1 TIMOTHI 6 - Cho Bible Common Language 2016

¹ Khleihtein gui naw ami bawimang ami chang m’sui vai cu ami hmat vai. Cun ung vah Khanpughi ah ming la khritha ah m’theithang nak cu a u naw kä päipih kä pyeinsak khai.

² Khritha bawimang gui ung khleihtein changshäm a om ah a kyak ung, kä ami shedam nak gui vai, phäi nau gui ah kyak ci, ciah ami ngaih vai. Ami hnün thawh peit gui cu, ami m’hni gui ah khritha gui ah kyasei, ngami naw k’tha nah pi ne ami hnün thawh peit gui vai ah kyak ci. Shin ah a mawng gui cu nang naw nam theithang na pyeinsak vai.

Thuvi M’theithang nak Gui La Düng ciah Bühmang Nak

³ Hngihnga ciah yum nak m’theithang ne, Bawipa Jesuh Krih ah thu düng la mi yum nak ah m’theithang nak,

⁴ kä ng’müi sak ci cu, chang ah ng’shei aih ne a i ng’hlui kä hmat ciah kyak ci. Ani cu ng’vook shan vai, ng’küük neet vai ng’yak hlü ciah kyak ci. Cun naw vamneng nak, cuhcan nak, m’thüikhang nak, shedam nak,

⁵ gui cu ng’lih pyou sak ci. Cun ah om ih ciah chang gui cu ami lung ngaih hnga sei, thu düng caciim kä hmat ci gui ah kiak ci. Ngami naw yum nak ah lam cu bühmang nak ah lam ah ngai ci gui.

⁶ A mät ung om ci awn bä khai ah ngaih gep ciah chang cu, a yum nak naw bühmang nak pek ci.

⁷ Khomdek khan ah mi law sang ung a i nei mi law püi? Khomdek khan ung kaa mi hteh law ba ung mä a i nei mi hteh püi kaw?

⁸ Cun ah kyasei mikmi ung ei vai la sui vai a om ah khoi ung a cun awn mi ng’büh vai nei.

⁹ Bühmang hlük ciah chang gui cu tüihtok nak gah thei ci gui nei, ngami cu m’ghämce ne shetkat nak ah ng’yak nak hlü naw pha gui thei ci nei, cun ah yak hlü nak naw ngami cu didap sak gui thei ci nei.

¹⁰ A i ah kyasei ci ung ngui yak nak hlü cu, shetkat nak nüng nüng ah ang yung ah kyak ci. Chang amshah gui cu ngui yak hlü aih u netah ami yum nak phi ng’hlah tak ci gui. Cun kawn ah ngahmi cu yaica nak naw ami m’lung shetkat sak sei geinvai ci gui.

A Mät Chang sing Am Cäi Nak

¹¹ Nang läi cu Khanpughi ah chang ah na kyak ci kya ne, shin ah shekha gui avan na hlawi vai nei. Düngdau nak, yum thei nak, yumnak, m’hni nak, hnimgei nak, ng’awigii nak gui awn kümbe vai ah nak tha nak vai nei.

¹² Zum nak ah dawng nak ung na näng vai ah dawng ne, angtäi ghin nak cu nak pan vai nei: cun ah ghin nak na gah vai ah nang cu Khanpughi naw a ning khü yah ung, saksi ciah chang khli ah ma ah, Bawipa na yum ah mawng cu ak küikyang ah nang kiaa pyi ci nei.

¹³ A päng avan am ghin nak pek ciah Khanpughi la Pontius Pilate ah ma ah a yum nak a kheng geng ah m’dang ciah Khrit Jesuh ah ma ah kei naw thukhän ka ning pek ci,

¹⁴ Shin ah khäntam nak gui cu läk ne, Bawipa Jesuh Khrit kä a dang law ba pha ah chuih bekhüt ne bi na bi vai nei.

¹⁵ Tumat bäng ah kya ne, phyuhtheh ne uk ciah ghangpughang nüng ah Ghangpughang, bawi nüng ah Bawipa, Khanpughi naw, a khin a khüm nak ung Bawipa cu dang law ba sak khai nei.

¹⁶ Khanpughi bäng naw sih nak phiawn nak ci; Ani cu chang naw kä ak et hlawt vai ah pyü ne ng’shü ci ung om ci. Ani cu a u naw kä hmu man ci; Ani cu a u naw kä hmu hlawt ci: Bawipa ung m’tamkhah nak la angtäi sei hlüngtai nak cu om sä! Amen.

¹⁷ Khomdek khan ah bühmang ci gui cu kä ami khähghah längtang aih vai ah nam cäi gui vai nei. Ngami cu kä khäng lä khai ah khawhcham kä ngaih u ne, mi gah taang vai ah, ang nüng nüng cu, ang khaai nak awn nam shumphyuk gui ciah Khanpughi cu ami ngaih u vai nei.

¹⁸ Ak ni ami bilawh vai, ni kyom nak ung ami plümshau vai, ami khaailaang vai, la chang am ami peiktaak thei vai ah nam cäi gui vai nei.

¹⁹ Cun ung vah ngami cu ngawi ah lawk ciah ghin nak vai ah hmawk ah ak küikyang ah m’kümtho ci gui ah kyak khai. Cun ah a kyak ung vah ngami cu ghin nak akcang dou hlawt khai gui.

²⁰ Timothi, kei naw ka ning ap gui cu ngaih na ne nam htei vai nei, ak she ah thu nak la chang amshah naw cheishoh nak lam ami “Hmuhmat nak,” ah ami ngaih ah, ng’cuhcan küükneet nak cu na hlawi vai nei.

²¹ Chang amshah gui cu hmuhmat ci gui ah ami ngaih nak awn, yum nak ah lam cu hma ci gui nei. Nami van ah khan ah Khanpughi ah chimgein nak om sä.