1 SAMUEL 8 - Cho Bible Common Language 2016

Ghangpughang Chang Gui Naw Ami Thäh

¹ Samuel cu ghi law neta a hta gui cu a hta gui cu Israel uktu ah tha gui ci.

² Ang vai ba cu Joel ah kya ne, ak hmaw ba cu Abijah ah kyak ci; ngami cu Beersheba ung suki ah kyak ci gui.

³ Cun ung phi ami pa ah bi cu kä läk hlawt ci gui; ngami cu ngui gah vai bäng tha nak ci gui. Ngami cu ng’mü khawh dou u ne a i ah mawng phi ng’düng khai ah kä m’khoi m’chak ci gui.

⁴ Cun kawn ah Israel ang vai gui cu ng’chum u neta Samuel ah om nak Ramah ah hteit ci gui.

⁵ Ngami naw ani am, “Teng ä! Nang na ghi lawk ci, na hta gui nang ah mäih ah kä kyak ci gui. Cun ah kyasei na uk gui khai ah ghangpughang na m’düih pe gui ä, cun ung a hei khaw gui ah mäih ah keimi ung ghangpughang om khai” cik ci gui.

⁶ Ghangpughang vai ami m’thäh ah phäh ah Samuel cu kä yei ci; cun ah kyasei ani cu Bawipa ah

⁷ taigü ci, Bawipa naw, “Chang gui naw ami ning pyen nak phung cu na ngaih vai. Nang cu ngami naw ami hnu ng’tuk püi ah chang ah kä na kyak ci, kei vah ngami naw ami hnu ng’tuk püi ah ghangpughang ah ka kyak ci.

⁸ Kei naw ngami cu Egypt ah ka, ka law püi ba gui ci, ngami cu kei ung ka dawng u ne, a hei khanpughi gui khawihnah ci gui; kei ung angtäi ah ami man ah mäih ah nang ung tuhbäi bik ci gui nei.

⁹ Cun ah kyasei ngai gui ä, ami ghangpughang naw a i hawi ah a om püi gui vai ah mawng cu m’thein gui ä.”

¹⁰ Samuel naw nai ghangpughang ah k’thäh ciah chang gui am, Bawipa naw a pyen nak avan m’thein gui ci.

¹¹ “Shin cu nami ghangpughang naw a ning om püi gui vai ah a mawng ah kyak ci,” cine Samuel naw pyen ci.” Ani naw na hta gui ah gakap gui cu pyang khai; amshah cu ani ah ng’se tat ung bik khai, amshah cu yatha ah ma ah dawng khai gui.

¹² Ani naw amshah cu chang phia gha uk ciah bawi ah hmoh khai, amshah cu hma kip uk ciah kyak khai. Na hta gui naw ani ah lai thawn khai gui, ani ah geit khäm khai gui, ani ah likhim gui la ani ah yatha ung ka gui cu pyang khai gui.

¹³ Na hta hnumi gui cu ani ah phäh ah tui ng’ui pyan khai, ei shong khai, m’htut pyang khai ah tha gui khai.

¹⁴ Ani naw aknipi nami lo, sapyit lo la olive lo gui cu la ne a bawi gui am pe gui khai.

¹⁵ Ani naw nami htang la am theih gui ah bum gha bum ät la ne, a yung bawi gui la a hei bawi gui am pe gui khai.

¹⁶ Ani naw nami changshäm gui la, seipat gui, la gui aknipi la ne amät ah ka vai bi sak gui khai nei.

¹⁷ Ani naw nami htome bum ah bum gha bum ät cu lak khai. Nami mät cu ani ah changshäm ah nami kya lawk khai.

¹⁸ Cun ah khin a gawk law ung, nangmi cu akshe kha ah thu nami m’da khai, a i ah kyasei ci ung, nami ghangpughang, nami mät ah ghü a om ah kyak ci, cun ung phi thu nami m’da cu Bawipa naw kä ngai khai” cik ci.

¹⁹ Chang gui naw Samuel cu a i ah kä sui ci gui, ngami naw, “Ka, Ghangpughang kami ng’za

²⁰ hlük ci nei, cun ung kei mi cu a hei pakhui gui ah mäih ah kami kyak khai, ani cu kami ghangpughang ah kya ne, na uk gui khai, ani cu kami ghangpughang ah kya ne, na uk gui khai, ng’tuk nak ung lam nam shüm gui khai, kami ng’tuk law ung na ng’tuk pe gui khai,” cik ci gui.

²¹ Samuel naw chang gui ah pyen phung cu ngai neta, hteit ne Bawipa am m’thein ba ci.

²² Bawipa naw m’shang ne, “Ami ng’yak hlü cu bi pe gui ä, ghangpughang pe gui ä” cik ci. Cun kawn ah Israel chang gui ami van im ah ami hteh ba vai ah Samuel naw pyen ci.