1 SAMUEL 4 - Cho Bible Common Language 2016

Thukhän M’Küm Ami k’pan

¹ Cun sangung Philistin gui naw Israel gui cu tuk püi gui vai ah hteit ci gui, cun ah kyasei Israel gui naw ng’tuk püi tu ba gui vai ah pawng ci gui. Israel gui cu Ebenezer ung phung tu ne om u sei, Philistin gui cu Aphek ung om ci gui.

² Philistin gui näng ci gui, nuipai ciah ami ng’tuk awn ah ngami naw Israel gui cu shudep gui u ne, chang phia phli kip, ng’tuk nak ung ngawn gui ci gui.

³ K’pawih ba ci gui cu phung ah law ba u khäta, Israel ami ng’vai gui naw, “A i ah kyasei tuhngawi, mikmi na shudep gui khai ah Philistin gui cu Bawipa naw ang khah püi gui ang? Shilon ah ka, Bawipa ah Thukhän M’küm cu hteit ne mi lak khai nei, cun ung ani naw a täng ah na hteh püi gui ne, mi gaa ung na hun gui khai nei” cik ci gui.

⁴ Cun ah kyasei ngami naw Shilon ah ng’shä tüi u ne, Hlüngtai ciah Bawipa ah Thukhän M’küm cu lak ci gui. Tüiküi ng’phia mah gui ah khan ah mang kyang ung ngok ci. Eli ah a hta goi, Hophni la Phinehas cu Thukhän M’küm ung ng’gui ne law tuk ci goi.

⁵ Thukhän M’küm gawk law ba khäta, Israel chang gui cu khomdek thüng khai ah yei ne m’lau ci

⁶ gui. Phlistin gui naw ami m’lau cu ng’ya u neta, Hebrew phung ung ami m’lau cu van naw ngai tu vä! A i ah ami kyak tu khan ang?” cik ci gui. Ngami naw Bawipa ah Thukhän M’küm Hebrew phung ung a

⁷ gawk law ba cu hmu u ne kyi u neta, “Khanpughi cu ngami ah phung kyong ah lawk ci nei! Mikmi mi maih ci nei! Khotuh güt ung shin ah mäih mikmi ung a i, i ah kä kya man ci nei!

⁸ Cun ah huham mah ciah khanpughi gui ung ka, a u naw na hun gui hning khai ang? Ngami cu bungpuk ah Egypt chang khli ngawn ci gui ah khanpughi gui ah kyak ci gui!

⁹ M’gäi vä, Philistin chang gui! Chang na ne ng’tuk bi vä, kä cun ung Hebrew gui ah changshäm ah mi kya khai nei, ngami mi changshäm ah ami kyak ah mäih ah. Cun ah kyasei chang na ne ng’tuk bi vä!”

¹⁰ Phlistin gui naw k’tha na ne tu gui u ne Israel gui cu ami shukdep gui, cun ah kyasei ami im ah dawng ba ci gui. Acun ung ngawn sheh nak dämduh ci; Israel gakap phia phia thum ngawn gui ci gui.

¹¹ Khanpughi ah Thukhän M’küm cu gut gui ci gui, Eli ah hta goi Hophni la Phinehas cu ani nik hnih ngawn goi ci gui.

Eli Asih ah Mawng

¹² Benjamin pakhui ung ka chang tumat cu ng’tuk nak ah hmun ung ka Shilon ah khüt ne dawng law ba ci, a cu hnüüp gawk law ba ci. A thüi aih am dang nak ah, a sui k’teek ne, a lu khan ah m’dek tha ci.

¹³ Eli cu Thukhän m’kü ah phäh ah ng’ä aih neta, lam pei ah cäi ne ngok ci. Cun ah chang naw gawnu avan ung thu m’than law khäta, chang päng cu kyihkyawk ne kyap ci gui.

¹⁴ Eli naw cun ah k’aw gui cu ng’ya neta, “Shin ah k’aw gui avan cu a i ah mawng ang? Cun ah chang cu ang ghit ah Eli ah law ne, cun ah mawng thu m’thein lawk ci.

¹⁵ (Eli cu tuhbäi a kkho kum kaw kip lei cheit lawk ci, amik avan m’dauh ci.)

¹⁶ Cun ah chang naw, “Kei cu ng’tuk nak ung ka, ka phyawng lawk ci, acun ung ka alam pum tuhngawi ka dawng lawk ci” cik ci. Eli naw, “A i ah kyak ci ang, ka hta?” cine ng’shik ci.

¹⁷ Thu pyen lawk ciah chang naw, “Israel gui cu Philistin gui kyih ne dawng yawp ci gui; cun cu keimi ah phäh ah kyih aih vai kyak ci nei! Cun kawn ah na hta goi Hophni la Phinehas cu ngawn ci gui, Khanpughi ah Thukhän M’küm phi na gut gui ci gui!” cik ci.

¹⁸ Cun ah chang naw Thukhän M’küm ah mawng a pyen vai am, m’kawt pei ah Eli cu a ngoh nak ung ka, a hnu ah ng’lat ci. Ani cu ghi aih ne plan ci kya neta, ang kyak nak ung a hnü hnget sei sik ci. Ani cu kho kum phli kip ung Israel gui ah ng’vai pi ah kyak te ci.

Phinehas ah Chu hmei Asih ah mawng

¹⁹ Eli ah hta-achu, Phinehas ah chu cu käu mah ci, hta law ge khai kyak ci. Ani naw Thukhän M’küm ami guh gui ah mawng, apughi a sih ah mawng la a cei asih ah mawng cu ng’ya neta, ang ghit ah a poi m’neh law ne hta lawk ci.

²⁰ Ani si law hlü khäta, ani m’htei tuk ciah hnumi naw pyen nak ci, “Tha la ä! Pami ah na hta ci nei!” Cun ung phi ani naw kä ngai hning ci, kä m’shang hlawt ci.

²¹ Ani naw ak hmaw cu Ichabod ah ang ming sui ci, a mawng cu, “Khanpughi ah bämang nak naw Israel gui hteh tak ci” Thukhän M’küm ami guh gui, apughi ah sih la a cei ah sih am dang nak ah kyak ci.

²² “Khanpughi ah bämang nak naw Israel gui hteh tak ci nei” a ci ci, “A i ah kyasei ci ung, Khanpughi ah Thukhän M’küm ami guh gui ah phäh ah kyak ci.”