Biblia Todo Logo
Bib sou entènèt

- Piblisite -

1 SAMUEL 30 - Cho Bible Common Language 2016


Amalek gui Ami tuk ah mawng

1 Hnüüp goi alüng kawn ah David la a chang gui cu Ziklak ah law ba ci gui. Amalek gui naw Judah a htum lam cu ang ghit ah tu u ne, Ziklak cu tu nim ci gui. Ngami naw gawnu cu mei awn m’khih u ne,

2 hnumi avan khäm ci gui; a u phi kä ngawn ci gui, cun ung phi ami hteh ba ung ami van hteh püi gui ci gui.

3 David la ak chang gui gawk law u ne, gawnu m’khih u ne, ami chu gui, ami hta gui la ami hta hnumi gui ami hteh püi gui yawp cu hmuk ci gui.

4 David la a chang gui cu kyap ne, ng’pyang u ne, ami tha gui amaih güt kä düm ah m’lau ci gui.

5 David ah chu goi Ahinoam la Abigail phi hteh püi goi ci gui.

6 David cu khüikha nak akdäm ung gawk ci, a i ah kyasei ci ung, a chang gui ami van u ami hmaw gui a maih ah phäh a thüi aih ci gui, ani cu lung awn vawih vai ah k’bäi ah k’bäi ci gui; cun ung phi Bawipa a Khanpughi naw k’thamah nak pek ci.

7 David naw taigüpa Abiatha, Ahimelek ah hta am, “Shawiphaw na thak law ä” ci sei Abiatha naw thak law ci.

8 David naw Bawipa han ng’shi ne, “Cun ah tu lawk ciah chang gui ka läk gui vai aw? Ka pha gui vai aw” cik ci. Ani naw, “Ami hnu ah läk gui ä, pha gui ne, amo pha gui cu gung gui ä,” cik ci.

9 David la a chang phia chuk cu pawng ne hteit u ne, Besor tuihta pei ah gawk law u sei, amshah cu a ca ana om ci gui.

10 David cu a chang phia phli awn täi ne hteit ci gui; phia goi cu tui kah vai ah cümbawng aih u neta, a hei ga ah om shüt ci gui.

11 David awn hteit ciah chang gui naw bung ah Egypt chang ak hmaw cu hmu u neta, David ah law püi ci gui. Ngami naw tui la ei, pek ci gui.

12 K’thei ket ni, sapyit theih soi goi ni pek ci gui. Ani cu cun gui a ei kawn ah a k’tha be law ba ci; Ani cu hnüüp thum lüng ung a i kä ei awk ah om te ci.

13 David naw ani cu, “Na bawi a u ang? A hawi ka na lawk ci ang?” cine ng’shik ci. Ani naw, “Kei cu Egypt chang, Amalek chang gui ah changshäm nei. Gaw ngäta ka bawi naw ana nawng nak hnüüp thum law lawk ci nei.

14 Keimi naw Judah khaw a htumtäng Cherethit gui ah khaw la Kaleb pahta gui ah khaw cu tu ne, Ziklak gawnu cu kami m’khih ci nei,” cik ci.

15 David naw, “Cun ah ng’tuk bik ci gui ah na na khah püi hning khai aw?” cik ci. Ani naw, “Kä nami na ngawn khai, ka bawi am kä nami na ap ba khai ah Khanpughi ah ming ung shai nami tak ung läi ka ning khah püi gui khai” cik ci.

16 Ani naw David cu ngami ah hteh püi ci. Ng’tuk bik ciah chang gui cu pawi bi u ne, ei ne, aw ne, ami hmun ung püi pyang ne om ci gui, a i ah kyasei ci ung Philistin la Judah ung tu ne ami gah ah dämduh aih ciah khawh chang ah phäh ah kyak ci.

17 A ngawi ung khaw ngawi David naw tu gui ne, mühun güt ung ng’tawh püi gui ci. Kalauk ng’cum ne dawng ciah chang nong phia phli kawn ah a u phyawng ci kä om ci.

18 David naw chang päng la khawh avan, a chu goi mah ah Amalek gui naw ami hteh püi phung cu gung ba gui ci;

19 a i phi kä k’pawih nak ci. David naw a chang gui ah hta pami, hta hnumi gui la Amalek chang gui naw ami hteh püi avan cu gah ba ci.

20 Ani naw htome mak, sei mak gui phi gah ba ci; a chang gui naw sei me gui avan cu hoi u ne ma ne hteit ci gui, “Shin gui cu David ah ka gui nei” cine pyen ci gui.

21 Cun kawn ah David cu, ami tha kä om sei, tui hta ga ah ana om ci gui ah a chang phia goi ah om nak ah hteit ba ci. Ngami cu David la a chang gui hmu gui khai gui ah ana lawk ci gui, David cu ngami ah hteit ne ak lum ah yavaih na gui ci.

22 Cun ung phi chang om she, akholä gui naw David awn a täng ah hteit tuk ci amshah naw, “Ngami cu mikmi awn a täng ah kä hteit tuk ci gui, cun ah kyasei khawh api phi kä mi pe tu gui khai. Ngami naw ami chu gui la ami hta gui cu la ba u ne, a hei ah hteit u sä” cik ci gui.

23 Cun ung phi David naw, “Ka phäi nau gui aw, Bawipa ah ana pek nak gui ah khan ah cu cha ah kä nami bi vai nei! Ani naw phyawn nak na pe gui ne, ng’tuk bik ci gui ah khan ah näng nak na pe gui ci nei.

24 Cun ah nami pyen cu a u naw kä yum tuk khai nei! Van naw a täng ah mi ng’pai khai; ng’tuk va bik ciah chang gui la ei vai ngäng ne, mi hnu ah ana om ci gui cu a täng ah ng’pai khai gui nei” cik ci.

25 David naw läk vai, cun ah a pyan cu, Israel ung a ngawi yä ami läk ah kyak ci.

26 David cu Ziklak ah gawk law ba neta, ani naw khawh amshah cu a teih püi gui, Judah ng’vai gui am m’khäh gui ci, thu phi m’shäk gui ci, “Shin cu Bawipa ah ga gui ah ka, kami gah, nangmi ah phäh ah letsawng nei.”

27 Ani naw cun gui cu, Bethela ung chang gui, Judah a htum lam Ramah ung chang gui, Jattir gawnu gui ung chang gui,

28 Aroer, Siphmoth, Eshtemoa,

29 la Racala ung chang gui; Jerahmeela pahta, Kenit chang gui,

30 la Hormah, Borashan, Athach,

31 la Hebron gawnu gui ung chang gui. Ani naw avan ung m’khäh gui ci.

Cho Bible Common Language © Bible Society of Myanmar, 2016.

Bible Society of Myanmar
Swiv nou:



Piblisite