1 SAMUEL 7 - Cho Bible Common Language 2016

¹ Cun ah kyasei Kiriah Jearim ah chang gui naw Bawipa ah Thukhän M’küm cu la u ne, Abinadab ah im ah tha ci gui, ani cu m’htung khan ah om ci. Ngami naw ani ah hta Eleazar cu acun m’htei khai ah ghü ci gui.

Samuel Naw Israel Uk ci

² Thukhän M’küm cu Kiriah Jearim ung akshou om ci, kum ku om ci. Cun ah ah khui ung Israel chang gui ami van cu Bawipa naw am htei gui vai ah kyap ne taigü ci gui.

³ Samuel naw Israel chang gui am, “Nang mi cu nami m’lung avan awn Bawipa täng ah nami ng’hlah law ba ah a kyak ung, a khaw hei khanpughi gui la Astarte ah a gup cu nami nawt heng vai. Bawipa ung nami mät avan nami ng’ap vai, ani bäng nami khawihnah vai, cun ung ani naw Philistin gui ah huham ung ka ning k’phiawn gui khai” cik ci.

⁴ Cun ah kyasei Israel gui naw Baal la Astarte ah gup gui cu nawt heng u ne, Bawipa bäng khawihnah ci gui.

⁵ Cun kawn ah Samuel naw chang tüi ne Israel van Mizpah ung hmuh vai ah khü gui ci, ani naw, “Acu ah nangmi ah phäh ah Bawipa ah ka taigü khai.”

⁶ Cun ah kyasei ami van Mizpah ung lawk ci gui. Ngami naw Bawipa am douthak nak ah, tui than ne k’peh u ne, cun hnüüp mü ne ei hlawi ci gui. Ngami naw, “Mikmi cu Bawipa hnu ng’tuk püi ne mi hma ci nei” (Israel gui ah lung ah Samuel naw abi nak cu Mizpah ah kyak ci)

⁷ Philistin gui naw Israel gui Mizpah ung ami ng’bum cu ng’ya u neta, Philistin ghangpughang hma cu ami chang gui awm ngami tuk gui vai ah pawng ci gui. Israel gui naw acun ng’ya u neta, kyik ci gui.

⁸ Ngami naw Samuel am, “Mi Khanpughi Bawipa ah taigü ä, Philistin gui ung ka phyawn nak vai ah” cik ci gui.

⁹ Samuel naw htome hta ngawn ne, avan m’khih ne Bawipa cu khawihnah ci. Ani naw Israel gui am htei vai ah Bawipa ah taigü sei, Bawipa naw ak taigü ngai ci.

¹⁰ Samuel naw khawihnah nak a douthak sang ung, Philistin gui naw tu gui khai gui ah ng’et lawk ci gui; cun ung phi, acun hta ng’lung ung khankho ah Bawipa ng’hmum kyeek ne hnu ng’tuk püi gui ci. Ngami cu ng’caw ng’thääh u ne, düngkyong ne dawng ci gui.

¹¹ Israel gui cu Mizpah gaw k’pung ah lut law ne ng’täm law u ne, Philistin gui cu Bethcar ah khüt ne gawk ne pha gui ci gui, lam pum ung ngawn gui ci gui.

¹² Samuel naw lung la ne, Mizpah la shen ah ng’lak ung k’süm neta, “Bawipa naw lam pum ung na m’htei gui ci nei” ci neta, acun cu “M’htei ciah lung” ngah sui ci.

¹³ Cun ah kya ne Philistin gui cu ami m’di gui, Bawipa naw shungvong gui sei, Samuel a ghin ah chuih Israel khaw cu kä tu law ba ci gui.

¹⁴ Ekron la Gath ah ng’lak ung ka, Philistin gui naw ami khäm ah mang gaw avan cu Israel ah law ba ci gui. Israel gui naw avan ami khaw ah la ba ci gui. Israel chang gui la Kanaan chang gui ah ng’lak ah phi dimdeeih nak om ci.

¹⁵ Samuel naw a ghin yah ak chuih Israel cu uk ci.

¹⁶ Akum tä sei Bethela, Gilgal la Mizpah gui cu m’hleh ci, cun ah hmun gui ung ng’cuh can nak avan cu dim sak ci.

¹⁷ Ani cu Ramah a im ah hteit ba ci, acun cu taga suki ah bi abi nak ah kyak ci. Ramah ah ani naw Bawipa ah hmawk ah mangkiang co ci.