2 GHANGPUGHANG GUI 11 - Cho Bible Common Language 2016

Judah Ghangpughangnu Athaliah

¹ Ghangpughang Ahaziah ah nu Ahtaliah naw a hta ami ngawn a hmat vai am, mang im kyong chang gui avan ngawn gui vai ah thukbäi gui ci.

² Ahaziah ah hta Joash bäng phyawn ci. Ani cu a hei gui awn a täng ah ami ngawn tu vai süte, anikho Jehosheba naw a gun ah kyak ci, ani cu ghangpughang Jehoram ah hta, Ahaziah ah ng’nam-be ah kyak ci. Ani naw acun la m’htei tuk cicu la goi neta Taigüim kyong ih phak ka ah Ahtaliah naw kä a hmuh vai ah thup sei, kä ami ngawn tu ah kyak ci.

³ Ahtaliah naw a uk yah ung Jehosheba naw ak hmaw cu m’htei ne khokum chuk ung Taigüim kyong ah a thuh ah kyak ci.

⁴ Akum chih nak ung taigü Jehoiada naw ghangpughangnu ngäng ciah bawi gui, mang gaw ngäng gui cu Taigüim ah khü gui neta, am hnüt bäi ah täng ah ami bi vai ah yum sak gui ne thukhän sak gui ci. Ani naw ghangpughang Ahaziah ah hta Joash cu m’hnuh gui neta,

⁵ shin ah ng’thukbäi gui cu pe gui ci: “Nangmi cu kyin hnüüp ung bi m’htei vai ah nami law ah a kyak ung, thum ah bum ung bum ät naw mang im nami ngäng vai;

⁶ bum ät naw Sur M’kawt a ngäng vai, bum ät naw m’kawt gui ah hnu ah m’kawt cu a ngäng vai.

⁷ Kyin hnüüp ung ng’bün ciah ng’bum goi naw Taigüim ung ng’düi ne ghangpughang ami ngäng vai.

⁸ Nangmi naw semnu kawt ne ghangpughang Joash cu nami ngäng lawk ci phung nami ngawn vai” cik ci.

⁹ Bawi gui naw Jehoiada ah m’cäi gui cu ngai u ne, ami chang gui cu ani ah law püi ci gui — cun gui cu kyin hnüüp ung ng’bün ci gui la abi vai om ci gui ah kyak ci.

¹⁰ Ani naw bawi gui am k’htei gui la shawi gui pe gui ci, cun gui cu David ghangpughang ah ka gui, Taigüim ung ami gim gui ah kyak ci,

¹¹ Ani naw khimsem kawt ciah chang gui, Taigüim a hmai täng ung ng’düih sak gui ne, ghangpughang cu ngäng sak gui ci.

¹² Cun kawn ah Jehoada naw Joash cu luh law püi ne, a lu ung mang lukhu k’bün ne, ghangpughang ah kawh ah thukhän ca cu pek ci. Cun kawn ah Joash cu phyuh theh ne ghangpughang ah ng’shäu ci gui. Chang gui naw ami m’ya k’phyawk u ne, “Ghangpughang a ghin kho ng’shäi sä!” cine m’lau ci gui.

¹³ Ghangpughangnu Ahtaliah naw gaw ngäng gui la chang gui ah m’lau cu ng’ya neta, ak ten ah chang gui ah ng’bum nak Taigüim ah hteit ci.

¹⁴ A cu ah ami thung man ah Taigüim vah luh nak ah tung pei ah ng’düi ciah ghangpughang akthai la ani koi ne ng’düi ci gui ah bawi gui, tumkhawng ci gui, ami van yeikyai ne m’lau ne phyungheng tum ci gui cu hmu gui ci. Ahtaliah naw a sui k’teek ne, am lung thüi sei, “Küknet nak nei! Küknet nak nei!” cine m’lau ci.

¹⁵ Jehoada naw Ahtaliah cu Taigüim pei ah ngawn vai kä yum ci, cun ah kyasei ani naw gabawi gui am, “Gaw ngäng gui ah ng’lak ung hteh püi vä, ani gung hlük ci phung cu ngawn vä” cik ci.

¹⁶ Ani cu pha ne, mang im ah hteh püi neta, ng’se m’kawt pei ah ngawn ci gui.

Jehoada ah Bilawh gui

¹⁷ Taigü Jehoiada naw ghangpughang Joash la chang gui cu Bawipa ah thukhän ung luh sak gui sei ngami cu Bawipa ah chang ah kyak ci gui; ani naw ghangpughang la chang gui ah ng’lak ung phi thumkhän bi pe gui ci.

¹⁸ Cun kawn ah chang gui Baala Taigüim ah hteit neta phyek ci gui; ngami naw sonkiang gui la a gup gui cu shu sheiuh u ne, Baala taigü Mattan phi sonkiang ah hmai ung ngawn ci gui. Jehoiada naw Taigüim ung ngäng sak gui ci,

¹⁹ Cun kawn ah amät, bawi gui, gaw ngäng gui la mang im ngäng gui naw ghangpughang cu Taigüim ungka naw mang im ah tha ci gui, chang avan naw läk gui ci gui. Joash cu m’kawtnu ung lut ne mangkiang ung ngok ci.

²⁰ Chang gui ami van cu yeikyai ci gui, mang gaw cu dip ci, tuhbäi Ahtaliah cu mang im ung ngawn pyi ci gui.

²¹ Joash cu a khokum, kum chih ung Judah ghangpughang ah kya lawk ci.