1 SAMUEL 27 - Cho Bible Common Language 2016

Philistin Gui ah lung ah David

¹ David cu amät ng’htau ne, “Khaw hnüüp ät ung Saul naw na ngawn khai. Kei ah phäh ah aknipi cu Philistin ah phyawn vai ah hteh vai ah kyak ci. Cun ung Saul naw Israel khaw ung ana shui m’lung si khai, cun ung kei ka phyawng khai.”

² Cun ah David la a chang phia chuk cu ang ghit ah kath ghangpughang, Maoch ah hta Achish ah hteit ci gui.

³ David la a chang gui cu ami kyong chang gui mah ah kath khaw ah om tuk ci gui. David la akchu goi Jeyreela ah ka Ahinoam la karmela ah ka Nabala ah chu hmei Abigail phi hteit tuk ci goi.

⁴ Saul naw David cu kath khaw ah phyawng ne adawng cu ng’ya neta, ani k’tha na ne ashui cu nawng ci.

⁵ David naw Achish am, “Nang cu ka teih püi ah na kyak ung, gawnu aläm tumat k’süm ne, na om tu sak ä. Saza, mang gawnu ung nang awn a täng ah ka om tu vai kä hlü hnga khai nei,” cik ci.

⁶ Cun ah kyasei Achish naw Ziklak gawnu cu pe tuk ci, cun ah kyasei Ziklak cu Judah ghangpughang gui naw tuh güt ami khäm ah kyak ci.

⁷ David cu Philistin ah cha gha lei chuk om tuk ci.

⁸ Cun yah ung David la a chang gui naw, cau ä tün ne cun ah khaw ung ana om ci gui ah Keshura, Kirzi la Amalek chang gui cu tu ne näng ci gui. Ani naw ami khaw cu ang ghit ah tu ne, Shura ah khüt ne Egypt ah hteh nak avan cu khäm ne;

⁹ chang pami, hnumi avan ngawn ne, htome, seipat, ng’se la, kalauk gui avan la suisak gui avan cu la yawp ci. Cun ungka naw Achish ah law ba ci.

¹⁰ Achish naw ng’shik ci, “Tuhbäi a i ung khüt ne ang nami tuk, nami khä” cine ng’shik ci. David naw, Judah khaw a htum lam Jerahmeela pahta gui ah khaw, kenit chang gui ah om nak ah khaw ung khüt ciah a mawng m’thein tuk ci.

¹¹ David naw hnumi, pami chang avan a ngawn ah kya ne, kath ah hteit khai a u kä om ci, ani la a chang gui ah bi gui cu hteit ne pyen khai a u kä om ci. Shin cu David naw Philistin ah a om tu yah ah pum abi ah kyak ci.

¹² Achish naw David cu ngaih gep neta, “Ani cu amät ah chang Israel gui naw ang htei ah ami thüi nak ah kyak ci, cun ah kyasei ani naw a ghin ah chuih kei ah bi bik khai” cine amät ng’htau ci.