1 SAMUEL 25 - Cho Bible Common Language 2016

Samuel ah Sih ah mawng

¹ Samuel si sei, Israel chang gui ami van a täng ah law ne thüi kyap ci gui. Ani cu Ramah ah amät ah im ah k’phuh ci gui. Cun kawn ah David cu Param bungpuk ah hteit ci.

David la Abigail

^2-3 A cu ah Kaleb pahta ung ka Nabala ming nak ciah chang om ci, ani cu Maon gawnu ungka, karmela gawnu pei ah khawpäng ciah kyak ci. Ani cu a täng ah bühmang ci, htome phia thum kip la me phia gha tak ci. Achu Abigail cu kyom ne lulang ci, cun ung phi ani cu chang sawkshe, m’lungshe ciah chang ah kyak ci. Nabala naw Karmelaa ah a htomu k’teiu ci,

⁴ bung ah om ciah David naw cun ah a mawng cu ng’yak ci,

⁵ Ani naw chang nong sing gha cu m’cäi gui ne, Nabala hmuk khai gui ah karmela ah tüi gui ne, a yavaih nak ah ng’thu cu m’khäh ci.

⁶ Ani naw m’cumcäi gui ne Nabala am a pyen sak gui cu: “David naw yavaih nak ak ning m’khäh lawk ci nei, ka teihpui, nang, na kyongchang la na khawk avan ah khan ah yeikyai nak om ci nei.

⁷ Ani naw, nang naw na hto gui amu na k’teiu cu ng’yak ci nei. Nang naw na hmat vai ang yak hlü cu nang ah htoshäm gui cu keimi awn a täng ah om ci gui, keimi naw a i ah kä kami ci gui ci. Ngami kamela ung ami om yah ah pum ngami ah ka cu a u naw kä m’guk ci.

⁸ Ngami cu na ng’shi gui vai, ngami naw ning m’thein khai gui. Pawi hnüüp ung keimi kami lawk khai. M’gein nak awn na na dou gui vai ah David naw ning thäh ci nei. Na na changshäm gui la na teihpui David ung a i ah na bi hning cu na m’thein gui ä.”

⁹ David ah chang gui naw shin ah ng’thu cu David ah ming awn Nabala ah hteh püi ci gui. Ngami naw a cu ah ngäng ci gui,

¹⁰ Nabala naw ak mü ah, “David? Ani a u ang? Ani ah mawng kä ka ng’ya man ci! Shin ah khaw cu tuhchü ung changshäm dawng ci gui awn be ci nei.

¹¹ Kei naw ka m’htut la ka tui ni, htomu k’teiu ci gui ah phäh ah ka ngawn peit gui ah sa gui cu kä la ba ne, a hawi ka ah kä ka hmat, lawk ci gui am ka pe gui khai ma?” cik ci.

¹² David ah chang gui cu hteit ba u neta, Nabala ah pyen cu m’thein ba ci gui.

¹³ David naw k’bäi ne, “Nami khim k’bah vä” ci sei ami van naw k’bah ci gui. David phi a khim k’bah neta, a chang phia phli cu khah püi ne, phia goi am ami khawh cham gui cu ngäng sak gui ci.

¹⁴ Nabala ah changshäm tumat naw Nabala ah chu Abigail am, “Nang na ng’yak ci ang? David naw bungpuk ah ka naw chang tüi law ne mi bawi cu yavaih law nak ci, cun ung phi ani naw k’she na gui ci.

¹⁵ Cun ung phi ngami cu keimi ah khan ah nik ci gui; kä na tüihtok gui ci gui, lo ah ngami awn a täng ah kami om lä ci, kami ka a i phi kä m’gu man ci gui.

¹⁶ Hto gui shäm ne ngami awn a täng ah kami om yah ung amü, a hnüüp akphlüt ah na ngäng gui ci gui.

¹⁷ Shin ah mawng, na bä ni, ngaih-tüh neta, a i bi vai k’bäi ä. Shin naw mi bawi la akyong chang gui cu khüikha sak hning ci nei. Ani cu ling aih ci kya ne a u phi kä ngai ci!”

¹⁸ Abigail naw ang ghit ah, m’htut pum phia goi, sapyit tui meh vun ng’ip goi ung ak be, htome m’ket pum hma, m’vapüm hlaw phei gha lei chih, sapyit ket soi phia, thei ket htun phia goi cu la ah khan ah taih ci.

¹⁹ Cun kawn ah ani naw changshäm gui am, “Ana hteit ma vä, ka ning läk law gui khai” cik ci. Cun ung phi a cei ah ma ah a i kä pyen ci.

²⁰ Ani cu la ng’cum ne, m’htung nawi ah vang hlat neta, David la a chang gui ana law u sei ang ghit ah hmu gui ci.

²¹ David naw ngai ci, a i ah kyasei, shin ah bung ah, shin ah chang ah khawh cu ka shungvong läng ang? Ani ah ka a i phi kä ka m’gu man ci, shin cu kei naw ka m’hteihtang ah phäh ah ana thung nak ah kyak ci!

²² Khaw kä thai pha sei shin ah chang gui tumat phi kä om ba khai ah kä ka ngawn yawp ung, Khanpughi naw ka sik khai ah na that sä!” cik ci.

²³ Abigail naw David cu hmu neta, ang ghit ah m’dek ung kyum ne,

²⁴ David ah khaw pei ah ng’düi neta, ani am, “Na bä ni, bawi aw, na ngai ä! k’bün nak cu na hen ba sak ä.

²⁵ Na bä ni, Nabala ah khan ah a i kä she bi en ä, ani cu kä chang man nei! Ani cu aming ah mäih ah akgu ang ah kyak ci nei! Saza aw, na chang gui ami law yah ung kä ka om ci.

²⁶ Na ga gui ah khan ah phu tu ne, na ngawn nak gui vai ung ka, Bawipa naw ning k’pang ci nei. Ghing ciah Bawipa ung aktung ah ka pyen cu na ga gui la nang ning hnim hlük ci gui avan cu Nabala ah mäih ah m’kyuk nak gah khai gui nei.

²⁷ Na bä ni, saza, shin ah ka law püi ah laksawng cu dou vä, na chang gui am pe gui ä.

²⁸ Saza, na bä ni, na m’geinsei ä, hma nak ka bi phung cu. Bawipa naw ghangpughang ah ning hmoh khai, na hta ng’shon gui phi a cun ah kyak khai, a i ah kyasei ci ung, nang cu ani ah phäh ah ng’tuk na bik ci; nang cu na ghin ah chuih akshe kä na bik ci.

²⁹ Chang tumat mat naw, ning tu ne, a ning ngawn hlü ah a kyak ung, chang naw a khawh ni a ngäng ah mäih ah Bawipa na Khanpughi naw ning phyawn khai. Na ga gui läi cu, chang naw yaili ung lung a kah ah mäih ah Bawipa naw k’täm ne gawt gui khai.

³⁰ Bawipa naw nang ung ashai tak ah mäih ah nik ci gui avan abi law ung, nang cu Israel ghangpughang ah a ning hmoh law ung,

³¹ saza, a mawng kä om sei chang ngawn la na mät ah phu na tuk ah phäh ah na ng’yu ba vai, na a yä ba vai, kä om khai nei. Bawipa naw hriham a ning pek ung, saza, kä na na m’hnih en vai nei.”

³² David naw ani am, “Bawipa m’tam nei, Israel Khanpughi, ani naw kei, na na hmuk khai ah a ning tüih law nei!

³³ Na ah ngaih ni nak phäh la chang ka ngawn nak vai la ka phu ka tuk nak vai ung ka, tuh ngawi na na k’pan ah phäh ah Khanpughi yei nak nei.

³⁴ Nang ka ning hnim nak vai ung ka, Bawipa naw na k’pang ci nei. Ghing ciah Israel Khanpughi ung aktung ah ka pyen cu nang naw ang ghit ah kä na na hmuh vai sü ung Nabala ah chang gui avan cu tuhngawi khaw ngawi si yawp khai sü gui te nei!” cik ci.

³⁵ Cun kawn ah David naw a law püi gui cu dou neta, ani am “Na im ah hteit ba ä, kä ng’ä ä. Na ng’yak hlü ah kei naw ka bik khai nei” cik ci.

³⁶ Abigail cu Nabala ah hteit ba ci, cun yah ung ani cu ghangpughang ah pawi ah mäih ah a im ah bik ci. Ani cu awktat ne, yei ne om ci, cun ah kyasei a chu naw a ngawi ung khaw ngawi güt a i kä m’thein ci.

³⁷ Ani ang sim ba kawn ah a mawng avan m’thein ci, ani cu cäicat ne yaica neta khem man man ah ng’khem ci.

³⁸ Hnüüp gha hlawk lüng khäta Bawipa naw Nabala cu hnim sei sik ci.

³⁹ David naw Nabala ah a sih cu ng’ya neta, “Bawipa m’tam nei! Ani naw na yawshe nak ciah Nabala ah khan ah phu tu pyi ci nei, ana changshäm cu a hma ka bi nak vai ung ka, nak pang ci nei. Akshe ah a om ah phäh ah Nabala cu Bawipa naw m’kyuk pyi ci nei” cik ci. Cun kawn ah David naw Abigail am ng’shä tüih ne, ak chu nak ba vai ah mawng pyen ci.

⁴⁰ A changshäm cu karmela ah hteit neta, ani am, “David naw akchu ah ning lak vai ah ana tüih law gui nei” cik ci gui.

⁴¹ Abigail cu m’dek ung ng’boop neta, “Kei cu ani ah changshäm nei, ani ah chang gui ah khaw m’si vai ah ka om ge ci nei” cik ci.

⁴² Ani cu ang ghit ah tho law ne a la ung cun ci. A chang hnumi hma ng’khah püi ne, ani ah chu ah kyak ci.

⁴³ David naw Jeyreela ah ka Ahinoam cu chu nak ci, tuhbäi Abigail phi chu na ba ci.

⁴⁴ Cun yah ung Saul naw, David ah chu te a hta hnumi Michala cu Laish ah hta Paltian chu na sak ci, cun cu Kallim gawnu ung ka ah kyak ci.