1 SAMUEL 29 - Cho Bible Common Language 2016

David cu Philistin gui naw Hnu ng’tuk püi ci gui

¹ Philistin gui naw ami gakap gui avan cu a täng ah Aphek ung law püi ci gui, cun yah ung Israel gui cu Jeyreela khaw ng’nawi ung phung tu ne om ci gui.

² Philistin ghangpughang hma cu, chang phia, chang phia gha ciah gakap gui awn ana a ng’cham vük ci gui; David la ak chang gui cu ghangpughang Achish ah gakap ung law tuk ci gui.

³ Philistin gabawi gui naw hmu gui u neta, “Shin ah Hebrew chang gui a i hawi lawk ci gui ang?” cik ci gui. Achish naw, “Shin cu David, ghangpughang Saul ah bawi, ani cu kei awn a täng ah a om shou law hta ci. Ani cu kei ah a law ung tün ne, kei naw hma ciah ka hmuh vai ah a i phi kä bik ci,” cik ci.

⁴ Cun ung phi Philistin gabawi gui naw Achish cu m’lung she na neta ami pyen nak cu, “Na pek gui ah gawnu ung ami hteh ba vai ah tüi ba gui ä. Mikmi awn a täng ah ng’tuk nak ah kä hteh en sak gui ä. Mi ng’tuk sangung ani naw lat ne na tu ba gui hning ci nei. Shin cu ani naw mikmi ah sih nak awn a bawi ah hmai kiang nak a gah nak vai ah ani ah phäh ah aknipi ah kä kya ne ang?

⁵ Cun kawn ah shin cu David, hnumi gui naw ami ng’lam ami ng’äi ung, Saul naw phia gha ngawn ci, David naw phia gha ah a gha ngawn ci, cine ami ng’äi ah kyak ci.”

⁶ Achish naw David khü neta, ani am, “Kei naw Israel ah ghing ciah Khanpughi ung aktung ah ka ning pyen nak cu; nang cu kei ung bekhüt ne kei awn a täng ah ka ning hteh sak la shin ung na ng’tuk tu ah phäh ah kei naw ka ning yei nak ci. Kei ah na law ung tün ne, nang ah na hmakat nak cu kei naw kä ka hmuk ci. Cun ung phi a hei ghangpughang gui naw kä ning yum ci gui.

⁷ Cun ah kyasei dimdeih nak awn na im ah hteit ba ä, ngami ah kä yei nak vai phi a i kä bi en ä,” cik ci.

⁸ David naw, “Saza, a i ang hma ci ka bi a om? Nang ah bi ka bi law ung tün ne, ka hma nak kä om ciah na pyen ah mäih ah a kyak ung, ka bawipa la ghangpughang, a i ah kyasei, nang awn a täng ah kä hteit ne, na ga gui cu kä ka tuk tu vai ang?”

⁹ Achish naw, “Kei naw ka yum ci nei, nang cu Khanpughi ah khanchang ah mäih ah na bekhüt ciah kei naw ka hmat ci nei. Cun ung phi a hei ghangpughang gui naw kei mi awn a täng ah ng’tuk nak ah kä na hteit tu hning khai ah pyen ci gui nei.

¹⁰ Cun ah kyasei David, ngawi ung kho ngawi, Saul nawng shüt ne kei ah lawk ciah chang gui nami van, kho ngawi hta ung tho ne, khaw a thaih vai am nami hteh vai” cik ci.

¹¹ Cun ah kyasei David la a chang gui cu khaw ngawi hta ung ang dawt ah pawng ne, Philistin ah hteit ba ci gui, Philistin gui cu Jeyreela hteit ci gui.