1 TIMOTHI 3 - Cho Bible Common Language 2016

Krithabum ung Aktahnga Gui

¹ “Krithabum ung tahnga khai ah ng’bü ciah chang cu, ni kiom hlimtui ciah bilawh ng’ya hlük ciah kyak ci,” cicu küikyang ciah thu ah kyak ci.

² Krithabum ung tahnga ciah chang cu, m’kat vai ah kä om khai, tumat bäng chu nak khai, ciimvai lunglang khai, htingling khai, a om ih ni kyom khai, khin chang m’htei khai; m’theithang thei khai;

³ Ani cu yu kä aw ne, ng’tuk vook kä lup ne, ng’awi gi ne, dimeih nak ng’yak hlük ciah chang ah kyak khai: ngui m’hni aih ciah chang ah kä kya khai;

⁴ ani cu ak kyong khui uk m’khüt sei ak chu a hta gui naw ami chang m’sui ah kyak khai.

⁵ A mät ah kyong khui am htei htang vai pang kä hmat ciah chang naw, a i cha ah Khanpughi ah Krithabum m’hteihtang hlawt khai yaw?

⁶ Ani cu yum nak khäng htek pyi ciah a kyak vai, kä cun ung ani cu ta-äh law aih ne khoshe ah mäih ah m’khoichaa nak gah khai nei.

⁷ Ani cu Khrithabum ah ak pung ah chang hei gui naw phi ami chang m’sui tu ah kyak khai, cun ung vah khoshe ah kut ung phi kä gawk hlawt khai.

Khrithabum ung Bi K’bi Gui

⁸ Krithabum ung bik’bi gui cun phi, ami om ih ni ne, ami m’lung ngaih ng’ciim ciah kyak khai. Ngah mi cu kä khleei ne, kä ei awk tat ne, ngui kä ng’ya hlü aih ciah kyak khai gui.

⁹ Ngahmi cu yum nak ah thu düng ah mawng, ci theing sei ngaih gep ne kut shum ci gui ah kyak khai.

¹⁰ Ngahmi cu ak htük ung tüihtok nak aut ma u sä, tüihtok nak ami näng ah a kyak ung, ngami cu khuut bi tu u sä.

¹¹ Ami chu gui cun phi akni ah m’lung ngaih om ih ci gui ah a kiak vai, khleei khlam ci gui ah kä kyak en sä. Ciimvai lunglang ne, ngaih gep vai ah chang ah ami kyak vai.

¹² Khritha bik’bi cu tumat bäng chu nak ciah kyak khai, ak chu, a hta, ak kyongkhui uk m’khüt ne, m’hteihtang hlawt ciah kyak khai.

¹³ Ami mät ah bilawh vai m’khüt näng ci gui ah khritha bik’bi gui cu, hlüngtai u ne, Khrih Jesuh ung ami yum nak ah mawng cu pyein sa hning ci gui nei.

Ak Küikyang Pi

¹⁴ Kei naw shin ah ca ka guk sang ung kä sho pha sei, nang ah ka lawk khai ah ka ngaih-tüh ci nei.

¹⁵ Cun ung phi kei cu ka shokshü ei ah a kyak ung, Khanpughi ah kyongkhui ung om ci gui naw, a i ah om ih vai cu nami hmat vai ah, shin ah ca ka guk law ah kyak ci nei. Cun ah kyongkhui cu ghing ciah Khanpughi ah krithabum ah kyak ci, cun ah Krithabum cu thu düng ah a tung ah kyak ci.

¹⁶ Mikmi ah yum nak ah küikyang nak cu a u naw kä hüüngtaa hlawt khai nei, cun ah mawng cu: Bawipa cu chang ah müi ah ng’tüi ne kyum lawk ci nei, Ani ah theingciim nak cu Mumcha naw m’dang pyi ci nei, Khan chang gui naw phi hmu pyi ci gui nei, Ani ah mawng cu kho nüng ung shäu pyi ci gui nei, M’dek ah khan ung chang gui naw phi Ani cu yum pyi ci gui nei, Ani cu khankho ah hang kai ba pyi ci nei.