1 SAMUEL 5 - Cho Bible Common Language 2016

Philistin gui ah Ng’lung ah Thukhän M’küm

¹ Philistin gui naw Thukhän M’küm ami guh gui kawn ah, ngami naw Ebenezer ah ka ami mang gaw Ashdod ah hteh püi ci gui,

² ami Khanpughi Dagon ah pum im kyong ah hteh püi u ne, cun ah a gup pei ah m’düih ci gui.

³ A ngawi ung khaw ngawi hta, Dagon ah a gup cu m’dek ung a hmai yuk m’hleih ne kyu ne, Bawipa ah Thukhän M’küm ah ma ah ng’yän ci. Cun ah chang gui naw m’thou ba u ne, a hmun ung tha ba ci gui.

⁴ A ngawi ung khaw ngawi, a gup cu kyu ba mä ne, Thukhän M’küm ah ma ah ng’yän ba ci. Cun ung läi a lu la a kut gui cu hnget ne, m’kawt pei ah ng’yän ci gui; a pum bäng om ba ci.

⁵ (Cun ah kyasei, tuhngawi güt ung Dagon taigüpa gui la Ashdod ung khawihnah ciah chang avan naw cun ah hmun cu lek u ne, akhan ah kä hteit ci gui.)

⁶ Bawipa naw Ashdod chang gui cu akda vei m’kyuk gui ne, kyihkyawk sak gui ci. Ani naw ngami m’kyuk gui ne, ami khaw veing chang gui phi ami sa ung ng’khe khai ah taam gui ci.

⁷ Cun ah a kyak gui cu hmu u neta ngami naw, “Israel Khanpughi naw mikmi la mi Khanpughi Dagon cu m’kyuk pyi ci nei. Shin ah Thukhän M’küm cu shin ung kä mi tha ba khai nei” cik ci gui.

⁸ Cun ah kyasei ngami naw, a hei Philistin ghangpughang hma cu a täng ah khü gui u neta, ng’shi gui ci gui, “Israel Khanpughi ah Thukhän M’küm cu a i ah mi cik khai ang?” Ngami naw, “Gath ah hteh püi vä” cik ci gui. Ngami naw Gath ah hteh püi ci gui, cun cu Philistin mang gaw tumat ah kyak ci.

⁹ Cun ung phi cun a gawk awn ah Bawipa naw cun ah mang gaw cun phi m’kyuk ne, akdämduh ah düngkyong sak gui ci. Ani naw sa ng’khe nak awn m’kyuk gui sei, mang gaw ung chang avan aghi ak hmaw gawk yawp ci.

¹⁰ Cun ah kyasei ngami naw Thukhän M’küm cu a hei mang gaw Ekron ah hteh püi ci gui; cun a gawk vai am, chang gui m’lau lawk ci gui,” ngami naw Israel Khanpughi ah Thukhän M’küm law püi ci gui nei, mikmi mi van ami na ngawn nak gui vai ah kyak ci nei!”

¹¹ Cun ah kyasei Philistin ghangpughang ami van gui khü ba mä u neta, “Israel gui ah Thukhän M’küm cu amät ah hmun ung tha ba vä, cun ung acun naw mikmi la mi kyong ung ka gui kä na ngawn ba gui khai” cik ci gui. Mang gaw avan ung düngkyong nak om ci, a i ah kyasei ci ung Khanpughi naw tä khüt aih khai ah am kyuk gui ah hmawk ah kyak ci.

¹² Kä sik ciah chang gui phi ami sa ang khe nu law püi sei, chang gui cu, ami Khanpughi naw am htei gui vai ah kyap ne ng’pa ci gui.