2 GHANGPUGHANG GUI 1 - Cho Bible Common Language 2016

Elijah la Ghangpughang Ahaziah

¹ Israel ghangpughang Ahab a sih kawn ah Moab kho chang gui naw Israel cu ng’hnungtuk püi ci gui.

² Israel ghangpughang Ahaziah cu Samaria ah mangim ah akhuih khan kyak ung ng’kya ne aknui ah leim ci. Cun ah kyasei ani naw ng’shächang gui cu Ekron mang gaw ah tüi gui ne, a gai vai la kä a gai vai ah mawng, Philistin gui ah khanpughi Baalzebub cu ng’shi sak gui ci.

³ Cun ung phi Bawipa ah khanchang naw Tishbe ah ka prophet Elijah cu thumkhän ne, Ghangpughang Ahaziah ah ng’shängchang gui cu hteit ne hmu gui ne, ami ng’shi vai a pyen cu, “A i ah kyasei nangmi naw, Ekron Khanpughi, Baalzebub cu hteit ne nami ng’shi vai ang? Nangmi naw Israel ung Khanpughi kä om ciah nami ngai ne ma?

⁴ Bawipa ah thu pyen cu ghangpughang am m’thein vä, “Nang cu na leim nak ungka kä na gai ba khai; na sik khai nei!” ciah kyak ci. Elijah naw Bawipa ah thumkhän ah mäih ah bik ci,

⁵ Ng’shächang gui cu ghangpughang ah om nak ah hteit ba u khäta, ani naw, “A i ah kyasei nami law ba” cine ng’shi gui ci.

⁶ Ngami naw m’shang u ne, “Bawipa naw nang a ning pyen nak, law ne ning m’thein vai ah na pyen law na gui ciah chang awn, kami ng’hmuk ci, ani naw, ‘A i ah kyasei Ekron khanpughi Baalzebub ah chang tüi ne na ng’shi sak ang? Cun cu nang naw Israel Khanpughi kä om ciah na ng’ngaih ah kä kya ne ang? Nang cu na leim nak ungka, kä na gai ba khai, na sik khai!’” cik ci nei.

⁷ Ghangpughang naw, “Cun ah chang cu a u ah mäih ang?” cik ci.

⁸ Ngami naw, “Ani naw savun awn pyan ah suinu sui ne, mehvun kheipat awn ng’pat ci” cik ci gui. Ghangpughang naw, “Cun cu Elijah nei” cik ci.

⁹ Cun kawn ah ani naw bawi tumat la chang hmakip cu Elijah la tuk khai ah tüi law gui ci. Bawi naw ani cu m’htung khan ah ngo sei hmu neta a pyen nak cu, “Khanpughi ah chang, kyum law ä, ghangpughang naw ng’thu nik bäi ci nei.”

¹⁰ Elijah naw, “Kei cu Khanpughi ah chang ah ka kyak ung, khankho ah ka mei kya law ne, nang la na chang gui cu ning ngawn gui sä!” cik ci. Acun vai am mei kya law ne cun ah bawi la achang gui cu ngawn gui ci.

¹¹ Ghangpughang naw a hei bawi la chang hmakip cu tüi law ba gui sei, ngami kai law u neta Elijah ami pyen nak cu, “Khanpughi ah chang aw, Ghangpughang naw ang ghit ah na law vai ah ng’thu k’bäi ci nei!”

¹² Elijah naw, “Kei cu Khanpughi ah chang ah ka kyak ung, khankho ah ka mei kya law ne, nang la na chang gui cu ning ngawn gui sä!” cik ci. Acun vai am Khanpughi ah mei kya law ne cun ah bawi la achang gui cu ngawn gui ci.

¹³ Cun kawn ah ghangpughang naw bawi tumat la chang hma kip cu tüi law ba mä ci. Ani cu m’htung ah hang kai ne, Elijah ah ma ah m’khuukdawng neta ng’paa na ne a pyen cu, “Khanpughi ah chang aw, kei la ka chang gui cu na chimgein gui ä, kami hnun nak phyawn gui ä!”

¹⁴ Bawi hnih la ani chang gui cu khankho ah ka mei naw ngawn gui pyi ci nei; cun ung phi, na bä ni, kei cu na chimgen ä!”

¹⁵ Bawipa ah khanchang naw Elijah cu pyen nak ci, “Ani awn a täng ah hteit tu ä, kä na kyih vai nei.” Cun ah kyasei Elijah cu Bawi awn a täng ah hteit tu neta, ghangpughang

¹⁶ a pyen nak cu, “Shin cu Bawipa ah pyen nei, “Nang naw Ekron khanpughi Baalzebub am ng’shängchang tüi ne na ng’shi k’ca sak cu — Israel ung ng’shi ca vai ah Khanpughi kä om ci, ciah na ngaih ah kyak ci, — nang kä na gai ba khai; na sik khai.”

¹⁷ Bawipa naw Elijah ung a pyen ah mäih ah Ahaziah cu sik ci. Ahaziah cu a hta kä om ci, cun ah kyasei anau Joram cu ani ah hnün ung ghangpughang ah ngo ba ci. Cun cu Jehoshaphat ah hta Jehoram naw Judah ghangpughang ah kya ne, a uknak akum goi nak ung ah kyak ci.

¹⁸ Ghangpughang Ahaziah ah bi nü nü cu Israel ghangpughang gui ah mawng ca uk ung guk ah kyak ci.