1 SAMUEL 31 - Cho Bible Common Language 2016

Saul la A hta gui ah Sih ah mawng

¹ Kilboa M’htung ah Israel gui cu Philistin gui naw tu gui ci gui. Israel chang gui akda cu ami ngawn gui, k’pawih ba ci gui la ghangpughang Saul la a hta gui cu dawng ci gui.

² Cun ung phi Philistin gui naw pha gui u ne, Saul ah hta thum, Jonathan, Abinadab la Malchishua gui cu ngawn gui ci gui.

³ Ami ng’tuk nak cu Saul ah pei yung ah chün la ci, amät phi ga gui ah m’la chuh seih aknui ah leim bai ci.

⁴ Ani naw ali htei kawt ciah changnong am, “Na khim phawng ne, kei na ngawn ä, cun ung shin ah Khanpughi kä yum ciah Philistin gui naw yei ne kä na ngawn khai gui” cik ci. Cun ung phi cun ah chang nong cun bi vai ah ang htei ah kyik ci. Cun ah kyasei Saul naw amät ah khim phawng ne, amät ng’tawk ci.

⁵ Cun ah chang nong naw Saul a sih cu hmu neta, a khim phawng ne, amät ng’tawk ne Saul awn a täng ah si tuk ci.

⁶ Cun cu Saul, a hta thum la chang nong ah sih ah mawng ah kyak ci; cu hnüüp ung Saul ah chang gui ami van sik ci gui.

⁷ Jeyreela khaw nawi la Jordan tuinu a kiangtäng ah om ciah Israel gui naw Israel gakap gui ami dawng ah mawng la Saul la a hta gui ami ngawn ah mawng cu ng’ya u neta, ami pigaw gui nawng ne dawng yawp ci gui. Cun kawn ah Philistin gui law u ne khäm yawp ci gui.

⁸ Ami ng’tuk nak ah a cituh hnüüp, Philistin gui naw gook ung ka ami khawh lak khai gui ah law u neta, Saul la a hta gui thum ah pumsa gui cu Kilboa M’htung ah hmuk ci gui.

⁹ Saul ah alu cu täng u ne, a awi k’bah cu sut u neta, Philistin khaw avan ung chang tüi u ne, a mawng thu ni cu a gup ami khawihnah gui la ami chang gui am m’thein ci gui.

¹⁰ Ani ah li khim gui cu ami khanpughinu Astarte ah Taigüim ung tai ci gui, a pum cu Beth Shan mang gaw k’pang ung khen ne tai ci gui.

¹¹ Philistin gui naw Saul ah khan ah ami bi gui ah mawng cu Kilead khaw Jebesh chang gui naw ng’ya u neta,

¹² a m’gäipi bäih düi law htük khäta, amü pum hteit ne Beth Shan ah lawk ci gui. Ngami naw Saul la a hta gui ah pum sa gui cu k’pang ung ka la u neta, Jebesh ah hteh püi ba u ne, m’khih ne m’cim ci gui.

¹³ Ngami naw ami guh gui cu la ba u ne gawnu ng’lung, m’dum ghing ka ah k’phuh ci gui, cun kawn ah hnüüp chih ung ei hlawi ci gui.