1 SAMUEL 3 - Cho Bible Common Language 2016

Samuel ah ma ah Bawipa Dang ci

¹ Cun yah ung ak hmaw Samuel cu Eli ah ka ung om ne Bawipa ah bi bik ci, a cu ah Bawipa ung ka lawk ciah ng’thu ken ci, ani ung ka lawk ciah muimang phi apihta ah kyak ci.

² Mü ät ung, tuhbäi amik mü khai ah Eli cu amät ah khan kyong ah ip ci;

³ Samuel cu theing ciah Thukhän M’küm ah om nak, ng’yii nak ah hmung ung ip ci. Khokä a thaih pha ung, mei a däi yah hta ung,

⁴ Bawipa naw Samuel cu khü ci. “Ä, saza,” ci ne

⁵ m’shang ci, ani cu Eli ah dawng neta, “Nang na na khü ci, shin ung ka om ci nei” cik ci. Cun ung phi Eli naw, “Kä ka ning khü ci, na ih nak ah hteit ba ä,” cik ci. Samuel cu a ih nak ah hteit ba ci.

^6-7 Bawipa naw Samuel cu khü ba mä ci. Ak hmaw naw khü cicu Bawipa bä ah kä hmat ci, a i ah kyasei ci ung, kä cun pha ung ani cu Bawipa naw kä ng’htau püi man ci. Cun ah kyasei, ani tho law ne, Eli ah hteit ne, “Nang na na khü ci, shin ung ka om ci nei” cik ci. Eli naw, “Kä ka ning khü ci, ka hta na ih nak ah hteit ba ä” cik ci.

⁸ Bawipa naw Samuel cu ak thum vei nak ah khü ci; ani tho ne, Eli ah om nak ah hteit neta, “Nang na na khü ci, shin ung ka om ci nei” cik ci. Cun kawn ah ak hmaw khü ci cu, Bawipa ah kyak ci, cicu Eli naw hmat ci.

⁹ Cun ah kyasei ani naw, “Na ih nak ah hteit ba ä; a ning khü law ba mä ah a kyak ung, “Pyen ä, Bawipa, na changshäm naw ka ning ngai ci nei,” na ci vai” cine m’cäi ci. Samuel cu a ih nak ah hteit ba ci.

¹⁰ Bawipa cu law ne ng’düi ne ta, “Samuel, Samuel!” ciah a ci ta a khü ah mäih ah khü ba ci, Samuel naw, “Pyen ä, na changshäm naw ka ngai ci nei” cik ci.

¹¹ Bawipa naw ani am, “I baw hnüüp ung Israel chang gui ah khan ah kei naw a i baw ka bi lawk khai, cun cu kyih aih vai kyak ci, cun ng’yak ciah chang päng cu cäicat khai.

¹² Cun ah hnüüp ung kei naw Eli ah kyongkhui hnu ng’tuk ne, m’kyih nak vai tün nak ungka naw ng’pyi nak ung khüt ci, avan ka law püi khai.

¹³ Kei naw ani am ka m’thein pyi ci, kei naw ani ah kyongkhui cu angtäi sei ka m’kyuk lawk khai. A i ah kyasei ci ung ani ah hta gui cu akshe ah ng’thu ne, kei na hnu ng’tuk püi ci gui. Eli naw cun ah ami bi cu hmat ci, cun ung phi kä m’cing gui hlawt ci.

¹⁴ Cun ah kyasei Eli ah kyong ung aktung ah ka m’dang cu, a i khawihnah nak, a i douthak nak naw phi, shin ah kyih vai ah katnak ah a phu cu kä heng hlawt khai,” cik ci.

¹⁵ Samuel cu khaw ngawi gütah a ih nak ung om ci, cun kawn ah ani cu tho law ne Bawipa ah im kawt gui cu hmawng ci. Ani naw ang muimang ah mawng Eli am am’thein vai ah kyik ci.

¹⁶ Eli naw khü ne, “Samuel, ka chang hta!” cine khü ci. Samuel naw, “Ä, saza” cine m’shang ci.

¹⁷ Eli naw, “Bawipa naw a i ang a ning m’thein. A i phi kei am kä na na m’zih vai. Ani naw a pyen päng kä na na m’thein ah a kyak ung Khanpughi naw aktä ah ning m’kyuk khai,” cik ci.

¹⁸ Cun ah kyasei Samuel naw a päng m’thein ci; a i hta phi kä m’zih ci. Eli naw, “Ani cu Bawipa nei; ani ung om ciah aknipi phung cu ani naw bik khai nei” cik ci.

¹⁹ Samuel cu ng’vai lawk ci, Bawipa naw a täng ah om püi ne, a päng bi sei, Samuel ah ng’thu avan cu akcang ah kümbe lawk ci.

²⁰ Cun ah kyasei Israel chang avan, khaw tumat ah akcawi ungka naw vang ak cawi ung khüt ci naw, Samuel cu Bawipa ah prophet akcang ah hmat lawk ci gui.

²¹ Bawipa naw Samuel ah ma ah ng’dang law neh ang’thu püi nak ah Shilon ung amät naw amät m’dang ba ci. Cun kawn ah Samuel naw thu a pyen ung Israel chang van naw ngai ci gui.