1 SAMUEL 6 - Cho Bible Common Language 2016

Thukhän M’Küm Ang Hlah Law Ba Ah Mawng

¹ Bawipa Thukhän M’küm cu Phlistin khaw ah chakchih a om kawn ah,

² Chang gui naw taigüpa gui la cecai ci gui cu khü gui u neta, “Bawipa ah Thukhän M’küm ah mawng cu a i hawkcha ah bi vai ang? Ka nak ci gui am mi thak ba gui vai a kyak ung, a i awn m’khah ne mi thak ba gui khai ang?” cik ci gui.

³ Ngami naw, “Israel Khanpughi ah Thukhän M’küm nami tha ba gui vai a kyak ung, nami hmakat nak nami sah nak ah kyak khai ah m’cühnah naw awn nami m’khah vai. Thukhän M’küm cu m’cümhnah nak kä om ciah kä hteit ba khai. Cun ung ngami naw nami gai khai, a i ah kyasei a ning m’kyuk gui phi nami hmat lawk khai.

⁴ Chang gui naw, “A i m’cümhnah nak mi thak khai ang?” cik ci gui. Ngami naw, “Ghui ng’khe lung hma, ghui k’pui gup hma, Philistin ghangpughang tumat ah phäh ah tumat ciah kyak khai. Acun ah leigai cu nami van ah khan la ghangpughang hma ah khan ah gawk lawk ciah kyak ci.

⁵ Nangmi naw shin ah ng’khe gui la k’pui gup gui cu nami pyan vai, cun gui naw nami khaw m’dishum ci gui, nang mi naw Israel Khanpughi am m’taam khah nak nami pek vai. Cun ung nangmi, nami khanpughi gui la nami khaw ah khan ah gawk khai ah gawk lawk ciah m’kyuk nak cu düm ei sak hman khai.

⁶ Egypt ghangpughang la Egypt chang gui ah mäih ah a i ah kyasei nami ling aih vai ang? Egypt ung ka Israel chang gui kä ami hteh sak gui pha ah chuih Khanpughi naw akgu ah mäih ah a kyak sak gui cu kä nami m’hnih vai.

⁷ Ng’hle akthai nami pyan vai, kä täk pha ah seipat hnih nami m’hüt vai, cun goi cu ng’hle ung khit neta, a hta goi cu seiim ah nami k’täm ba vai.

⁸ Bawipa ah Thukhän M’küm cu la ne, ng’hle ung nami m’khäh vai, m’küm ah ang leng ung ghui awn pyan ah akhe cu nami kat ah phäh ah nami pek vai ah m’cümhnah nak cu nami tha vai. Ng’hle cu amät tün ne hteh sak ne, amät ah hteh ah nami hteh sak vai.

⁹ Cun kawn ah a hteh cu nami ngäng vai; cun cu Beth Shemesh gawnu täng ah a hteh ah a kyak ung, Israel Khanpughi naw mikmi ah khan ah shin ah kyih vai ah leigai cu tüi lawk ciah kyak khai, kä ah hteh ah a kyak ung, ani naw leigai kä tüi lawk ciah mi hmat khai; amät gawk lawk ciah kyak khai” cik ci.

¹⁰ Ngami naw ami m’thein gui ah mäih ah bik ci; ngami naw seipat hnih la ne ng’hle ung khit ci gui, seipat hta gui cu sei im kyong ah iip ci gui.

¹¹ Ngami na Thukhän M’küm cu ng’hle kyong ah tha ci gui, ghui awn pyan ah ang khe tha nak ah m’küm la ghui awn pyan ah k’pui gup gui tha nak ah m’küm phi a täng ah tha ci gui.

¹² Seipat gui cu tün ne, Beth Shemesh lam ung hteit ci gui, ang düng ah hteit u ne, kä a ng’hlat law ba ling ci gui. Ngami cu ani naw hlü ah maw ci gui. Philistin ghangpughang hmaw naw Beth Shemesh khogi ung khüt ne läk gui ci gui.

¹³ Beth Shemesh chang gui khaw nawi ung htang khäm yah ci gui, ngami naw ang ghit ah teng neta, Thukhän M’küm cu hmuk ci gui. Ngami cu ami hmuh vai am yei aih ci gui.

¹⁴ Ng’hle cu Joshua ming nak ciah chang ah lo ung gawk lawk ci, ani cu Beth Shemesh ah om ciah kyak ci, ng’hle cu lung nu nu pei ah ng’düm ci. Chang gui naw sing hle cu tu hnget u ne, seipat goi cu ngawn u neta, m’khih ne Bawipa khawihnah

¹⁵ nak vai ah cik ci gui. Levit gui naw Bawipa ah Thukhän M’küm cu chang u ne, ghui ang khe tha nak ah m’küm gui phi la u neta, lung nu nu ah khan ah tha ci gui. Cun kawn ah Beth Shemesh chang gui naw m’khih ne khawihnah nak douthak u ne, a hei gui awn phi Bawipa cu khawihnah ci gui.

¹⁶ Philistin ghangpughang hma cu, cun na ami bi teng gui u neta, a cu hnüüp ung Ekron ah ng’hlat ba ci gui.

¹⁷ Phlistin gui naw ghui ang khe hma cu Bawipa m’cümhnah ne, ami kat ami sah nak ah m’khäh ci gui, Ashdod, Gaza, Ashkelon, Gath la Ekron mang gaw gui, tumat ah phäh ah tumat ciah kyak ci.

¹⁸ Ngami naw ghui k’pui gup gui phi m’khäh ci gui, mang gaw tumat ci uk ciah ghangpughang hma naw tumat ci, ami vongpang ah gawnu gui la kä ng’vong ah gaw hta gui van naw m’khäh ci gui. Beth Shemesh ah ka Joshua ah lo ah lung nu nu ah khan ah Bawipa ah Thukhän M’küm cu hmoh ci gui, cun naw tuh güt a kyak te ah mawng ma cu saksi m’dang ci.

¹⁹ Bawipa naw Beth Shemesh ung ka chang chih kip ngawn ci, a i ah kyasei ci ung Thukhän M’küm akyong ami teng ah phäh ah kyak ci. Chang gui cu thüi sei ci gui, a i ah kyasei ci ung Bawipa naw ami ng’lung ah chang khli a ngawn ah phäh ah kyak ci.

Kiriah Jearim Ung Thukhän M’Küm

²⁰ Beth Shemesh ah chang gui naw, “Theing cim ciah Khanpughi, Bawipa ah ma ah a u ng’düi hning khai ang? Mikmi ungka naw ani a hei ah hteit khai ah a hawi mi tüi khai ang?” cik ci.

²¹ Ngami naw Kiriah Jearim chang gui am ng’shä tüih ne ami pyen sak gui ci, “Philistin gui naw Bawipa ah Thukhän M’küm law püi ba ci gui nei, law ne la law vä” cik ci gui.