1 SAMUEL 26 - Cho Bible Common Language 2016

David naw Saul K’phiawn Bamä ci

¹ Ziph ah ka chang amshah gui cu Kibeah ah Saul ah hteit u neta, Judean khaw bung ak cawi, Hachilah m’htung ah David ng’thup ci, cine m’thein ci gui.

² Saul cu a cun vai am Israel gakap akni pi phia thumkip ng’düih püi ne, Ziph bung ah David shui vai ah hteit ci gui,

³ Hachila m’htung ah hteh nak lam pei ah phung tu ne om ci gui. David cu bung ah om lä ci, Saul naw law ne a shui cu ani naw hmat neta,

⁴ sübik tüi ne teng sak gui neta, Saul cu akcang ah om sei hmuk ci.

⁵ Ani cu ang ghit ah hteit ne, Saul ni, Nera ah ah hta Abner ni, Saul ah gabawi ni ah ami ih nak cu ang kheing ah teng ci. Saul cu phung ah kyong ah ip ci, akchang gui naw phung tu ne koi ne om ci gui.

⁶ David naw Hittite chang Ahimelek la Abishai, Joab ah a phäi (ani cu Zeruiah) cu khü goi ne, “Nang ni ung ka a u ang Saul ah phung ah kei awn a täng ah a hteh tu kaw?” cik ci. Abishai naw, “Ä, ka hteit tuk khai” cik ci.

⁷ Cu mü ung David la Abishai cu Saul ah phung kyong ah lut ni ne, ani cu hmuk ci goi; Saul cu phung ah ang lung ung, alu kung ah k’htei k’süh ne ip ci, Abner la gakap gui naw koi ne ip ci gui.

⁸ Abishai naw David am, “Tuhmü Khanpughi naw na ga cu na huham kyong ah tha ci nei. Tuhbäi amät ah k’htei awn m’dek ung ng’süh khai ah hnü ät ge ka shun khai, hnih vei baw, kä ka shun khai! cik ci.

⁹ Cun ung phi David naw, “Nang naw ani kä na hnim vai! A ghü ah ghangpughang hnim cicu Khanpughi naw akcang ah m’kyuk ci.

¹⁰ David naw, “Ghing ciah Bawipa ung kei naw ka hmat ci, Bawipa amät naw Saul cu ngawn khai, akhin gawk law sei a sih vai ah baw, ng’tuk nak ung asih vai ah baw cik khai.

¹¹ Bawipa naw am düih ah ghangpughang cu kei naw kä ka ngawn vai ah Bawipa naw na ma nak ci nei! Ak htei la a tui um la neta ni hteit ba kaw” cik ci.

¹² David naw Saul ah lu kung ung ka ak htei la a tui um cu la khäta ani la Abishai cu hteit ba ci goi. A i i ah kyak cicu a u naw kä hmuk ci, a u phi kä ng’shüm lawk ci, ngami ami van cu hnai ne ip ci gui, a i ah kyasei ci ung Bawipa naw a mi van ah khan ah ak nep ah ih nak cu a yuk tüih law ah kyak ci.

¹³ Cun kawn David naw khaw nawi ah nong ga, khaw m’htung ah kai ne, a phyawn nak vai ng’shong ci ung om neta,

¹⁴ Saul ah gakap gui la Abner am m’lau ne “Abner, ka ng’hawh na ng’ya hning naw” cik ci. Abner naw, “A u ang ng’hawh ne, ghangpughang m’tho ci” cik ci.

¹⁵ David naw, “Abner, nang cu Israel ung akdäm duh pi ah chang ma? A i ah kyasei na bawi, ghangpughang cu kä na ngäng m’khüt ang? Tuhbäi chang tumat naw na bawi ngawn khai ah phung kyong ah lut ci nei.

¹⁶ Na bi kä na näng ci nei, Abner aw! Kei naw ghing ciah Bawipa ung akthuk ah ka pyen cu, nang cu na sih vai ah khin i nei, ai ah kyasei ci ung Bawipa naw ghangpughang ah ak hmoh ah na bawi cu kä na ngäng m’khüt ci nei. Teng ä! ghangpughang ah k’htei a hawi ang? A hawi ang a lu kung ah om ciah tui um?” cik ci.

¹⁷ Saul naw David ah k’aw cu hmat neta, “David, cän cu nang ma ka hta?” cine ng’shih ci. David naw, “Ä, ka bawi ang,” cik ci.

¹⁸ Ani naw k’täi ne, “A i ah kyasei, saza, na na changshäm cu, tuh güt na, na k’täm ang? A i ang kei naw ka bi? A i katnak ang kei naw ka bi?

¹⁹ Ka bawimang, ka pyen law vai ah thu cu ngai ä. Kei na na hnu ng’tuk püi vai ah Bawipa naw ning tüi ciah a kyak ung, ani am dou thak naw am lung thawng sak khai; chang ah bi ah a kyak läi ung ami khan ah Bawipa ah plah taam nak om sä. Ngami naw kei cu Bawipa ah khaw lei ung ka, a hei khanpughi gui khawihnah nak vai ah akhaw hei ah na k’täm ci gui nei.

²⁰ A khaw lei hei, Bawipa awn ng’shawng nak ung, kä na ngawn en u sä. A i ah kyasei Israel ghangpughang naw ng’hli ah mäih ah kei cu law ne ana ngawn hlü ang? A i ah kyasei bung ah kha ah mäih ah kei cu ana yäi ang?

²¹ Saul naw, “David, ka hta, kei ka hma ci nei, law ba ä! Kei naw kä ka ning hnim ba khai nei, a i ah kyasei ci ung tuh mü nang naw ka hnun na na k’phawn ci. Kei cu ka gu ang ci! Kei naw kyihkyawk vai ka bik ci!” cik ci.

²² David naw, “Ka bawimang, na k’htei shin ung nei.

²³ Na chang tumat law ne la law ba sä. Bekhüt ci la düng ciah chang cu Bawipa naw m’cümhnah ci nei. Tuh ngawi nang cu, ani naw ka huham kyong ah ning tha ci nei, cung phi kä ka ning hnim ci, nang cu Bawipa naw ghangpughang ah a ning hmoh ah kyak ci.

²⁴ Tuh ngawi kei naw nang ah hnun ka ning phyawn ah mäih ah, Bawipa naw ka khan ah bi sä, khüikha nak avan ung na phyawn sak sä!” cik ci.

²⁵ Saul naw David am, “Khanpughi naw hriham ning pe sä, ka hta! Na bi nak päng ung na näng khai nei!” cik ci. Cun ah kyasei David cu amät ah lam ung hteit sei, Saul cu a im ah hteit ba ci.