah pyen ci.

⁵ Taigü päng naw ami taigü pek gui naw ami law püi ah ngui cu ami khäm vai kyak ci, cun ah ngui cu Taigüim pyan nak ba ung, a hlü ah ciah ami mang ah kyak ci.

⁶ Cun ung phi Joash ah uknak akum m’ku lei thum güt ung taigü gui naw Taigüim a i phi kä pyang m’tham ci gui.

⁷ Cun ah kyasei ani naw Jehoada la a hei taigü gui cu khü gui neta ng’shi gui ci, “A i ah kyasei nangmi naw Taigüim kä nami pyan ang?” Tuhbäi ung tün ne nangmi naw nami gah ah ngui cu kä nami gim vai, nami ap gui vai, cun ung pyan m’tham nak gui vai ah kyak khai” cik ci.

⁸ Taigü gui naw ngui ami ap gui vai la Taigüim ami mät naw kä a mi pyan m’tham vai cu yum ci gui.

⁹ Jehoiada naw k’pen m’khüm tumat la ne aküp ung yuk vüt neta, Taigüim ung luh nak ah k’pat lam sonkiang pei ah tha ci. M’kawt ung bii bik ciah taigü naw khawihnah lawk ci gui ami van ah pek ah ngui gui cu pen m’khüm ung ghawn ci.

¹⁰ M’küm ung ngui ada law ah a kyak ung mang im bawi la taigütung naw law ne, ngui cu m’shüi ne khin ci gui.

¹¹ Ngui cu akni ah ami khei kawn ah Taigüim ung bii bik ciah a ng’vai pi am ap ci gui, cun ah ngui awn cokyang ci gui, im co ci gui,

¹² lung m’thout ci gui la lung aat ci gui am pe gui ci gui, pyan nak vai ah k’peen gui la lung gui phi hleih ci gui, a hei hlü ci gui avan ah phäh ah pek ci gui.

¹³ Ngui khap, khawk, phyungheng, meiceh la akei ngui, ghui ah phäh ah kä mang ci gui.

¹⁴ Cun cu bii bik ci cheng nak vai la pyan nak vai hleih nak vai ah mang ci gui.

¹⁵ Bi nak ung tängpang ciah chang cu htingling ci, cun ah kyasei ngui ah mawng k’thäh ne ng’shi vai kä hlü ci.

¹⁶ Thung sah nak vai ah douthak nak la katnak-douthak nak ah pek ah douthak nak gui cu k’peem m’küm ung kä tha ci gui; cun cu taigü ah kaa ah kyak ci.

¹⁷ Cun yah ung Siria ghangpughang Hazela naw Kath mang gaw cu tu ne khäm ci; cun kawn ah Jerusalem phi tuk khai ah k’bäi ci.

¹⁸ Judah ghangpughang Joash naw aka ung om ciah Jehoshaphat, Jehoram la Ahaziah gui naw Bawipa am ami ap ah khawihnah nak gui la amät ah douthak nak gui, Taigüim la mang im m’küm gui ungka ghui gui avan cu la neta Ghangpughang Hazael am m’cümhnah nak ah m’khäh ci, cun ah kyasei ani cu Jerusalem ungka a gakap gui ng’hlah püi ba gui ci.

¹⁹ Ghangpughang Joash ah bi phung phung cu Judah ghangpughang gui ah mawng ca uk ung guk ah kyak ci.

^20-21 Ghangpughang Joash cu a bawi gui naw kük net püi ci gui, cun gui ungka hnih, Shimeath ah hta Joyakar la Shomer ah hta Jehozabad naw, Jerusalem ah ak kyangtäng, Silla pigaw ah hteh nak lam pei ah m’dek nawt ung cawh ah im ung ani cu ngawn ci goi. Joash cu David ah mang gaw, mang ah phuh hmun ung phuh ci gui, a hta Amaziah cu ghangpughang ah kya ba ci.