1 TIMOTHI 5 - Cho Bible Common Language 2016

Yum Ciah Chang Gui ah Mawngma Nak Gui

¹ Na mät ah ng’vaipi cicu m’yeek ne kä nang thu püi vai, na pa ah mäih ah na chang m’sui vai. Na mät ah hmaw pi ci gui cu na nau gui ah mäih ah,

² na mät ah ng’vaipi ciah hnumi gui cu, na nu gui ah mäih ah, a mät ah hmawpi ciah hnumi gui cu na be gui ah mäih ah, theingcim ciah m’lung awn na om ih püi gui vai.

³ A mät om ciah hnumi gui cu nami m’hteihtang tu vai nei,

⁴ Cun ung phi cun ah hmeinu ung a hta gui, atu gui, a om ah a kiak ung ngami cu ami mät ah kyongkhui ung ami yum nak ah mawngma la tu m’bei m’ghinsei gui ciah ami nupa pupi gui, ami m’hteihtang tuba vai ah mawngma gui cu ami theithang ma vai nei, cun cu Khanpughi ah ng’yak hlü ah kyak ci.

⁵ A mät om ciah hmeinu cu m’hteihtang khai a u kä om sei, Khanpughi ngaih u ne, amü ak hnüüp taigü ne ng’yoi thäh ci nei.

⁶ Cun ung phi a om shek ciah hmeinu läi cu a ghin ung phi ak si ah kiak ci nei.

⁷ Hmeinu gui cu chang naw kä am kat gui vai ah shin ah m’cäi nak gui cu nami m’thein m’kan gui vai nei.

⁸ A paw chang, ak tung pi ah ak kyongkhui chang kä m’hteihtang ci cu, yum nak hnu nak ciah kya ne, kä yum ciah mä sheka tuba ci nei.

⁹ A khokum chuk-kip kä be phak ciah hmeinu cu, hmeinu ah kä k’bäi cang vä. Ani cu hnüät bäng ceimah ciah kyak khai,

¹⁰ a om ani ah mawng ngaih gep nak om khai, a hta gui ak ni ah m’htei ci, khin chang m’htei ci, yum ciah chang gui ni kyom püi gui ci, yaica ciah chang gui m’htei gui ci, nik ciah bi phung tha na ne bik ciah kyak khai.

¹¹ Hmaw ciah hmeinu gui cu hmeinu ah kä nami k’bäi cang vai, a i ah kiasei ci ung ngami cu, kä ami htingling law hlawt ung, ceimah law ba hlü netah Bawi Khrit cu hnu nah ci gui ah kya ci.

¹² Cun ah kyasei ngami cu, ak htük ung Bawipa ah ma ah ami shaitaak cu m’cheishoh ci gui ah kyak ci.

¹³ Cun kawn ah ngami cu a im tung päng ung hteit shüi shüi ne akhin maih sak ci gui, cun bäng ah kä kyak ciah kä pyein vai pyein u neh, chang ah mawng pyein sah hlük ci gui.

¹⁴ Cun ah kyasei hmaw sang ciah hmeinu gui cu ceimah ba u ne, hta nau u ne, ami kyong khui m’htei ne om u sä, cun ung mi ga gui naw mikmi ah mawng ak she ami pyein vai a i kä om khai.

¹⁵ Am shah hmeinu gui cu lam hma u ne, Satan ah hnu ah läk pyi ci gui nei.

¹⁶ Zum ciah hnumi tumat cu a mät ah mätyah kyong khui ung hmeinu a om ah a kyak ung, am hteihtang vai nei. Ngami ah phäh ah khrithabum cu kä yaica en sak sä. Cun ung vah khrithabum naw a ngaih u vai kä om ciah hmeinu gui cu m’hteihtang hning khai kiak ci.

¹⁷ Khanpughi ah khuut bik ciah ak tahnga gui cu, ng’cheng a goi thum ah gah khin ci gui ah nami hmat vai nei. Thu Ni ng’shäu ci gui la m’theingthang bilo ci gui cu ak tung pi ah gah khin ci gui nei.

¹⁸ A i ah kyasei ci ung cacim theing naw, “Htang nami leh sak ah seipat cu am gawng kä nami k’büüp-en vai; cun kawn ung bi bik ciah chang phi abi cheng gah khin ci nei,” ciah pyein ci.

¹⁹ Saksi hnih thum kä a om ung ak tahnga m’kat nak vai ah mawng cu kä nami ngaih-tüh en vai nei.

²⁰ Shetkat nak bik ciah chang cu, chang a hei gui ami kyihkyawk vai ah phäh ah, chang khli ah lung ah nami m’cäi vai nei.

²¹ Khanpughi ah ma, Bawi Khrit Jesuh ah ma la Theingcim ciah khankho chang gui ah ma ah, kei naw thukhän ka ning peik cu, nang naw shin ah m’cäi nak gui cu läk netah ng’daut ne a i kä nam khoichaa düt en vai, chang ah hmai teng ne a i kä na bi vai.

²² Bawipa ah khuut bik ci am kut taih nak peit nak cu kä nami bi ghet ghet vai, chang ah shetkat nak ung kä nami ng’caw yah tu vai, nami mät theingcim ne nami om vai.

²³ Nang cu a shäng shäng na gawpyam thei ci kyasei, tui bäng kä aw ne, na theek nak vai ah sapyit tui phi na awk vai nei.

²⁴ Chang amshah gui ah cheishoh nak cu dang ge sei, ngahmi m’khoichaa nak cun phi gawk law ge ci. Cun ung phi chang am shah gui ah cheishoh nak läi cu a ngawi ah vah dang lawk ci.

²⁵ Acun ah mäih ah amshah ah nikiom nak gui cu dang ge ci, kä dang ge ciah nikiom nak gui cun phi a i naw kä shungshet hlawt ci.