1 TIMOTHI 4 - Cho Bible Common Language 2016

Thuvi Ciah Saya Gui

¹ Ngawi ah chang amshah gui cu, hleeihlak ciah mümcha ah thu ngai u ne, khoshe ah m’theithang cu läk u ne, ami yum nak cu nawng lawk khai gui nei cine Mumcha naw ang dang ah pyein ci.

² Cun cu m’si m’hling awn m’khih ah mäih ah ami m’lung ngaih sik ciah, hleeihlak ciah chang gui ah m’theithang ah kyak ci.

³ Cun ah chang gui naw, käng chung la vai, ei amshah cu hlawi vai, ciah m’theithang ci gui. Cun ung phi yum ne Thu düng hmat ciah chang gui naw, m’hlüngtai ne taigü u netah, cun ah ei cu ami ei vai ah Khanpughi naw a tüi pyan ah kyak ci.

⁴ Khanpughi ah tüi pyan phung cu nik ciah kyasei, a i ei phi kä hlawi vai, ei vai phung cu m’hlüngtai ne taigü nak awn dou vai kiak ci,

⁵ A i ah kyasei ci ung, Khanpughi ah ng’thu la taigü nak naw, cun ah ei cu a theing sak pyi ah kyak ci.

Khrih Jesuh ah Chang Shäm K’ni

⁶ Nang naw shin ah m’cäi nak cu na phäi nau gui-am na peit law vai yung, na mät ah yum nak thu la na mät ah läk ah düng ciah m’theithang nak cu, läk ne Khrit Jesuh ah changshäm k’ni ah na kyak vai nei.

⁷ Pyein ah kä ni ne yum nak kä om ciah puma awi gui cu nami hlawi vai nei. Zum nak ung nami ghin vai ah nami mät naw nami mät nami m’thei vai nei.

⁸ Pumsa lam ung thei nak cu bä kung ci, cun ung phi mümcha lam ung thei nak cu, a mawng avan ung, tuhbäi la ngawi yä ghin nak vai ah bä pi bäih ci.

⁹ Shin cu bekhüt ciah thu ah kyasei, ak be ah dou ne yum vai ah kiak ci.

¹⁰ Mikmi naw tha na ne mi bilawh ah mawng cu, chang nüng ah Hunbawi, ak tung pi ah yum ci gui ah Hunbawi ah kya ne ghing ciah Khanpughi cu mi ngaih u ah hmawk ah kyak ci.

¹¹ Shin ah m’cäi nak gui la m’theithang nak gui cu chang gui am nami peit gui vai nei.

¹² Nang cu na hmaw ci kyasei a u naw kä a ning kahta nak-en vai ah na om vai nei, nang’thu, na om, m’hni nak yum nak la ciimvai nak ung, yum ciah chang gui ami thei tu vai ah na om vai nei.

¹³ Kei kä ka law pha ah chuih chang gui ah ma ah caciim phat ne, thu pyein ne m’theithang ne, k’tha na ne na bi vai nei.

¹⁴ Profet gui ah thu awn, ak tahnga gui naw, na khan ah ami kut taih ne ami ning m’shumphyuk ah mümcha m’cümhnah nak cu, a i baw düt ah kä na ngaih-en vai nei.

¹⁵ Chang van naw na bämang law cu ami ning hmuh vai ah, shin ah a mawng gui cu m’shiin püi ne na bi vai nei.

¹⁶ Geik na ne om ne nam theithang vai nei. Shin ah a mawng gui cu k’tha na ne na bilawh vai nei, cun ung na mät la na thu ngai yak ciah chang gui cu hun nak gah khai gui nei.