1 SAMUEL 24 - Cho Bible Common Language 2016

David naw Saul k’phiawn ci

¹ Saul naw Philistin gui tu ne ng’hlat law ba khäta, David cu Engedi bung pei ah om ci nei, cine m’thein ci gui.

² Saul naw Israel ung akni pi gakap phia thum ghü neta, David cu sathai ah om nak ah lungsong ah ak kyang lam yung ah shui ci.

³ Ani cu lam ah ng’leng hto im gui ah pei ah khui ung hteit ne ng’now phyam ci. A cun ah khui ah vangtäng ung David la a chang gui cu ng’thup ci gui.

⁴ Ngami naw ani am, “Shin cu nang ah phäh ah kyak ci! Na ga cu na huham kyang ah tha khai ah Bawipa naw ning m’thein pyi ci, cun ah kyasei nang naw ani ah khan ah na bi hlü na bi hning ci.” David cu ng’vak ne hteit neta, Saul naw kä a hmat ah a suinu cu at ne hteh püi ci.

⁵ Cun ung phi David ah am lung ung khüikha nak gawk lawk ci,

⁶ ani naw ak chang gui am, “Bawipa naw ka bawi ah khan ah nat nak kä ka bi vai ah na k’pang ci, ani cu Bawipa naw ghangpughang ah a ghü ah kyak ci! Kei naw ani api ah phi kä ka nat sak khai, ani cu Bawipa naw a ghü ah ghangpughang ah kyak ci!”

⁷ David naw akchang gui cu Saul kä tuk vai ah hmat sak gui ci. Saul cu tho law ne, khui ung ka lut law ne tün ne hteit ci.

⁸ David naw a hnu ah läk law neta ani cu khü ci, “Bawi mang aw!” Saul cu ng’hlat law khäta, David naw m’dek ung m’khukdong ne, chang m’sui neta,

⁹ ani naw, “Kei naw ka ning bi vai ah ka tha nak ciah chang gui ah pyen cu a i ah kyasei na ngaih ang?

¹⁰ Na mät naw na hmuh hning ci, tuh bäihta shin ah khui ung Bawipa naw nang cu kei ah huham kyong ah ning tha ci. Ka chang amshah naw nang ka ning ngawn vai ah pyen ci gui, cun ung phi nang ah phäh ah a yä neta, nang ah khan ah api ah phi naknak kä bi vai ah ka pyen ci, a i ah kyasei ci ung nang cu Bawipa naw ghangpughang ah a ning ghü ah kyak ci.

¹¹ Teng ä, ka pa, na suinu ah mawng at ne ka kawt ci! Kei naw ka ning ngawn hning te ci. Cun ung phi na suinu bäng ka at ci. Kei naw nang kä ka ning hnu ng’tuk püi hlü nak la kä ka ning bi hlü cu a shin naw ning hmat sak ci nei. Nang ung a i hma nak kä ka bi ngä sei phi, nang naw kei na na ngawn khai ah na na ga nak ci.

¹² Mi hma nak cu Bawipa naw m’khoi m’cha sä! Kei naw api ah phi kä na ning nat sak ci kyasei, nang naw kei ah khan ah hnu ng’tuk ne na hnün thawh nak cu Bawipa naw ning m’kyuk sä.

¹³ Nang naw thu phyim na hmat ci, “Akshe cu changshe bäng naw bik ci! Cun ah kyasei kei naw kä ka ning bik khai.

¹⁴ Teng vä, Israel ghangpughang naw chang ngawn vai ah k’tha nak ci nei! Teng vä, a i ang a gawt! ui k’si ang, ui ng’hli ang!

¹⁵ Bawipa naw m’khoi m’chak khai, a u chang mi hma ciah ani naw m’hnüt bäi khai. Ani naw a mawng cu teng khai, nang ah kut ung kei na shungvong ne, na hun ci,” cik ci.

¹⁶ David naw thu pyen yawp khäta, Saul naw “Ka hta, nang David akcang ma?” ci neta ani cu kyap ci.

¹⁷ Cun kawn ah ani naw David am, “Nang na hman ci, kei ka hma ci. Nang cu kei ah khan ah na ni aih ci, cun ung phi kei naw shin ah mäih ah a hma nang ung ka bik ci!

¹⁸ Tuh ngawi kei ah khan ah a i hlawk ah na ni cu na m’dang ci, a i ah kyasei ci ung nang ah huham kyong ah Bawipa naw na tha sei phi nang naw kä na na ngawn ci.

¹⁹ A u chang naw a ga a pha ung a i ah kä ciah m’hlawt ba man ne ang? Tuhngawi kei ah khan ah na bi ah phäh ah Bawipa naw hriham ning pek ci.

²⁰ Tuhbäi kei naw ka pyen cu, nang cu Israel ghangpughang ah na kyak khai, kho uknak cu nang ah uknak ka ah om lä khai.

²¹ Cun ung phi ka hta ng’shon gui na k’phiawn gui vai ah mawng, Bawipa ah ming awn, kei ung shai na tak vai, cun ung kei ah ming la kei ah kyong chang ah ming cu a u naw kä m’hnih hlawt khai,” cik ci.

²² A pyen ah mäih ah David naw shaitak ci. Cun kawn ah Saul cu a im ah hteit ba ci, David la a chang gui cu ami ng’thuh nak ah hteit ba ci gui.