1 SAMUEL 28 - Cho Bible Common Language 2016

¹ Api shou hta khäta Philistin gui naw ami gakap gui cu k’bum u ne, Israel gui cu tuk vai ah pawng ci gui, Achish naw David am, “Tuhbäi ung nang naw na hmat pyi ci, nang la na chang gui cu kei täng ah om ne ng’tuk nami bik khai” cik ci.

² David naw, “Ä za, kei cu na na changshäm ah ka kyak ci, kei naw a i ka bi hning cu nang naw na hmuk khai nei” cik ci. Achish naw, “Bä khai, kei naw nang cu kei na ngäng ciah gabawi ah angtäi sei ka ning tha khai” cik ci.

Saul naw k’ce ng’shik ci

³ Tuhbäi cu Samuel sik ci, Israel chang ami van cu ani ah phäh ah mang gaw Ramah ah k’phuh ci gui. Saul naw ng’cä bang thei ci gui la k’ce gui cu, Israel khaw ami hteh tak vai ah ak täm gui ah kyak ci.

⁴ Philistin gakap gui cu Shunem gawnu pei ah phung tu ne ng’bum ci gui; Saul naw Israel chang gui cu Kilboa m’htung ah phung tu ne bum püi gui ci.

⁵ Saul naw Philistin gakap gui cu hmu gui neta, cäicat ci,

⁶ Cun ah kyasei a i ka bik khai cine Bawipa cu ng’shik ci. Cun ung phi Bawipa naw kä m’shang pang ci, ng’mang ung phi kia, Urim, Thummim la prophet awn phi kä m’shang ci.

⁷ Cun kawn ah Saul naw a bawi gui k’thäh gui ne, “Cek ciah hnumi na shui pe vä, hteit ne ka ng’shik khai” cik ci. “Endor ah tumat om ci nei” cik ci gui.

⁸ Saul naw amüi m’thawng neta; sui a hei ng’thong ne, khaw hnüp law khäta a chang hnih khah püi ne, cun ah hnumi ah hteit ci. Ani naw cun ah hnumi am, “Mumcha na ng’shi pe neta, a i i ah kya lawk khai cu na m’thein ä, kei naw a ming ka pyen nak chang ah mümcha cu khü ä” cik ci.

⁹ Hnumi naw, “Ghangpughang Saul ah bi cu na hmat ci, ani naw ng’cä ng’bang thei ci la k’ce gui Israel ung ka a hteh sak gui phi na hmat ci. A i ah kyasei kei na na phak khai ah, na na ngawn khai ah na k’tha nak ang?” cik ci.

¹⁰ Saul naw thukhän ang cim ah bi ci.” Ghing ciah Bawipa ung shai ka tak ci. Shin bi ah phäh ah nang cu kä na kyuk khai,” ani naw hnumi pyen nak ci.

¹¹ Hnumi naw, “A u ka ning khü pek vai ang” cik ci. Ani naw, “Samuel” cik ci.

¹² Hnumi naw Samuel cu hmu neta, Saul am m’lau ne a pyen nak cu, “A i ah kyasei na na m’hleei ang? Nang cu ghangpughang Saul nei!” cik ci.

¹³ Ghangpughang naw ani am, “Kä na kyih vai! A i ang na hmuh?” cik ci. Ani naw, “M’dek ung ka mümcha kai law sei ka hmuk ci” cik ci.

¹⁴ Ani naw, “A i ah mäih ang a law?” cine ng’shik ci. “Cun cu a ghipa ah kya ne kai lawk ci, ani cu suinu sui ci” cine m’shan ba ci. Saul naw cun cu Samuel ah kyak ciah hmat neta, m’dek ung ng’boop ne chang m’sui ci.

¹⁵ Samuel naw Saul am, “A i ah kyasei na na m’shok shü ang? A i ah kyasei shi ah ka law vai ah na bi ang? cik ci. Saul naw “Kei cu khüikha nak akdäm ung ka gawk ci nei! Philistin gui naw na ng’tuk püi ci gui, Khanpughi naw na nawng ci. Cun ah kyasei ka ning khü nei, a i ka bi vai cu na m’thein ä” cik ci.

¹⁶ Samuel naw, “A i ah kyasei, Bawipa naw ning nawng ne, na ga ah kya pyi khäta, kei na na khü ang?

¹⁷ Bawipa naw kei ung ana m’thein ah mäih ah abi ah kyak ci nei: ani naw uknak khaw cu nang ung ka la pyi ci, nang ah hnün ung David am pe pyi ci nei.

¹⁸ Bawipa ah thumkhän cu nang naw kä na läk ci, Amalek chang gui la mi khawh avan cu kä na m’di yawp ci. A cun ah phäh ah Bawipa naw nang ung shin ah abi ah kyak ci nei.

¹⁹ Ani naw ning ap khai, Israel gui cu Philistin gui am ap khai. Ngawi ung nang la na hta cu kei ah nani ng’dawn khai, Bawipa naw Israel gakap gui cu Philistin gui am ap gui khai” cik ci.

²⁰ A cun vai am Saul cu kyu ne m’dek ung cai ne ng’yän ci, Samuel ah ng’thu cu kyih aih ci. Ani cu mü pum hnüüp pum a i kä ei awk ne ak thagui maih ci.

²¹ Hnumi cu a pei ah hteit ne, kyi aih sei hmu neta ani am, “Na bä ni saza aw, na na ng’shi ah mäih ah kei naw ka hnungui pe ne ka bi nei.

²² Tuhbäi kei naw ka pyen cu nabäni, na bi vai. Na ei vai ei ka pyang khai, cun cu na ei vai, cun ung nang cu khüi ne lam na hteit hning khai” cik ci.

²³ Saul naw ma neta, a i phi kä ka ei khai nei, cik ci. A bawi gui naw phi ei a ei vai ah m’cäi ci gui. Ak hnu ah ani naw yum ne, m’dek ung ka tho ba ne, ih phak ung ngok ci.

²⁴ Hnumi naw plan khai ah a vuh ah sei hta cu ang ghit ah ngawn ci. Ani naw m’htut vai den cu la ne, pyang ne, k’caw kä shum ah m’htut cu ng’shai ci.

²⁵ Ani naw Saul la akchang gui am ei chan gui ci, ngami naw ei ci gui. A cu mü cun ung ka hteit ba ci gui.