1 TIMOTHI 2 - Cho Bible Common Language 2016

Khrithabum ung Khawihnah Nak

¹ Cun ah kyasei ah htük bäih ah chang gui ah hmawk ah Khanpughi huipaa nak, taigü nak, yoih thäh nak, la m’hlüngtai nak gui cu nami bi vai ah ka ning m’cäi gui ci.

² Mikmi cu Khanpughi ung ding gei nak la dimdeih nak awn a htingling ah ghing ne mi om vai ah ghangpughang gui la huham om ciah bawimang gui ah hmawk ah nami taigü vai nei.

³ Cun cu nik ciah kyasei mi Hunbawi Khanpughi ah am hni ah kya ci.

⁴ Chang nüng cu hun nak gah ne thu düng ami hmat vai ah Khanpughi naw ng’ya hlük ci.

⁵ Khanpughi tumat bäng om ci, Khanpughi la chang ah ng’lak ung geilam pyang ciah, Bawi Khrih Jesuh phi tumat bäng ah kyak ci.

⁶ Cun ah Bawi naw hnicim chang gui phiawn khai ah a pumsa ap ci. Cun cu chang nüng hun vai ah, a khin ni ah a kyak ah mawng, Khanpughi ah ang yak hlü cu am dang nak ah kyak ci.

⁷ Cun ah kyasei, kei cu ang düih püi ah nam düih ne chang khui hei gui ah saya ah kya ne, yum nak thu düng cu ka ng’shäu khai ah na tüi ci. Kei ka hleei ah kä kya ci, thu düng ka pyein na kiak ci.

⁸ Khritha gui ah bum nak phung ung, pami ng’vai gui ami taigü vai, ngahmi cu Khanpughi ah ng’ap pyi ci gui ah kya ne, m’lung she nak la cuhcan nak kä om men sei, ami kut chang ne ami taigü vai ah ka ng’ya hlük ci nei.

⁹ Hnumi gui cun phi müisa ne nei aan khai ah ami suisak vai nei: lu m’kin ne, ghui shawi mo sawng, äh awi ne, aküi kyang ah, hnän thang binglawh ne kä ami kyak vai.

¹⁰ Ngahmi cu yum ciah chang gui ah mäih ah ni kyom ciah om ih awn ami bilawh vai nei.

¹¹ Hnumi gui cu ng’awi gi ne, a düm hta ah ami theithang tu vai nei.

¹² Hnumi gui naw ami m’theithang vai la pami ah khan ah ami huham mah vai cu, kei naw kä ka yum ci nei: ngah mi cu kä chawkchek ne ami om vai nei.

¹³ Khanpughi naw Adam cu tüi sho ma netah Eve cu tüi sho ci.

¹⁴ Hmühma nak gah law ma cicu Adam ah kä kyak ci, hnumi ah kiak ci, Ani naw Khanpughi ah thukhän cu shetkat sak ci.

¹⁵ Cun ung phi hnumi gui cu, a htingling ah om ne, yum nak, m’hni nak la theingciim nak awn ami be ah a kyak ung, ami hta nau nak awn hun nak gah khai gui nei.