1 SAMUEL 9 - Cho Bible Common Language 2016

Saul naw Samuel Hmuk ci

¹ Khawh mah ne, aa mah ciah kish ming nak ciah chang tumat om ci, ani cu Benjamin pakhui ah kyak ci; ani cu Abiel ah hta, Zeror ah tu, Becorath kyong ung ka, Aphiah pa ng’pai ung ka ah kyak ci.

² Ani ung Saul ming nak ciah a hta tumat om ci, ani cu a gup kyom ne aa mah ci. Ani cu Israel kho ung chang avan ah alu awn ng’ng’shäi pi ne, kyom pi ciah kyak ci.

³ Kish ah la gui amshah cu lum m’chüh u khäta, ani naw Saul am, “Changshäm tumat hteh püi ne, la gui cu na shui ba vai nei” cik ci.

⁴ Ngami naw Ephraim khaw gui la Shalishah khaw nawi pum ung hteit ne shui ci gui, cun ung phi kä hmu ba ci gui; cun ah kyasei Shaalim khaw nawi ah hteit ci gui, cun phi la gui kä om ci gui. Cun kawn ah Benjamin khaw hmun ung phi hteit ci gui, cun ung phi kä hmu ba ci gui.

⁵ Ngani cu Zupha khaw nawi ah ani gawk law yah ung, Saul naw akchangshäm am, “Im ah ni hteit ba khai, ka pa naw la gui ah mawng kä ngaih-tüh ba khai, nik ni ah phäh ah ng’ä ai lawk khai” cik ci.

⁶ Ak changshäm naw, “Om cang ä! Shin ah gawnu ung theingcim ciah chang, ami chang m’sui aih ah chang tumat om ci, a i ah kyasei ci ung ani ah a pyen päng cu hman ci. Ani ah ni hteit kaw, la gui a hawi hmuh ba hning vai cu ani naw na pyen tu goi hning hngaw khai nei” cik ci.

⁷ “Ani ah ni hteh ah a kyak ung, a i ni pek khai ang?” cine Saul naw ng’shik ci. “Ni ng’ip ung ei vai k’pawih ci kä om ba ci, a hei ni peit vai a i kä om ci, a i baw om ne ma?”

⁸ A changshäm naw, “Kei ung ngui tangka a läm hta om ci. Kei naw cun ka pek khai, cun ung a hawi ni hmuh ba vai cu na m’thein goi khai,” cik ci.

^9-11 Saul naw, “Nik khai nei! Ni hteit khai” cik ci. Cun kawn ah ngani cu theingcim ciah chang ah om nak ah hteit ci goi. Ngani cu gawnu lam khaw gui ung ani hang kai vü yah ung, tui than khai lawk ci gui ah hnumi hta gui cu hmuk ci goi. Ani naw hnumi hta gui ng’shi ni ne, “Gawnu ah mikhmuk ci om ne ang?” cik ci goi. (Cun yah ung prophet am mikhmuk ciah pyen ci gui, Khanpughi ng’shi hlük ciah chang phung naw, “Mikhmuk ciah mi hteit khai,” ci man ci.)

^12-13 “Ä, om ci nei,” ci u ne hnumi hta gui naw, “Akcang ah, ani cu nani ma lung ung om ci nei. Na ni yang ah ak kyang ung na ni k’pha khai nei. Gawnu kyong ah nami valuh vai am ani cu nani hmuk khai nei. Ani tuhngawi gawnu ah gawk lawk ci, a i ah kyasei ci ung chang gui naw khomhtung ah mangkiang ung khawihnah nak douthak khai gui ah kyak ci. Ami khü tu gui ah chang gui naw ani cä ah kä a gawk pha ah chuih, ei tün ne kä ei khai gui, a i ah kyasei ci ung khawihnah nak cu ani naw hriham pe ma khai. Tuhbäi nani hteh ah a kyak ung, ani ei tuk khai ah m’htung ah kä hang kai pha sei nani hmuk khai nei.”

¹⁴ Cun ah kyasei Saul la akchangshäm cu gawnu kyong ah hteit ci goi, akyong ah ani va hteh vü yah ung, Samuel cu khawihnah nak hmun ah hteit khai ah, ngani täng ah an a vü sei hmuk ci goi.

¹⁵ Tuhbäi acu hnüüp ung Bawipa naw Samuel

¹⁶ am “Ngawi ung a tuhbäi chü, Benjamin pakhui ung ka chang tumat ka ning tüih lawk khai, ani cu Israel chang uktu ah na phyuh theh vai nei, ani naw Philistin gui ung ka phyawn gui khai nei. Kei naw ka chang gui ah gein vai nak cu hmu ne, m’htei gui vai ah ami kyah cu ka ng’yak ci nei.”

¹⁷ Samuel naw Saul cu hmu ne ta, Bawipa naw a pyen nak cu, “Kei naw a mawng ka ning m’thein gui cu shin ah chang nei. Ani naw ka chang gui cu uk khai.”

¹⁸ Saul cu m’kawt pei ah om ciah Samuel ah hteit neta, “Na m’thein ä, mik hmuk ciah chang a hawi ang a om” cine ng’shik ci.

¹⁹ Samuel naw, “Kei cu mik hmuk ciah chang nei. Khawihnah nak ah kei ah ma ung ma ne ana hteit ni ä.” Nangni cu tuhngawi kei awn a täng ah nani ei khai. Ngawi ung kho ngawi nani na ng’shi avan ka ning m’thein goi khai, ka ning hteh ba sak goi khai.

²⁰ La gui cu ami maih nak hnüüp thum law pyi ci, cun gui ah phä ah kä nani ng’ä vai. Cun gui cu hmuh ba gui pyi nei. Cun ung phi Israel gui cu ami ng’yak hlü ah chang cu a u ang? Cun cu nang nei nang la napa ah kyong khui nei.

²¹ Saul naw, “Kei cu Benjamin pakhui ah ka kyak ci, Israel pakhui ung ak yaw pi k’bäih ah kyak ci, kei ah kyong khui cu pakhui ung kä küikyang pi k’bäih ciah kyak ci, a i ah kyasei shin ah mäih ah na na ng’htau püi ang?” cik ci.

²² Samuel naw Saul la a changshäm cu akhan ang shawng nak ung khah püi goi neta, tawnglang ah lu täng ung ngoh sak goi ci, acun ung khin avan thumkip ngok ci gui.

²³ Samuel naw ei k’shong am, “Ka ning pek ah meh k’pai ne na law püi vai, ka ning pyen ah meh k’pai ne na law püi vai, ka ning pyen nak ah amshah cu na tha hnga vai,” cik ci.

²⁴ Ei shong naw a pai ah a khaw cu law püi ne, Saul ah ma ah tha ci. Samuel naw, “Teng ä, shin cu nang am ning pai pek nei, ei ä. Shin cu ka khü ah chang gui awn a täng ah nang naw na ei vai ah ka pai nei,” cik ci. Cun ah kyasei cu hnüüp ung Saul cu Samuela awn a täng ah ei tuk ci.

²⁵ Ngami cu khawihnah nak ungka naw gawnu ah ami yu kyum ba kawn ah ngami naw Saul ah ih

²⁶ nak vai cu akhuih khan ah pyang ci gui, ani cu acun ung ip ci. Khong ngawi k’sik ung Samuela naw Saul cu akhuih khan ah ka khü neta, “Tho law ä, na hteh nak vai ah lam ung ka ning tüi khai,” cik ci gui. Saul cu tho law sei, ani la Samuel cu a täng ah lam k’cawh ung hteit ci goi.

Samuel Cu Saul naw Uktu ah Phyuhtheh ci

²⁷ Ngami cu gaw m’lawi ah gawk law ni neta, Samuel naw Saul am, “Changshäm cu ma ne ana hteh vai ah m’thein ä” cik ci. Changshäm cu hteit khäta, ani naw m’dün ne pyen ba ci, “Shin ung a shäng hta om cang ä. Khanpughi naw a i a pyen cu ka ning m’thein khai.”